6 դիրք hետ է անցել մեր տնօրինման տակ. Անդրանիկ Քոչարյան

«Ցանկացած տարածք, որտեղ մենք ներկայացված ենք եղել, ունեցել է ռազմավարական նշանակություն»,- խորհրդարանական ճեպազրույցների ժամանակ ասաց ՔՊ-ական պատգամավոր, Ազգային ժողովի պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը՝ պատասխանելով ադրբեջանական կողմից օկուպացրած 10 քառ կմ տարածքի և դրա ռազմավարական նշանակության վերաբերյալ հարցին։

Նա նշեց, որ այս գործողությունների արդյունքում, ամենայն հավանականությամբ, նկատելի է, որ Ադրբեջանը մինչև դեմարկացիայի փուլ մտնելը փորձում է սահմանային իր դիրքերն ավելի բարելավել:

«Բայց դրանից հետո եղել են դիրքեր, որոնք մեր գործողությունների արդյունքում նորից հետ են անցել մեր տնօրինման տակ, խոսքը 6 դիրքի մասին է: Շատ հնարավոր է, որ դա նորից փոփոխությունների ենթարկվի»,- ասաց Քոչարյանը:

Նրա խոսքով,  ամեն ինչ պետք է անել հրադադարի ռեժիմը պահելու համար, որպեսզի հայկական կողմի ուժերը վերադասավորման փուլ անցնեն, կորուստները վերականգնվեն, ռեզերվները, որն,  այնուամենայնիվ,  շատ սահմանափակ են ի տարբերություն հակառակորդի,  լիարժեք անցնեն պատրաստման փուլ: