Հ. Շարամբեյանի կենտրոնի նախկին աշխատակիցներ. Մեզ խամաճիկների պես խաղացնում են
Երեք տարի առաջ «Հովհաննես Շարամբեյանի անվան Ժողովրդական ստեղծագործության կենտրոն»-ի՝ աշխատանքից ազատված քաղաքացիները դատարանում արդարության հասել են, իրականության մեջ՝ դեռ ոչ։
«Մի ամբողջ համակարգ՝ Ժողովրդական ստեղծագործության կռախի ենթարկեցին, որպեսզի իբր թե խմբակներ բացեն մարզերում»,- Panorama.am-ի հետ զրույցում ասում է Սվետիկ Աղաբալյանը, որը կենտրոնում բանահյուսության գծով աշխատել է ավելի քան 24 տարի։
Նա համոզված է, որ կառուցվածքային փոփոխությունների իրական նպատակը կենտրոնի՝ Պանթեոնի հարևանությամբ գտնվող տարածքին տիրանալն էր։ Փոփոխություններին հաջորդել է աշխատակիցներին ազատելը։
«Մենք դատի տվեցինք, 20 հոգով դիմեցինք դատարան, վերջում մնացինք արդեն յոթ աշխատակից։ Դատական երեք ատյաններում պահանջել են ցույց տալ իրավական հիմքը, որի հիման վրա կատարվել են կառուցվածքային փոփոխությունները»,- պատմում է Ս. Աղաբալյանը։
2019-ի նոյեմբերի 9-ին Վճռաբեկ դատարանն արձանագրում է, քանի որ չկա իրավական հիմք, ապա պետք է «անվավեր ճանաչել հայցվորներ Ռոբերտ Ավանեսյանին, Ժանետա Վարդանյանին, Սվետիկ Աղաբալյանին, Հռիփսիմե Սարգսյանին, Մարգո Վարդանյանին, Կարինե Մարտիրոսյանին, Հասմիկ Սողոմոնյանին աշխատանքից ազատելու հրամանները, հայցվորներին վերականգնել նախկին աշխատանքում՝ վերջիններիս վճարելով հարկադիր պարապուրդի ամբողջ ժամանակահատվածի համար»:
Խմբագրություն դիմած կինը նշում է, չնայած կա դատարանի որոշում, սակայն իրենց աշխատանքի չեն վերականգնել, պարապուրդի համար չեն վճարվել։ Դիմել են պետական գրեթե բոլոր մարմիններին՝ ԱԺ-ին, ԱԺ մշակույթի հանձնաժողովին, Կառավարությանը, վարչապետին, Կրթության, գիտության, մշակույթի ու սպորտի նախարարությանը, արդարադատության նախարարությանը։ Նա մեղադրում է նաև Հարկադիր կատարումն ապահովող ծառայությանը, անգործություն ցուցաբերելու համար։
«Այսքանից հետո էլ սայլը տեղից չի շարժվում, մեզ մոտ տպավորություն է, որ մեզ վերևից խամաճիկների պես խաղացանում են։ Չենք հասկանում, ինչ են ուզում անել, բայց դատարանի որոշում կա»,- ասաց նա։
Հարկադիր կատարումն ապահովող ծառայությունից Panorama.am-ին հայտնեցին, ներկայում այդ գործով կատարողական գործողությունները շարունակվում են։
Ծառայությունից թվարկեցին, թե ինչ են արել մինչ այս պահը։ Կատարողական գործողությունների կատարման ընթացքում հարկադիր կատարողի կողմից հարուցված կատարողական վարույթների շրջանակներում 17.12.2019թ. կայացվել են որոշումներ՝ «Պարտապանին որոշակի գործողություններ կատարելուն պարտադրելու կամ որոշակի գործողությունների կատարումից ձեռնպահ մնալուն հարկադրելու մասին», որոնք 18.12.2019թ. առձեռն հանձնվել են «Հովհաննես Շարամբեյանի անվան Ժողովրդական ստեղծագործության կենտրոն» ՊՈԱԿ-ի տնօրեն Հ.Հովհաննիսյանին:
26.12.2019թ. Ծառայություն է մուտքագրվել Խորեն Գյուլզադյանի դիմումը, դիմումին կից ներկայացվել է հարկադիր պարապուրդում գտնվելու համար տրվող աշխատավարձերի վերաբերյալ հաշվարկները։ Դրանց պատճենները այս տարվա հունվարի 9-ին ուղարկվել են «Հովհաննես Շարամբեյանի անվան Ժողովրդական ստեղծագործության կենտրոն» ՊՈԱԿ-ին, վերջինիս առաջարկվել է դիմումով նշված գումարները փոխանցել Ծառայության թիվ 900013288015 հաշվեհամարին կամ ներկայացնել դիրքորոշում, որի վերաբերյալ տեղեկացվել են նաև պահանջատերերը:
Այս տարվա մարտի 6-ի գրությամբ «Հովհաննես Շարամբեյանի անվան Ժողովրդական ստեղծագործության կենտրոն» ՊՈԱԿ-ի տնօրենին կրկին առաջարկվել է կատարել հարկադիր կատարողի կողմից 17.12.2019թ. կայացված «Պարտապանին որոշակի գործողություններ կատարելուն պարտադրելու կամ որոշակի գործողությունների կատարումից ձեռնպահ մնալուն հարկադրելու մասին» որոշումների, ինչպես նաև 09.01.2020թ. թիվ Եա 50/02 գրության պահանջները և արդյունքների մասին 7 օրյա ժամկետում հայտնել Ծառայությանը:
Գլխավոր հարկադիր կատարողը 24.03.2020թ. նյութեր է ուղարկել Գլխավոր դատախազություն «Հովհաննես Շարամբեյանի անվան Ժողովրդական ստեղծագործության կենտրոն» ՊՈԱԿ-ի տնօրենի գործողություններին քրեաիրավական գնահատական տալու համար։
Ոստիկանության Երևան քաղաքի վարչության Կենտրոնական բաժնի պետը 03.04.2020թ. գրությամբ Հարկադիր կատարումն ապահովող ծառայությանը հայտնել է, որ նախապատրաստված նյութերով Ոստիկանության կենտրոնականի բաժնում հարուցվել է թիվ 13874120 քրեական գործը։
Ըստ ծառայության, կատարողական վարույթներով պահանջատերերի կողմից ներկայացված հաշվարկների համաձայն՝ արգելանք է կիրառվել «Հովհաննես Շարամբեյանի անվան Ժողովրդական ստեղծագործության կենտրոն» ՊՈԱԿ-ի գույքի և դրամական միջոցների վրա, որի արդյունքում պարտապանին պատկանող գույք կամ դրամական միջոցներ չեն հայտնաբերվել:
«Հարկադիր կատարողի կողմից 23.06.2020թ. համապատասխան գրություն է ուղարկվել Կրթության, գիտության, մշակույթի և սպորտի նախարարության գլխավոր քարտուղարին՝ պարզելու, թե, ինչ հաշվեհամարից է կատարվում «Հովհաննես Շարամբեյանի անվան Ժողովրդական ստեղծագործության կենտրոն» ՊՈԱԿ-ի ֆինանսավորումը»,- նշեցին ծառայությունից։
Ստացվում է՝ գնդակը ԿԳՄՍ նախարարության դաշտում է։
Լրահոս
Տեսանյութեր
«Հավերժի ճամփորդներ». Զոհված տղաների պատմություններն ու երազանքները՝ առցանց ցուցադրությամբ