Ձեր վստահելի աղբյուրը

Քիչ առաջ Հայաստանի ԱԳ նախարարությունը տարածեց հաղորդագրություն՝ ի պատասխան Ադրբեջանի բարձրացրած աղմուկի և որոշ ուշագրավ հայտարարություններ արեց Ադրբեջանի կողմից հնարավոր նոր ագրեսիայի, խաղաղության գործընթացի վիժեցման ու Երևանի՝ մեկ ամսում խաղաղության պայմանագիր կնքելու առաջարկն անպատասխան թողնելու մասին։

Հաղորդագրության ուղերձների մասին Panorama.am-ը զրուցել է քաղտեխնոլոգ Արմեն Բադալյանի հետ։

Panorama.am-Պարոն Բադալյան, ի՞նչ է նշանակում այս հայտարարությունը։
Ա. Բադալյան-Սա նշանակում է, որ Հայաստանը հերթական անգամ ֆիքսում է՝  արտաքին քաղաքականության բնագավառում պարտություն է կրում։ Ի սկզբանե պարզ էր, որ Ադրբեջանը ոչ մի խաղաղության պայմանգիր էլ չի կնքելու, քանի դեռ իր ծրագրերը մաքսիմալ կերպով չի իրականացրել, մաքսիմալ կերպով հայկական գործոնը՝ որպես տարածաշրջանային նշանակություն ունեցող, չի չեզոքացրել, քանի դեռ չի ստացել բազմաթիվ գյուղեր, տարածքներ, քանի դեռ չի փոխել Հայաստանի Սահմանադրությունը, չի լուծարել Հայաստանի բանակը, քանի դեռ այս ու այլ բազմաթիվ արդյունքների չի հասել, նա որևիցե կերպով խաղաղության պայմանագիր չի կնքելու։ Հայաստանի իշխանությունները հույս ունեին, որ Տավուշում զիջումներ անելուց հետո Ադրբեջանը կգնա ու կկնքի խաղաղություն։  Չեն ուզում ասել, որ իրենք սխալվել են, բայց դիմելով միջազգային հանրությանը, փաստում են իրենց հերթական պարտությունը։

Panorama.am-ԱԳՆ-ն փաստում է ոչ միայն խաղաղության պայմանագրի տապալման հնարավորության մասին, այլև չի բացառում նոր ագրեսիա Ադրբեջանի կողմից։
Ա. Բադալյան-Այո, բնականաբար միջազգային կենտրոններն իրենց ասել են, որ Ադրբեջանը ստանալու է ՄԱԿ-ի գագաթաժողովը, որը Բաքուն կանցկացնի մաքսիմալ գեղեցիկ ձևով, PR-ն իր մոտ շատ լավ է ստացվում, որից հետո հնարավոր է ռազմական գործողություններ իրականացնի, իսկ դա կախված է Իրանի Իսլամական Հանրապետության դիրքորոշումից։ Եթե Իրանն իր համաձայնությունը տա, ռազմական գործողություններ կանցկացվեն, եթե չտվեց՝ չեն անցկացվի։ Այս պահի դրությամբ հակված եմ ենթադրելու, որ Իրանը չի տա այդ համաձայնությունը։

Panorama.am-Պարոն Բադալյան, ԱԳՆ հաղորդագրության վերջին նախադասության մեջ ասված է. «Միջազգային հանրության ուշադրությունը հրավիրում ենք այս, ինչպես նաև այն փաստի վրա, որ 1 ամսվա ընթացքում խաղաղության համաձայնագիր կնքելու պաշտոնական Երևանի առաջարկը պաշտոնական Բաքվի կողմից մնացել է անարձագանք»։ Ո՞ր միջազգային հանրության մասին է խոսքը, երբ կողմերը համաձայնել են բանակցել առանց միջնորդների։
Ա. Բադալյան-Ոչ մի միջազգային հանրություն էլ չկա, դա ընդամենը  փրփրուրներից կախվելու Հայաստանի իշխանությունների վերջին քայլերն են։ Միջազգային հանրությունը գերազանց գիտի, ինչ է տեղի ունենում։ Միջազգային հանրության մի մասը՝ Արևմուտքն այս ամեն ինչի ծրագրողն ու իրականացնողն  է փաստացի։ Հիմա Հայաստանի կառավարությունը միջազգային հանրությանը, Արևմուտքին ասում է՝ տեսեք, ես ամեն ինչ անում եմ, բայց Ադրբեջանը չի անում, ինձ օգնեք։ Իսկ միջազգային հանրությանը շա՞տ հետաքրքիր է։ Ինքն իր խնդիրներն ունի, որոնք Հայաստանի իշխանությունների միջոցով լուծում է։

