Սրտներս ուրիշ տոն է ուզում
Ընդամենը մի քանի օր և Հանրապետության հրապարակի հսկա տոնածառը ևս կպահեստավորվի, և հավանաբար, տեղ կգտնի հին տոնածառի մետաղյա կոնստրուկցիաների կողքին։ Բազմաթիվ քննադատությունների արժանացած տոնածառը ոմանց դուր չեր գալիս զուտ տեսքի առումով, քանի որ այն իրենից երկրաչափական պատկեր է հիշեցնում, իսկ շատերն էլ գտնում են, որ ավելի համեստ ծախսեր կարելի էր անել ու գումարը նպատակաուղղել այլ կարիքների։
Արդյո՞ք հնարավոր չէ ավելի քիչ ծախսերով ու ավելի ստեղծագործ մոտեցում ունենալ հրապարակի գլխավոր տոնածառի հետ կապված, որն ավելի համահունչ կլինի հարակից շենքերի ճարտարապետությանը։ Այս հարցի շուրջ Panorama.am-ը կարծիքներ հարցրեց մշակույթի բնագավառի մի քանի ներկայացուցիչներից։
Գեղանկարիչ, դիզայներ Սամվել Սևադան մեզ հետ զրույցում նշեց, որ այս տարվա տոնածառը չի հավանում, իր խոսքով՝ «կոնածառ» է, սակայն դա իր նեղ անձնական կարծիքն է, կան մարդիկ, որ շատ են հավանում։ Բայց նաև նշեց՝ միանշանակ է, որ կարելի է ավելի ստեղծագործական մոտեցում ունենալ։
«Կարելի է տեղի ստեղծագործողներին դիմել, մրցույթ անցկացնել ու ավելի հետաքրքիր էսքիզներ արվեն։ Լինի բնական, թե արհեստական, մեր հրապարակին անհրաժեշտ է ոչ այդ աստիճանի մեծ և ցուցամոլության հասնող տոնածառ ու ավելի համահունչ շինություններին»,- ասաց Սևադան։
Երևանի նախկին գլխավոր ճարտարապետ Հաղթանակ Շահումյանը մեզ հետ զրույցում պատմեց, որ իր մանկությունն անցել է Հանրապետության հրապարակին հարակից շենքերից մեկում ու միշտ մեծ ոգևորությամբ է սպասել տոնածառին։
«Հիմա մի տեսակ մարդկանց էսթետիկական մշակույթն է փոխվել։ Ես միշտ կողմնակից եմ եղել ավելի կենդանի, քան ավելի երկրաչափական ձևերի, որ հիմա ստացել է տոնածառը»։
«Կարին» ավանդական երգի-պարի խմբի հիմնադիր և գեղարվեստական ղեկավար Գագիկ Գինոսյանն էլ գտնում է, որ կարելի է ավելի համեստ, միևնույն ժամանակ նոր մոտեցումներ ունենալ գլխավոր տոնածառի հարցում։
«Այսօր Երևանում այնքան լուրջ մշակութային ու քաղաքաշինական խնդիրեր ունենք, որոնք թամանյանական վարդագույն քաղաքի դեմքն աղճատում են։ Նախ այս խնդիրները պետք է լուծվեն, սրանից հետո մտածել ավելի սազական տոնածառի մասին»,- ասաց Գինոսյանը։
Գինոսյանի խոսքով՝ ճաշակի ու մոտեցման խնդիր կա. «Մեկին դուր է գալիս հսկա մեծ տոնածառը, մեկին էլ՝ արհեստական ու ոչ ստանդարտ։ Վերջերս աշխատանքային այցով Նյու-Յորքում էի, հենց այդ օրերին տեղադրեցին քաղաք գլխավոր տոնածառը, շատ փոքրիկ, համեստ տոնածառ էր, այդ մեծ երկնաքերների մեջ»։
Ինչ վերաբերում է այս տարվա տոնածառին, նա ասաց. «Եթե տեղադրվել է այն նպատակով, որ ժողովուրդն իրեն ավելի խանդավառված զգա և նոր շունչ զգա, միգուցե և արդարացված է, բայց եթե արել են նախորդ իշխանություններից տարբերվելու համար, շատ-շատ վատ է։ Ամեն դեպքում ես նման հարցերի վրա ավելի քիչ ծախսեր կանեի, ավելի փոքր տոնածառ կտեղադրեի, կփորձեի այլ լուծումներ գտնել, իսկ այդ գումարը կուղղեի մեր երկրի համար կենսական նշանակություն ունեցող մեկ այլ խնդրի՝ ռազմարդյունաբերության զարգացման մեջ»։
Դիզայներ Վաձ Ղազարյանն էլ առաջարկեց՝ վերամշակված թղթերից բուրգ սարքել կոնաձև, վրան անցքեր անել ու լույսեր շարել. «Խնդիրն այստեղ տնտեսում չէ, այլ մոտեցումը: Տոնածառի տարբերակների համար ծավալուն աշխատանք է հարկավոր անել: Բայց կարելի է օրինակ անգամ «Թումո»-ի երեխաներին հանձնարարել տարբերակներ մշակել»։
Քանդակագործ, Նկարիչների միության անդամ, դոցենտ Նունե Թումանյանի խոսքով՝ այս տարվա տոնածառը վատը չէր:
«Ինչ որ մոգական բան կար տոնածառի վազող լուսավորության մեջ: Այս տարի, լավագույն տարբերակ ընտրելու համար, քիչ ժամանակ ունեին... Հետագայի համար. արդեն տարվա սկզբին կարելի է մրցույթ հայտարարել, նշելով առաջադրանքի հիմնական պահանջները, որոնց շարքում կարող է լինել նաև բյուջեի վերին շեմը: Ստեղծագործող ժողովուրդ ենք, բազմաթիվ առաջարկներ կլինեն»,- ասաց քանդակագործը։
Նշենք, որ աշխարհում առաջին տոնածառը դրվել է Ռիգայում՝ 1510 թվականին։
Իսկ այս տարի աշխարհի ամենակրեատիվ տոնածառներից մեկը տեղադրված էր Մեքսիկայի Մոնտերեյ քաղաքում, որը պատրաստված էր պլաստիկ աթոռներից: Իսկ ահա մեր հանրապետության երրորդ քաղաքում՝ Վանաձորում, բացի գլխավոր տոնածառից՝ քաղաքի վարորդների ակումբը մեքենաներով տոնածառ էր ստեղծել Հայքի հրապարակում։
Լուսանկարները՝ ստեղծագործողների ֆեյսբուքյան էջերից, մեր ընտրությամբ՝որպես ներկայացուցչական։
Հարակից հրապարակումներ`
- Վանաձորի «հրաշք տոնածառը»
- Հրապարակի հին տոնածառի ճակատագիրն անորոշ է
- Վառվեցին գլխավոր տոնածառի լույսերը
- Ավագանու անդամը խնդրում է բացել տոնածառի գնման ֆինանսավորման աղբյուրը
Լրահոս
Տեսանյութեր
Անահիտ աստվածուհու արձանը կցուցադրվի Հայաստանի պատմության թանգարանում պահվող բացառիկ նմուշների հետ