Ձեր վստահելի աղբյուրը

Սլացիկ մարմին, գեղեցիկ կազմվածք ունենալ բոլորն են երազում, սակայն ոչ բոլորին է դա հաջողվում։ Ավելին, երբեմն ավելորդ քաշից ազատվելու դեպքում առաջանում են մի շարք էսթետիկ խնդիրներ՝ որովայնի շրջանում ավելորդ մաշկի կախվածություն, առաջնային պատի թուլություն։ Եւ եթե մարզումներն ու այլ միջամտությունները հնարավորություն չեն տալիս շտկել այդ թերությունները, ազատվել անհարմար «մաշկային գոգնոցից», ապա միակ տարբերակը մնում է վիրահատական միջամտությունը։ Ավելորդ մաշկից ազատվելու համար օգնության է հասնում աբդոմինոպլաստիկան։ Այն, ինչպես մասնագետներն են ասում, մարմնի կառուցվածքի շտկման, կատարելագործման ամենաարդյունավետ մեթոդներից է:

Այս վիրահատության առանձնահատկությունների մասին Panorama.am-ը զրուցել է Միքայելյան վիրաբուժության ինստիտուտի Օրթոպեդիայի և վնասվածքաբանության կլինիկայի միկրովիրաբուժության ծառայության ղեկավար Արթուր Մամբրեյանի հետ։

- Ի՞նչ է աբդոմինոպլաստիկան և ե՞րբ դիմել այդ մեթոդին:

- Աբդոմինոպլաստիկան էսթետիկ վիրահատություն է, որը հնարավորություն է տալիս վերացնել  որովայնի առաջային պատի դեֆորմացիան, հեռացնել կախված մաշկը և ավելորդ ճարպը։ Դրանք մեծամասամբ առաջանում են շատ արագ նիհարելուց, տարիքային փոփոխությունների արդյունքում, երբեմն ծննդաբերությունից, ինչպես նաև տարբեր հիվանդություններից հետո, երբ քաշն արագ նվազում է։ Վիրահատական այս միջամտությունը կրում է զուտ էսթետիկական բնույթ և որովայնի թերությունների շտկման ամենից արդյունավետ մեթոդներից մեկն է:

- Աբդոմինոպլաստիկայի դեպքում հաշվի առնո՞ւմ են արդյոք հարակից առողջական խնդիրները։

- Իհարկե։ Կան որոշակի հիվանդություններ, որոնց ժամանակ հակացուցված է աբդոմինոպլաստիկան։Դրանք են շաքարային դիաբետը, մետաբոլիկ սինդրոմը, ուղեկցող մի շարք հիվանդություններ, որոնց դեպքում խորհուրդ չի տրվում նման վիրահատություն իրականացնել։ Իրականում աբդոմինապլաստիկան բավական բարդ վիրահատական միջամտություն է։
Այս վիրահատությունը պետք է կատարի այն մասնագետը, որն ունի երկար տարիների փորձ, տիրապետում է որոշակի նրբությունների, որոնք խիստ անհրաժեշտ են այդ միջամտությունը բարեհաջող իրականացնելու համար։

- Կա՞ որովայնի առաջնային պատի ավելցուկի չափ, որը ցուցում է աբդոմինոպլաստիկան։

- Չափը որոշում է բուժառուն։ Եթե նրան դուր չի գալիս որովայնի արտաքին տեսքը, խանգարում է կարգավորել անձնական կյանքը, ապա կարող է դիմել էսթետիկ վիրաբույժի։

- Հնարավո՞ր են արդյոք բարդություններ հետվիրահատական շրջանում:

- Հիմնականում կարող են առաջանալ թրոմբոէմբոլիա և ճարպային էմբոլիա, վերքի բորբոքում, կոպիտ սպիների առաջացում, որոնք կարող են այլանդակել բուժառուի մարմինը և օգուտ տալու փոխարեն մեծ վնաս հասցնել։ Ինչպես արդեն նշեցի, սա շատ բարդ վիրահատություն է, ուստի պետք է ցուցումներին ու հակացուցումներին լիարժեք տիրապետել, պացիենտին ներկայացնել հնարավոր բոլոր տարբերակները, որոնց դեպքում կարող են բարդություններ առաջանալ։

Հետվիրահատական շրջանում որպես կանոն՝ մարդիկ արագ վերականգնվում են, պարզապես կան որոշակի կանոններ, որոնց պետք է հետևել։ Մասնավորապես, առաջին ամիսներին պետք է խուսափել ֆիզիկական ծանրաբեռնվածությունից, խիստ հետևել սննդակարգին։ Երեք ամիս հետո արդեն կարելի է մարզվել, բայց սննդակարգին պետք է հետևել մինչև կյանքի վերջ։

Միաժամանակ նշեմ, որ քիչ չեն նման վիրահատության դիմողները։

- Այսինքն՝ աբդոմինոպլաստիկայից հետո պե՞տք է հատուկ սննդակարգի հետևել:

- Պարտադիր։ Եթե վիրահատությունը նորմալ անցնի, բայց տվյալ անձը չհետևի սննդակարգին, սխալ կենսակերպ վարի, չհետևի մարմնի քաշին, ապա վիրահատությունը կարելի է համարել անարդյունավետ։

-Ինչպե՞ս կարելի է խուսափելու որովայնի առաջային պատի ձևախախտումներից։

Առաջին հերթին մարդը պետք է առողջ կենսակերպ վարի, հետևի այն ուղեկցող հիվանդություններին, որոնք ևս առաջացնում են մաշկա-ճարպային ծալքեր, մաշկի, ենթամաշկի և ճարպային հյուսվածքների ավելցուկներ։ Իհարկե կան հիվանդություններ, որոնց դեպքում մարդիկ մեղավոր չեն, կա գենետիկ նախատրամադրվածություն, բայց եթե կարողանում են  հետևել իրենց, արդյունքում որովայնի առաջնային պատի դեֆորմացիա չի առաջանում։

- Որ՞ն է աբդոմինոպլաստիկայի և լիպոսակցիայի տարբերությունը։

- Տարբերությունը մեթոդիկայի մեջ է, մեկը մյուսին լրացնում է, այլ ոչ թե հակասում։ Հնարավոր է աբդոմինոպլաստիկայից հետո լիպոսակցիայի կարիք լինի, կամ համառակը։

Նշեմ նաև, որ վիրահատության հիմնականում դիմում են 40-ից հետո։ Կանանց դիմելիությունը 10 անգամ ավելի է, քանի տղամարդկանցը։