Panorama.am-Նախարարության հայտարարությունից կարելի է ենթադրել, որ պաշտոնական Երևանն է շտապում օր առաջ կնքել խաղաղության պայմանագիրը։
Ա. Բադալյան-Այո, Հայաստանը 2021 թվականից օր առաջ ցանկանում է  խաղաղության պայմագիր կնքել, որ ասի՝ տեսեք, այն հինգ հազար հոգին զոհվեցին (պաշտոնական տվյալներով, իրականում չգիտենք քանիսը զոհվեցին) Արցախի համար, ասեն՝ անիմաստ չեն զոհվել, այս խաղաղության համար նրանք զոհվեցին։ Բայց խաղաղությունն էլ չի ստացվում, ստացվում է, որ զոհերն անիմաստ էին։ Դրա համար Փաշինյանն ամեն վայրկյան ասում է՝ տեսեք, մենք զիջումների գնացինք, Ջերմուկի տարածքը տվեցինք և այլն, և այլն, որ ասի, սա խաղաղության պայմանագրի գինն էր։ Սակայն նախկինում էլ չկար խաղաղության պայմանագիր, հիմա էլ չկա, նախկինում էլ ճանապարհները շրջափակված էին, հիմա էլ են շրջափակված։ Ստացվեց, որ այս իշխանությունները տվեցին Ղարաբաղն Ադրբեջանին, հինգ հազար զոհ տվեցին ու ոչ մի բան չշահեցին, դեռ մի բան էլ կորուստ ունեցան։ Դրա համար նրանք ուզում են օր առաջ խաղաղության պայմանագիր կնքեն, որ ասեն՝ գինը սա էր։ Դա չի ստացվում, չի էլ ստացվելու։ Չի ստացվելու, քանի որ դրա համար այլ իրավիճակ պետք է լինի, այլ իշխանություն պետք է գա, Արցախի հարցը վերաբացվի, այլ գործոններ պետք է լինեն, թե չէ Ադրբեջանն անընդհատ նոր պահանջներ է ներկայացնելու։

Panorama.am-Ձեր նշած գործոնների մեծ մասն արտաքի՞ն են, ի նկատի ունեմ աշխարհքաղաքական փոփոխություննե՞ր են պետք։
Ա. Բադալյան-Նաև, բայց փոփոխություններ հիմա էլ լինում են, նայած թե դրանք ինչպես կօգտագործվեն Հայաստանի օգտին։ Փոփոխություն հիմա էլ է ունենում, բայց ինչպե՞ս է, օրինակ, ռուս-ուկրիանական ռազմաչակատի փոփոխություններն օգտագործվում Հայաստանի կողմից, ինչպե՞ս է օգտագործվում Իրանի գործոնը... Ոչինչ էլ չի օգտագործվում, քանի որ Հայաստանի իշխանությունը խամաճիկային է կառավարում է իրականացնում, նրանք ընդամենն ԱՐևմուտքի դրածոներն են որոշակի խնդիրներ լուծելու համար։
Այ երբ կփոխվի, կգա ազգային իշխանություն, որը հաշվի կառնի բազմաթիվ գորոծոններ, հատկապես Իրանի գործոնը, այդ դեպքում շատ բան կփոխվի, կարող ենք խոսել իրական խաղաղության մասին։ Մինչ այդ անընդհատ զիջումներ են արվելու, խաղաղության պայմանագիր չի կնքվելու, շրջափակումն էլ շարունակվելու է։

Panorama.am-Հնարավոր համարո՞ւմ եք իշխանափոխություն արտահերթ ընտրությունների միջոցով։
Ա. Բադալյան-Իշխանափոխությունը պետք է լինի մինչև հերթական ընտրությունները։ Հայաստանում ընտրություններում միշտ էլ պաշտոնապես հաղթում է իշխող քաղաքական ուժը։ Իշխանափոխություն հնարավոր է օրենքների ու Սահմանադրության շրջանակներում, շատ հանգիստ, մեկ ամսվա ընթացքում կարելի է դա անել, ցանկություն է պետք, ցանկություն չկա։