Ձեր վստահելի աղբյուրը

Մալաթիա-Սեբաստիա վարչական շրջանի Հաղթանակ թաղամասի բնակիչները տարիներ շարունակ բարձրաձայնում են հասարակական տրանսպորտի վատ աշխատանքի մասին։ Ծայրամասում ապրող բնակիչների համար քաղաքի կենտրոն, էլ չենք խոսում այլ ծայրամասեր հասնելը դարձել է գլխացավանք, մի քանի ժամ տևող գործ։

Շատերը տրանսպորտի վատ աշխատանքի պատճառով դադարեցրել են իրենց երեխաների պարապմունքները։

«Տղայիս շախմատի էի տանում, արդեն բավականին հաջողությունների էր հասել։ Բայց տրանսպորտի պատճառով էլ չեմ տանում։ 2-3 կմ հեռավորության վրա գտնվող Երրորդ մաս հասնելու ու տուն վերադառնալու համար մի քանի ժամ էինք կորցնում, մի քանի տրանսպորտ փոխում։ Շաբաթական 3-4 օր պարապմունքի էինք գնում, այդքան տաքսիով երթևեկելու հնարավորություն չունենք»,-Panorama.am-ին դժգոհությունը ներկայացրեց բնակիչներից մեկը։

Նույն պատճառով շատերը երեխաներին պարի, երգի, ատլետիկայի, կարատեի, լողի ու այլ խմբակներ չեն տանում։ Աշխատող բնակիչները ժամեր շարունակ անցկացնում են կանգառներում տրանսպորտին սպասելով։ Գալուց էլ նստել չի հաջողվում, լեփ-լեցուն են։

«Ստիպված հասնում ենք Բանգլադեշ,  հետո տաքսիով շարունակում ճանապարհը»,-ասում է բնակիչներից Սուսանան։ Թաղամասը մինչ այս սպասարկում էր երկու երթուղի՝ թիվ 23-ը միկրոավտոբուս է, թիվ 56-ը՝ ավտոբուս։  Վերջինը թաղամասից դուրս  ձախ թևն էր սպասարկում, դեպի Լենինգրադյան, Բարեկամություն, Կոմիտաս, Ավան։ Սակայն քչերն են, որ հաջողվել է ավտոբուսը տեսել։ Երթուղին սպասարկող 3-4 ավտոբուս կար ընդամենը։

23 երթուղային միկրոավտոբուսն էլ ուշ-ուշ է գալիս, երեկոյան ժամերին տեսնող չի լինում։ Ինչպես բնակիչներն են պնդում, վարորդները խցկված ուղևորներին փոխադրելուց պլանի գումարը շուտ են հավաքում, ևս մի քանի հազար դրամ իրենց գրպանն են դնում ու ժամը 19-ից հետո տուն գնում։

Վերջերս 56 համարի երթուղին սպասարկող ընկերությունը հրաժարվել է աշխատելուց։ Դրանից հետո թաղամաս էր մտնում թիվ 75 համարի միկրոավտոբուսը։ Այն գալիս էր Երիտասարդականից,  անցնում Մաշտոցի պողոտայով, Խորենացի խաչմերուկից կրկնում  թիվ 23-ի երթուղին։ Թաղամաս 75 համարի մուտքն ուրախացրել էր բնակիչներին, հատկապես ուսանողներին։ Սակայն դրանից տխրում են 23-ի վարորդներն ու գործադուլ անում։ Գործադուլի հաջորդ օրը 75 համարի երթուղին այլևս թաղամաս չի մտնում։

Panorama.am-ը քաղաքապետարանին հարցեր ուղղեց՝ հասկանալու, թե ի՞նչ է կատարվել, ինչո՞ւ քմահաճ ու երեկոյան ժամերին չաշխատող վարորդները կարող են որոշել, թե որ միկրովատոբուսը ո՞ր թաղամասը կարող է սպասարկել կամ չսպասարկել, ի՞նչ քայլեր են ձեռնարկվելու թաղամասի բնակիչների խնդրի լուծման համար։

Քաղաքապետարանից նախ հաստատեցին. «Հաղթանակ թաղամասը սպասարկող ավտոբուսային հ.56 երթուղու աշխատանքը դադարեցվել է երթուղին շահագործող կազմակերպության կողմից դրա սպասարկումից հրաժարվելու պատճառով, որի արդյունքում վատթարացել է թաղամասի բնակիչների տրանսպորտային սպասարկման վիճակը»։

Ինչ վերաբերում է 75-ին, ապա ըստ քաղաքապետարանի, միկրոավտոբուսային հ.75 երթուղին իր նախաձեռնությամբ է մտել Հաղթանակ թաղամաս և քանի որ այդ երթուղու ուղեգիծը թաղամասից մինչև Մաշտոցի պողոտա-Խորենացու փողոց խաչմերուկ ամբողջությամբ կրկնում է միկրոավտոբուսային հ.23 երթուղու ուղեգծին, տեղի է տվել նշված երթուղին սպասարկող կազմակերպության դժգոհությանը, որը ժամանակավորապես դադարեցրել է երթուղու աշխատանքը:

«Այդ իսկ պատճառով, մեր կողմից դադարեցվել է միկրոավտոբուսային հ.75 երթուղու աշխատանքը Հաղթանակ թաղամասում, իսկ բնակիչների սպասարկումը բարելավելու նպատակով, ավտոբուսային հ.56 երթուղու փոխարեն, միկրոավտոբուսային հ.34 երթուղու ուղեգիծը երկարացվել է մինչև Հաղթանակ թաղամաս, հաշվի առնելով այն հանգամանքը, որ երթուղին հիմնականում կրկնում է ավտոբուսային հ.56 երթուղուն՝ ՀԱԹ-ով, Լենինգրադյան, Կիևյան փողոցներով, Կոմիտասի պողոտայով մինչև Զեյթուն թաղամաս (Ալմաստ գործարանի մոտ):

Միաժամանակ հանձնարարվել է միկրոավտոբուսային հ.հ.23 և 34 երթուղիները սպասարկող ընկերությանը՝ ապահովելու Հաղթանակ թաղամասի բնակիչների կանոնավոր սպասարկումը, այդ թվում երեկոյան ժամերին»,-հայտնեցին քաղաքապետարանից։

Հանձնարարությունը՝ հանձնարարություն, բայց լավ կլինի, որ քաղաքապետարանն իր նախաձեռնությամբ հետևի, թե ինչպես են  դրան վերաբերում գծատերերն ու վարորդները։ Մեկ անգամ չէ, որ հանձնարարություն է եղել, խնդիրը լուծելու խոստում է եղել, այն համարել են լուծված, ձեռք են սեղմել, հետո լսվել է պայթյունի ձայնը։