Ձեր վստահելի աղբյուրը

«Աղետի գոտում պետական աջակցությամբ իրականացվող բնակապահովման ծրագիրը, որ մեկնարկել էր 2008 թվականին, պալանավորված էր, որ այս տարի հասցվի իր ավարտական փուլին»,- ասուլիսում ասաց ՀՀ քաղաքաշինության կոմիտեի Բնակարանային ֆոնդի կառավարման և կոմունալ ենթակառուցվածքների վարչության պետ Տանյա Արզումանյանը:

Նա հիշեցրեց, որ այս ծրագիրը վերաբերում է 2008 թվականին համայնքների ղեկավարների կողմից հաշավառված հերթացուցակներում ընդգրկված անձանց և այդ անձանց փաթեթների ուսումնասիրության արդյունքում շահառու ճանաչվածներին:

Տանյա Արզումանյանի խոսքով, փաթեթների ուսումնասիրության արդյունքում շահառու էին ճանաչվել 5406 ընտանիք: Ըստ նրա, այդ թիվը կարող է որոշակի աճման միտումով փոփոխվել՝ բնակապահովման իրավունքը վերականգնելու համար դատարան դիմած ընտանիքների հաշվին:

Այս ծրագրի շահառուները Լոռու, Շիրակի, Արագածոտնի մարզերի բնակավայրերից են:

Տ.Արզումանյանն ասաց, որ 2008-2017 թթ. 5406 ընտանիքից լուծվել էր 4838 ընտանիքի խնդիրները երկու ուղղությամբ՝ բնակարանային շինարարություն և ֆինանսական աջակցության տրամադրում բնակարային պայմանների բարելման համար:

Նրա ներկայացմամբ, 2019 թ. բյուջեով հատկացվել էր 560 միլիոն դրամ, մեկնարակել էր 61 ընտանիքի բնակարանային խնդրի լուծում, և 31 տների շինաշխատանքները, որոնք չէին ավարտվել, ավարտին հասցվեն:

Նա նշեց, որ 2019 թվականի աշնանը որոշում ընդունվեց՝ շահառու ճանաչված ընտանիքների խնդիրները լուծել նրանց շրջանում անցկացված գրավոր հարցման համաձայն: Այն ընտանիքները, որոնք ընտրել էին ֆինանսական աջակցության տրամադրումը որպես բնակարանային խնդրի լուծում, 2019 թ. տարեվերջին պահուստային ֆոնդից հատկացվեց 1.29 միլիարդ դրամ: Դրա հաշվին մեկնարկեց 227 ընտանիքների բնակարային խնդրի լուծում:

«2019 թվականին պետական բյուջեից 288 ընտանիքի բնակարանային խնդրի լուծման համար շուրջ 1,85 միլիարդ դրամ միջոց էր հատկացվել»,- ասաց Տ.Արզումանյանը:

Նա նաև հայտնեց, որ 2020 թվականին մեկնարկեց ծրագրի ավարտական փուլը հիմնականում այն ընտանիքների համար, որոնք հարցման արդյունքում ընտրել էին բնակարանայի շինարարության  տարբերակը: Այս ուղղությամբ բյուջեով նախատեսած ու հատկացված էր 3 միլիարդ դրամ:  Հատկացած միջոցների հաշվին մեկնարկել են այդ ընտանիքների բնակելի տների կառուցման աշխատանքները: 

Տ. Արզումանյանի խոսքով, այդ 3 միլիարդ դրամը հատկացվել է վերջին փուլի 229 ընտանիքի համար: Բնակարանների կառուցան աշխատանքները մեկնարկել էին տարեսկզբից, արդեն կան տարբեր աստիճանի ավարատվածությամբ շենքեր:

Նա ասաց, որ 229 ընտանիք բնակարանային հարցի լուծմամբ իրենք ավարտում են 2008 թվականին մեկնարկած ծրագիրը: ՀՀ քաղաքաշինության կոմիտեի ներկայացուցիչն ընդգծեց, որ խոսքը բացառապես այս ծրագրի մասին է: ՀՀ քաղաքաշինության կոմիտեի ներկայացուցչի խոսքով, վերջին 3 տարիներին մոտ 5.3 միլիարդ դրամ է հատկացվել այդ ծրագրին:

«Բնական է` բնակարանային այս ծրագրի ավարտով չենք կարող ասել, որ աղետի հետևանքներն այդ համայնքները թոթափել են: Դրա համար պետք են այլ լրացուցիչ ծրագրեր՝ տնտեսական, սոցիալական»,- նշեց Տ. Արզումանյանը:

Խոսելով տնակների, վթարային շենքերի, կիսակառույցների մասին՝ նա ասաց, որ 2019-ին մեկնարկել էր ոչ հիմնական շինությունների փաստագրման աշխատանքներ: Փաստագրվել են ավելի քան 7000 ոչ հիմնական շինություններ, պարզվել է դրանցում ապրող ընտանիքների խմբեր:

Նրա խոսքով, պարզվել է, որ նրանց շրջանում կան ինչպես անօթևան ընտանիքներ, այնպես էլ երկրորդային պատճառներով անօթևանի կարգավիճակում հայտնված մարդիկ, նաև՝ ոչ անօթևաններ, կային տնակներ, որոնք ոչ բնակության նպատակով էին օգտագործվում, կամ նախկինում բնակվել են դրանցում, ներկայումս՝ ոչ:

Տ.Արզումանյանն ասաց, որ այս ուսումնասիրությունների արդյունքում համապատասխան առաջարկությունների փաթեթը 2019  թվականին ներկայացվել էր վարչապետի աշխատակազմ, դրան հաջորդել են իրավական աշխատանքներ, օրենսդրական կարգավորումներ, մշակվել է ճանապարհային քարտեզ:

«Ամենևին չի նշանակում, որ բոլոր տնակների ընտանիքները հնարավորություն կունենան պետական միջոցների հաշվին բարելավեն բնակարանային պայմանները: Դա կախված կլինի կարգավիճակից»,- ասաց Տ.Արզումանյանը: