Ձեր վստահելի աղբյուրը

«Բախորոշ ու պատմական պահ է. «Վերածնվող Հայաստան»-ը հանձն է առել վերածնունդ տալու մեր բզկտված, հուսալքված և դեպի անդունդը գլորվող հայրենիքին»,- այսօր «Վերածնվող Հայաստան» կուսակցության համագումարի ընթացքում ասաց Սիսիանի համայնքապետ Արթուր Սարգսյանը։

Նրա խոսքով, իրենք առաջամարտիկներ են, որոնց նպատակները տեղային չեն։

«Այո՛, մեր հիմքը Սյունիքն է, բայց մեր պայքարը ոչ թե հանուն Սյունիքի է, այլ հանուն ազգային գաղափարախոսության և մեր անվտանգ ապագայի։ Վաղուց արդեն սպառվել է իրենց իշխանություն հորջորջող ուժերի հեղափոխական հռետորաբանությունն ու քայքայիչ պոպուլիզմը։ Տնտեսական բարեփոխումների բացակայությունը, կուռուպցիայի դեմ պայքարի ձախողումը, կոռուպցիայի նոր և ակնհայտ դրսևորումները դարձել են նրանց դեմքը»,- նշեց նա։

Ըստ Արթուր Սարգսյանի, համատարած հուսալքություն և հիասթափություն է տիրում երկրում։ «Իրերն իրենց անուններով կոչելու, ձախողված կառավարությանն արժանի գնահատական տալու ժամանակն է։ Սյունեցին ապացուցեց, որ երբ խոսքը վերաբերում է հայրենիքին, արթնանում է իրական տղամարդուն վայել, իսկական լեռնեցու արժանապատվությունը՝ բախտորոշ պահին լինել վճռական, համախմբված ու հաստատակամ։

«Վերածնվող Հայաստան» կուսակցությունը արժանապատիվ մարդկանց համախումբ է։ Վստահ եմ, որ այն չի լինելու հերթական կուսակցություններից մեկը։ Սին խոստումներ չեն լինելու, չենք խոսելու չիմացածի մասին, քայլ առ քայլ մշակված են մեր նպատակները»,- ասաց նա։

Սիսիանի քաղաքապետը նշեց, որ երկրորդական ու ստարադասված է ամեն բան, եթե չկա անվտանգություն։

«Ինչ տեսլական էլ ունենանք, առոչինչ է, եթե լուծված չեն անվտանգության խնդիրները։ Մեր նպատակն է աջակցել մեր երկրի անվտանգության, տարածքային ամբողջականության, քաղաքական կարգավիճակի և պաշտպանունակության ամրապնդմանը։ Մեր նպատակն է դիվանագիտական գործընկերների հետ երկարաժամկետ համագործակցությունը։ Գիտակցում ենք և պատրաստ ենք ստանձնելու մեր երկրի անվտանգության ապահովման պատասխանատվությունը։ Հայաստանը վերածնվելու է»,- ասաց նա։