Ձեր վստահելի աղբյուրը

Մեր օրերը ցույց են տալիս, որ հայկական այժմյան ճարտարապետությունը, քաղաքաշինությունը պետք է ոչ միայն զուտ փող աշխատելու միջոց լինի, այլ նաև քաղաքներում կառուցվեն հարմար ու ապահով բնակարաններ՝  ապաստարաններով ու թաքստոցներով։  Երևանն, օրինակ, նույնիսկ ջրահեռացման համակարգ չունի փողոցներում, այսինքն անձրևոտ եղանակին անհրաժեշտության դեպքում գետնանցումները նույնիսկ որպես թաքստոց ու ապաստարան հնարավոր չէ օգտագործել։ Իսկ նորակառույց բարձրահարկ շենքերում թաքնվելու համար ընդհանրապես որևէ հնարավորություն  չկա։

Հարցը այն չէ՝ դրա կարիքը կլինի, թե չէ, այլ՝ կենցաղի, այսօրվա մշակույթի մասին է խոսքը։

Ադրբեջանի կողմից Արցախի Հանրապետության դեմ սանձազերծած պատերազմի ընթացքում այս բացերն ավելի ակնհայտ են դարձել։ Panorama.am-ի հետ զրույցում  ՀՀ վաստակավոր ճարտարապետ, «Հայնախագիծ» ինստիտուտի արվեստանոցի վարիչ Սաշուր Քալաշյանն ասաց, որ ՀՀ պաշտպանության նախարարությունը հանձնարարել է քաղաքաշինության կոմիտեին մշակել քաղաքաշինությանը վերաբերող նորմեր, որոնք կվերաբերեն բոլոր կարգի շենքերին՝ բնակելի, հասարակական, վարչական։ Քաղաքաշինության կոմիտեն նորմերը մշակելու պատվեր է տվել «Հայնախագիծ» ինստիտուտին։

«Հիմա զբաղված եմ այդ կարգի նորմատիվ փաստաթղթերի վերամշակման, վերանայման հարցերով։ Պատճառն այսօրվա իրավիճակներն է։ Մենք, ցավոք սրտի, երբևէ հաշվի չենք առնել այդ պաշտպանական իրավիճակը, որ կարող է առաջանալ։ Կոնկրետ պատվերը կա, հիմա զբաղված ենք այդ կարգի բոլոր խնդիրների վերանայման հարցերով»,- նշեց ճարտարապետը։

Ս. Քալաշյանի խոսքով, նորմերը մշակելիս հիմնական շեշտը դրվում է բնակչության համար ապաստարանների ապահովման վրա, որոնք պետք է լինեն շենքերի տակ կամ շենքերից դուրս։

«Հիմնական խնդիրն է՝ ապաստարաններ լինեն նոր կառուցվող շենքերի տակ կամ  նախկինում կառուցված շենքերի տակ, եթե դրա հնարավարությունները կան ամրացման, վերակառուցման, այսինքն՝ միջամտությունների միջոցով»,- նշեց նա։

Այժմ ուսումնասիրում են արտասահմանյան նորմատիվները Հայաստանում կիրառելու համար, քանի որ Հայաստանը նման նորմեր չունի մշակած։ Նորմերը հաստատելուց հետո հաջորդ քայլը, ըստ Ս. Քալաշյանի, արդեն կլինի դրանց կիրառումը տիպարային կամ քաղաքացիական այլ շենքերի դեպքում։ Ապաստարաններ կկառուցվեն այն շենքերի տակ, որոնք արտակարգ իրավիճակների նախարարությունը նպատակահարմար կգտնի։

Վաստակավոր ճարտարապետն ասաց, որ սովետական ժամանակաշրջանում մտածում էին այդ հարցերի շուրջ, կային լուծումներ, սակայն անկախանալուց հետո մտածել են՝ այլևս վտանգներ չկան, իսկ այսօր՝ պատերազմական վիճակում, զգում են, որ շատ կարևոր բան է, բոլոր երկրներում  օգտագործվում է։

Նա ընդգծեց, որ այսօրվա զինտեխնիկայի առկայության դեպքում հատուկ պաշտպանական միջոցները պարտադիր են, իսկ Հայաստանում ոչինչ չկա, գործնականում ոչ մի բան չունեն։

«Երևանում միակ միջոցը, որը կարող է այսօր մեզ փրկել, Մետրոպոլիտենի տարածքն է։ Շենքերի տակ մտնելով՝ չենք կարող փրկվել, օրինակ, ճառագայթային զենքի օգտագործման դեպքում։

Որևէ նորակառույց շենքի տակ ապաստարան չկա, նման շենք չի նախագծվել։ Կան շենքեր, որոնց տակ ավտոկայանատեղիներ կան, բայց դրանք  հարմարեցված չեն որպես ապաստարաններ, որովհետև դրանք ոչ միայն բնակիչների համար են՝ որ վազեն, պատսպարվեն, նաև որպես հիվանդանոցներ պետք է հարմարեցված լինեն»,- ասաց նա։

Ս. Քալաշյանի խոսքով, առաջադրանքը ստացել են մոտ 15 օր առաջ, կարծում է՝ մինչև տարեվերջ կվերջացնեն նորմատիվների մշակումը։