Ձեր վստահելի աղբյուրը

Հայաստանում կորոնավիրուսային դեպքերի թիվն արդեն մոտ մեկ ամիս է աճում է: Օրական հանձնված թեստերի մոտ 20-25 տոկոսը դրական է լինում: Ոլորտի պատասխանատուներն ահազանգում են՝ հոսպիտալացման հերթեր կան:

Panorama.am-ը զրուցել է Առողջապահության նախարարության Հիվանդությունների վերահսկման և կանխարգելման ազգային կենտրոնի վարչության պետ Ռոմելլա Աբովյանի հետ՝ դեպքերի աճի հնարավոր պատճառների, աճը կանգնեցնելու ուղղությամբ արվող քայլերի մասին:

Panorama.am - Տիկին Աբովյան, ինչո՞վ է պայմանավորված վերջին շրջանում կորոնավիրուսային դեպքերի թվի աճը, նվազման միտում նկատվո՞ւմ է:

Ռոմելլա Աբովյան - Նվազման միտում դեռևս չկա: Կա որոշակի կայունացում, բայց բարձր թվերի վրա, այսինքն՝ օրական դեռևս 1000-ից ավելի դեպքեր են արձանագրվում:

Աճը պայմանավորված է դեռևս փետրվարից մասսայաբար անվտանգության կանոնների չպահպանմամբ թե բնակչության շրջանում, թե փակ կազմակերպություններում: Իհարկե, աշխատանքներ են տարվել, որոշակի տեղերում վերահսկողությունն է ուժեղացվել և այլն, բայց միևնույնն է՝ մասսայաբար դեռևս չեն պահպանվում այն կանոնները, որոնք նախկինում կային: Եթե այսպես շարունակվի, բավականին լուրջ խնդրի առաջ կարող ենք կանգնելու: Հաշվի առնենք, որ ունեցել ենք Սուրբ Զատիկի տոնը, ակտիվ շփումներ են եղել, մեր կանխատեսումներով չենք բացառում, որ 14 օր անց կունենանք ավելի բարձր թվեր:

Չեմ կարող ասել՝ կհասնենք 2020 թվականի հոկտեմբերին ունեցած դեպքերի թվին, որովհետև հոկտեմբերն արտառոց ամիս էր, այդ ամսին շատ ավելի այլ գործոններ կային, որոնք նպաստեցին հիվանդության դեպքերի աճին: Եթե հոկտեմբերը չհաշվենք, նման բարձր թվեր չենք ունեցել կորոնավիրուսային հիվանդության մեկնարկից ի վեր: Այս թվերը կոնկրետ բնակչության, կազմակերպությունների ղեկավարության կողմից անվտանգության կանոնների նկատմամբ զգոնության նվազման հետևանք է:

Panorama.am - Կոնկրետ ի՞նչ աշխատանքներ են տարվում կորոնավիրուսային հիվանդության դեպերի աճը կանգնեցնելու ուղղությամբ:

Ռոմելլա Աբովյան - Տարբեր ուղղություններով են աշխատանքներ տարվում: Բոլոր շահագրգիռ մարմինների հետ ենք աշխատում, նաև տեսչական մարմինների, գրություններ են ներկայացվում, թե որ կազմակերպություններում ինչ դեպքեր կան, որպեսզի ուժեղացնեն վերահսկողությունը, աշխատանքներ են տարվում բնակչության շրջանում զգոնությունը բարձրացնելու ուղղությամբ, զուգահեռ աշխատանքներ են տարվում նոր հիվանդանոցների վերաբացման ուղղությամբ, քանի որ մահճակալային ֆոնդն արդեն սպառվել է, առողջապահական համակարգը գերծանրաբեռնված աշխատելով՝ չի հասցնում ընդունել հիվանդներին: Ունենք հերթերում սպասող հիվանդներ:

Բացի այդ, ելնելով իրավիճակից տարբեր առաջարկություններ են մշակվում և ներկայացվում՝ ըստ նախարարությունների լիազորությունների:

Panorama.am - Միաժամանակ ճանապարհներին տեսնում ենք գերծանրաբեռնված երթուղայիններ:

Ռոմելլա Աբովյան - Ես համամիտ եմ Ձեզ հետ: Առաջարկություններ ենք ուղարկել համապատասխան լիազոր մարմին հանրային տրանսպորտում վերահսկողությունը ուժեղացնելու համար: Ոչ միայն հանրային տրանսպորտում, նաև մեծածախ, մանրածախ առևտրի օբյեկտներում, մոլերում այդ իրավիճակն է: Անհնար է, էլ չգիտենք՝ ինչ ձևով ներկայացնենք, որ իրավիճակն, իրոք, բավականին լուրջ է և ոչ միայն Հայաստանում, այլ ամբողջ աշխարհում:

Panorama.am - Դպրոցներում ինչպիսի՞ վիճակ է, շա՞տ են հիվանդության դեպքերը:

Ռոմելլա Աբովյան - Մինչև 23 տարիքային խմբում ունենք աճ, նոր դեպքերի ցուցանիշը բավականին բարձրացել է՝ համեմատելով վերջին 14 օրվա տվյալները նախորդ 14 օրվա հետ: Դրանք այն դեպքերն են, որոնք ունեցել են ախտանշաններ ու դիմել են բժշկական կազմակերպություն բուժում ստանալու համար: Էլ չեմ խոսում անախտանշան դեպքերի մասին, քանի որ ողջ աշխարհն ասում է՝ երեխաները հիմնականում առանց ախտանիշ են տանում, ուղղակի կարող են վարակը փոխանցել:

Panorama.am- Կորոնավիրուսային հիվանդության արտահայտման փոփոխություն նկատե՞լ եք վարակի տարածումից ի վեր։

Ռոմելլա Աբովյան -Այս հարցին երևի բուժող բժիշկներն ավելի ճիշտ կասեն: Բայց Հայաստանում արդեն շրջանառվում է կորոնավիրուսի բրիտանական ենթատեսակը, որի հիմնական ապացուցողական հիմքերից միայն մեկի մասին է ահազանգում ԱՀԿ-ն։ Մասնավորապես, որ վերջինս բավականին արագ է տարածվում, այսինքն՝ վարակի վերարտադրողականությունը 36 տոկոսով ավելի բարձր է, քան նախկինը:

Panorama.am - Եթե նայում ենք ներկայացված թվերին, ապա նկատում ենք, որ ավելացել են նաև կորոնավիրուսով պայմանավորված մահվան դեպքերը:

Ռոմելլա Աբովյան - Եթե դեպքերի թիվն աճում է, օրինաչափություն կա, որ երկու շաբաթ հետո մահվան դեպքերն էլ են ավելանում: Բայց մահերի պատճառները տարատեսակ կարող են լինել, հիմնականում պայմանավորված են նրանով, երբ որ ախտանշանները սկսվում են, բավականին երկար տանն են բուժվում, ինքնաբուժմամբ են զբաղվում: Տարբեր տեսակի բուժումներ ստանալով՝ մասնավորապես հորմոններ են օգտագործում, հակաբիոտիկներ, ինչն ավելի է ծանրացում ու վատացնում պացիենտի վիճակը, վերջինս արդեն ընդունվում է հիվանդանոց ծանր կամ ծայրահեղ ծանր վիճակում:

Քանի որ մեր բնակիչներին դիմելու ևս մեկ հնարավորություն կա՝ խնդրում եմ, որպեսզի ախտանշաններ ունենալու դեպքում անմիջապես դիմել առաջնային պահպանման օղակի համապատասխան բժիշկ-մասնագետին, բուժում ստանալ միայն բժշկի նշանակմամբ: Հակամանրային դեղորայքի հետ կապված ասեմ, որ դրանք ցուցված չեն կոնորավիրուսային հիվանդության բուժման համար, նախատեսված են երկրորդային թոքաբորբ ունենալու դեպքում, միայն բժշկի ցուցմամբ ու բժշկի կողմից տրված չափաբաժիններով ու ժամանակահատվածում պետք է օգտագործել, այլապես հակառակ ազդեցությունը կարող են ունենալ առողջության վրա:

Նշեմ, որ միջին մահացության տարիքային խումբը 71-ն է, փոփոխություն չի կրել այս ողջ ընթացքում:

Panorama.am- Պատվաստումներն ինչպե՞ս են ընթանում, որևէ խնդիր առաջացել է պատվաստվողների մոտ:

Ռոմելլա Աբովյան - Շուրջ 600 մարդ է պատվաստվել «Սպուտնիկ V»-ով: Ռիսկային խմբից՝ բուժաշխատողներից է սկսվել, արտառոց դեպքեր, անբարեհաջող ելքեր չեն արձանագրվել:

Panorama.am - Շնորհակալություն զրույցի համար:

Զրուցեց՝ Տաթևիկ Մանուկյանը։