Քաղաքապետարանի անգործությո՞ւնն է քաղաքացու մահվան պատճառը. Չորացած ծառի մասին ահազանգերը մնացել են անպատասխան

«Պարզվում է, որ մահվան ելքով տապալված բարդու մասին ՀՈԱԿ-ը տեղյակ էր ոչ թե դեպքից 8 օր առաջ, այլ առնվազն 3 ամիս»,-գրում է Երևանի ավագանու անդամ Քրիստինա Վարդանյանն ու մանրամասնում.

«Մարտին քաղաքացին Active Citizen հարթակում հայտնում է, որ ճանապարհի եզրին գտնվող բարդին ավելի քան 10 տարի վթարային վիճակում է և պետք է անհապաղ հատվի։

այտը փոխանցվում է «Կանաչապատում և շրջակա միջավայրի պահպանություն» ՀՈԱԿ-ին։

Հայտը փակվում է «ԿԱՏԱՐՎԱԾ» կարգավիճակով։

Բայց ծառը չի հատվում։

Քաղաքացուն ասում են՝ կհատենք աշնանը (վթարային, մայրուղուն կից ծառի դեպքում)։

Հետո գալիս է հունիսը։

Նույն ծառի վերաբերյալ կրկին ահազանգ՝ գրավոր դիմումով։ Պատասխանում են՝ 15 օրվա ընթացքում կհատեն։

Եվս մեկ հնարավորություն՝ կանխելու ողբերգությունը։

Ութ օր անց ծառը տապալվում է։

Մարդ է մահանում։

Հիմա հարց.

Եթե մարտին արդեն որոշվել էր, որ ծառը պետք է հատվի, ապա ինչո՞ւ 2-րդ դիմումի դեպքուն այն մինչև ողբերգությունը մնաց կանգուն։

Եթե դիմումը «կատարված» էր, ապա կոնկրետ ի՞նչ էր կատարված։

Քաղաքացիները ճանապարհին կից և վթարային ծառի համար երկու անգամ զգուշացրել են։

Համակարգը երկու անգամ ստացել է ահազանգը։

Բայց վտանգը չի վերացվել։

Հազարավոր կանաչ ծառեր հատվեցին, իսկ այս մեկ չոր ծառը ոչ մեկին չանհանգստացրեց։

Ծառը չընկավ անսպասելի։ Ինչո՞ւ նախազգուշացումները ոչինչ չփոխեցին։ Մեկ անտեսված ահազանգի գինը մարդու կյանքն էր»։