Փաստաբանների վիրավորանքների մասին հայտարարությամբ հանդես կգա Արդարադատության նախարարությունը

Փաստաբանների պալատի նախագահ Արա Զոհրաբյանը երեկ տարածած հայտարարության մեջ հույս էր հայտնել, որ  գործող իշխանությունը հրապարակային դիրքորոշում կհայտնի փաստաբաններին վիրավորելու խնդրի վերաբերյալ:

Պարզելու՝ պատրաստվո՞ւմ  է կառավարությունը նման հայտարարությամբ հանդես գալ, Panorama.am-ը դիմեց վարչապետի մամուլի խոսնակ Արման Եղոյանին:

«Այս հարցով ավելի մանրամասն կխոսի արդարադատության նախարարը: Նա է լիազորված ավելի դետալավորված խոսել: Ուղղակի ես իմ կողմից կարող եմ մեկնաբանել, որ Հայաստանում անընդունելի է ոչ միայն  փաստաբաններին, այլև ցանկացած մարդու վիրավորելը»,-ասաց նա:

Հնարավո՞ր է կառավարության ղեկավար Նիկոլ Փաշինյանը հանդես գա հայտարարությամբ: Ի Պատասխան Եղոյանն ասաց, որ կառավարության անունից լիազորված է այդ մասին խոսել նախարար Արտակ Զեյնալյանը:

Արդարադատության նախարարությունից Panorama.am-ին հայտնեցին, որ խնդրի վերաբերյալ նախարարությունը հայտարարություն կտարածի շուտով: Ժամկետները չհստակեցվեցին: