Ձեր վստահելի աղբյուրը

Էրեբունի վարչական շրջանի Աթոյան փողոցի բնակիչների խնդիրը տարբեր լրատվամիջոցների կողմից բարձրաձայնումից, պետական ու ոչ պետական մարմինների դռները թակելուց, գործադիր իշխանությանը նամակներ փոխանցելուց հետո էլ չի լուծվել:

Կոյուղաջրերը հոսում են նույն արագությամբ, շոգից հոտն ավելի գարշելի է դարձել, ճանճերը շատացել են, այսօր դեպքի վայր եկած ԱՆ մասնագետներն էլ փաստել են, այո, համաճարակի վտանգ կա:

Կառավարություն 2-3 շաբաթ առաջ ներկայացված նամակին դեռ չեն պատասխանել, քաղաքապետարանից էլ խորհուրդ են տվել կամ հարևանի հետ լեզու գտնել, կամ դատարան դիմել:

Իշխանություններից, ՏԻՄ-ից, պատգամավորներից, կոմիտեներից, մասնավոր ընկերություններից, հարևանից ու մյուսներից հույսները կտրած բնակիչները փորձում են խնդրին իրավական լուծում տալ:

Այստեղ էլ, ինչպես Panorama.am-ի հետ զրույցում պատմեցին բնակիչները, գործը փակուղի է մտել. հայցը վերադարձրել են մի քանի անգամ, բնակիչները դատարանի նման որոշումն անհիմն են համարում:

«Մեկ ամսից ավելի է՝ մենք հայց ենք ներկայացնում, դատարանը վերադարձնում է»,-ասաց փաստաբան Քրիստինե Գալստյանը:

Նա էլ Աթոյան փողոցի բնակիչ է: «Դատալեքս»-ում գործերի ուսումնասիրության արդյունքում  պարզել է, որ սերվիտուտի հետ կապված գործերը քիչ են: Բնակիչների խնդիրն էլ հենց դրան է վերաբերում:

Հիշեցնենք, որ այս իրավիճակը, ինչպես բնակիչներն են պատմում, առաջացավ այն բանից հետո, երբ հարևաններից մեկը՝ Վ. Հ.-ն Նոր-Արեշ 8-րդ փողոց 27 հասցեի բնակելի տունը ձեռք բերելուց հետո  ինքնակամ փակեց կոյուղու խողովակաշարը: Հարևանի հետ բանակցություններն արդյունք չեն տվել, նա անդրդվելի է, չի ուզում բացել և վերջ:

Բնակիչներին առաջարկել են հոր փորել, որտեղ կլցվեն կոյուղաջրերը, սակայն «Վեոլիա Ջուր» ընկերությունից քաղաքացիներին տեղեկացրել են, որ Երևան քաղաքի տարածքում այդ նպատակով հորեր փորելն արգելվում է: Ընկերությունից նաև պատասխանել են բնակիչների գրավոր հարցմանը, փաստել, որ խախտվել է Ջրային ու Հողային օրենսգրքերը, տարածքը, որտեղով անցնում էր խողովակաշարը, ենթակա չէր սեփականաշնորհման:

Գարշահոտից, համաճարակի վտանգից, ամեն օր բակն ու տունը ժավելով ախտահանելուց ու ստեղծված այլ անհարմարություններից բողոքող քաղաքացիները չեն պատրաստվում հանձնվել: Առաջիկայում խնդիրը նամակներով ներկայացնելու են առողջապահության, արդարադատության նախարարներին:

Կոյուղատարերի խնդիր առկա է նաև Երևանի այլ թաղամասերում՝  Ներքին Չարբախում, Հաղթանակում:  Դրանց մասին՝ հաջորդիվ: