Գյուլումյանն ու մյուսներն ընդդեմ Հայաստանի գործով վճիռը կհրապարակվի դեկտեմբերի 7-ին. ՄԻԵԴ

Դեկտեմբերի 7-ին՝ հինգշաբթի օրը, Մարդու իրավունքների եվրոպական դատարանը կկայացնի «Գյուլումյանն ու մյուսներն ընդդեմ Հայաստանի» գործով վճիռը։ Այս մասին Panorama.am-ին հայտնեցին ՄԻԵԴ-ից։

Դատարանից հիշեցնում են՝ գործով դիմումատուներն են ՍԴ նախկին անդամներ  Ալվինա Գյուլումյանը, Հրանտ Նազարյանը, Ֆելիքս Թոխյանը և ՍԴ նախկին նախագահ Հրայր Թովմասյանը։

Նշվում է, որ տիկին Գյուլումյանը նախկինում նաև եղել է Մարդու իրավունքների եվրոպական դատարանի դատավոր։

Գործը վերաբերում է Սահմանադրական դատարանում դիմողների լիազորությունների դադարեցմանը` սահմանադրական փոփոխություններից հետո, որոնք ենթակա չեն դատական քննության. իրադարձությունները տեղի են ունեցել «Թավշյա հեղափոխությունից» հետո։

Հիմնվելով Եվրոպական կոնվենցիայի 6-րդ հոդվածի 1-ին մասի վրա (արդար դատաքննության իրավունք), 8-րդ (անձնական և ընտանեկան կյանքը հարգելու իրավունք), 14 (խտրականության արգելում) և 18-րդ (իրավունքների սահմանափակումների կիրառման սահմանափակում) հոդվածները՝ դիմումատուները բողոքում են, մասնավորապես, որ մուտք չունեին դատարան՝ վիճարկելու իրենց լիազորությունների դադարեցումը, և որ այդ դադարեցումը կամայական էր:
Նրանք նաև բողոքում են իրենց ապագա եկամուտների կորստից։