Ձեր վստահելի աղբյուրը

Երևանի Բուսաբանական այգում երեկ անսովոր եռուզեռ էր։ Վանաձորցի Հակոբ Միկոյանի ծննդյան տարեդարձի հյուրերը հոբելյարին նվեր էին պատրաստում։

Բանն այն է, որ «Մաքրապատում», «Աղբ թափելն ամոթ է» նախաձեռնությունների հիմնադիրն իր տոնի առթիվ ընկերներին խնդրել էր շնորհավորական խոսքերի, GIF-երի, զանգերի փոխարեն, միանալ ու մաքրել այգին, հավաքված աղբով լի պարկերն էլ իրեն նվիրել։ Իսկ ովքեր չէին կարող  այդ ժամին Բուսաբանական այգի գալ, հորդորել էր մարքել իրենց բակը, դպրոցի, գրասենյակի, համալսարանի շրջակայքը, լուսանկարել կամ տեսանկարահանել, ապա դրանք տեղադրել ֆեյսբուքյան իր պատին։ 



Երեկ ողջ օրվա ընթացքում նա նվերների պակաս չի ունեցել։ Բայց արդյունքներն այնքան էլ չեն բավարարում Հակոբին։

«Եղան անծանոթ մարդիկ, որոնց ես չէի ճանաչում, բայց նվեր արեցին։ Օրինակ Վարդենիսի շրջանի Ակունք գյուղի դպրոցի երեխաները միացել էին այդ նախաձեռնությանը, նկարում երևում է, թե ինչպես են նրանք ձյան մեջից աղբ հավաքում։ Դա շատ հուզիչ էր ու շատ թանկ նվեր։ Ես անպայման այցելելու եմ նրանց ու շնորհակալություն հայտնեմ։ Բայց միաժամանակ նեղսրտած եմ իմ իրական ու ֆեյսբուքյան ընկերներից, որոնք իմ խնդրանքին լուրջ չէին վերաբերվել։ Ես երեկ իմ հեռախոսն անջատել էի, ոչ մի շնորհավորանք չեմ ընդունել»,-անկեղծացավ նա։

Աղբի նկատմամբ անհանդուրժողականությունը, մաքրության, կարգ ու կանոնի նկատմամբ պահանջկոտությունը Հակոբին անցել է զինվորական հորից։ Panorama.am-ի հետ զրույցում նա հիշեց, մանկության, պատանեկության տարիներին, երբ տուն էր վազում, կոշիկները հանելուց հետո եթե դրանք հավասարաչափ չէր դասավորում, ապա հայրն անպայման ուղղում էր ու հիշեցնում, պետք  է դրանք հավասար լինեն։

«Ես էլ  մասնագիտությամբ զինվորական եմ, սովորել եմ Կապի ռազմական ակադեմիայում։ Միշտ զինվորների հետ տարբեր շաբաթօրյակներ ենք կազմակերպել։ Ի դեպ, շաբաթօրյակները համարում եմ անիմաստ մի բան, եթե հավաքողները չեն հասկանում, որ հետո աղբը չի կարելի նետել գետնին»,-ասաց նա։

Հայաստանն աղբից մաքրելու  գործին նա լծվել է մի էստոնացի գործարարի մասին պատմող տեսնայութը դիտելուց հետո, ով ևս նպատակ էր դրել աղբը վերացնել իր երկրից։ Դրանից հետո ամիսներ, օրեր շարունակ նա իր ընկերների հետ մաքրել է Հայաստանի այս կամ այն հատվածը, իսկ մինչ այդ արշավական Հակոբը սարերի աղբն էր ուսապարկում հավաքում։

«Թերություններով հանդերձ, այս իշխանությունը մի առավելություն ունի նախկինների նկատմամբ, ունի կամք Հայաստանում ինչ-որ մի բանն ավելի լավ դարձնելու համար։ Պետք է ասեմ, որ աղբը հավաքելու գործում առաջինն ինձ միացողների թվում Լոռու մարզպետ Անդրեյ Ղուկասյանն է եղել, նա չի եկել որպես մարզպետ, այլ քաղաքացի, եղել է իր ընկերների հետ։  Ինձ միացել է նաև Վանաձորի քաղաքապետ Մամիկոն Ասլանյանը, կրկին որպես քաղաքացի»,-նշեց  նա։

Ի դեպ, երեկ Բուսաբանական այգում աղբ մաքրողների թվում է եղել նաև ԱԺ «Լուսավոր Հայաստան» խմբակցության պատգամավոր Հրանտ Այվազյանը։

Հակոբ Միկոյանը համոզված է, եթե շրջապատը մաքուր լինի, ապա մարդկանց մտքերն էլ մաքուր կլինեն, այս առումով պատահական չի համարում, որ մարդկանց մեծ մասի մոտ լավ ու բարի մտքերը ծագում են լոգանքի ժամանակ։ Նա համարում է, որ շուրջ բոլորը մաքուր պահելը ցույց է տալիս սերը, պատասխանատվությունը, հարգանքը հայրենիքի նկատմամբ։

«Արցախցի ընկերներիցս մեկը, որ տեսնում էր թե ես ինչով եմ զբաղված, մի օր զանգեց ինձ ու ասաց. «Հակո՛բ, իսկ դու գիտե՞ս, թե ինչու է Ստեփանակերտը մաքուր, որովհետև այդ հողի համար արյուն է թափվել»։ Սա ինձ երկար մտածելու տեղիք տվեց, մեր հողն այնքան փոքր է, ամեն կտոր մենք պետք է մաքուր պահենք»,-ընդգծեց նա։

Հակոբը մտադիր է աղբի դեմ պայքարը ոչ միայն շարունակել, այլև ընդլայնել։ Ընկերների, իր համախոհների հետ պատրաստվում է հաջորդ տարվա մայիսի 3-ին աղբ հավաքելու փառատոն իրականացնել, երբ յուրաքանչյուր մարդ՝ սկսած վարչապետից մինչև սովորական քաղաքացի իր գյուղում, քաղաքում, սարում, ձորում կհավաքեն աղբն ու այլևս այն չեն թափի։ 

«Աղբ թափելն ամոթ է, նույնիսկ դրա մասին մտածելն է ամոթ։ Ես հիմա նոր չելենջ (challenge) եմ առաջարկում։ Ամեն օր կռացեք ու մի կտոր աղբ վերցրեք։ Կռանալը նման է խոնարհման։ Եկեք խոնարհվենք մեր երկրի առաջ ամեն օր»,-հորդորեց նա։