Վերջին օրերի զինված բախումները ցույց տվեցին, որ կողմերը լուրջ քայլեր ձեռնարկելու կարիք ունեն. ԵԱՀԿ գործող նախագահ (լրացված)

12:15 12/06/2012 » Օրվա թեմա

Վերջին օրերի զինված բախումները ցույց տվեցին, որ կողմերը լուրջ քայլեր ձեռնարկելու կարիք ունեն. ԵԱՀԿ գործող նախագահ (լրացված)

Տարածաշրջանային այցի շրջանակներում Երևանում գտնվող ԵԱՀԿ գործող նախագահ, Իռլանդիայի արտգործնախարար Իմոն Գիլմորի և Հայաստանի արտգործանախար Էդվարդ Նալբանդյանի հետ հանդիպման ժամանակ հատուկ ուշադրություն է դարձվել ղարաբաղյան հիմնախնդրին, վերջին զարգացումներին և մասնավորապես, սահմանային միջադեպերին:

Այդ մասին քիչ առաջ լրագրողների հետ հանդիպմանը հայտարարեց արտգործնախարար Նալբանդյանը: Նա նաև ասաց, որ հանդիպման ընթացքում Հայաստանը վերահաստատել է իր դիրքորոշումը հիմնախնդիրը խաղաղ ճանապարհով կարգավորելու վերաբերյալ: ԵԱՀԿ գործող նախագահն իր հերթին նկատեց, որ Երևանում, այնուհետև` Բաքվում իր ուղերձը նույնն է լինելու:

«Ես ցանկանում եմ, որ երկու կողմերը նորոգեն ու էություն հաղորդեն իրենց հայտարարություններին: Վերջին օրերի զինված բախումները ցույց տվեցին, որ կողմերը լուրջ քայլեր ձեռնարկելու կարիք ունեն: Բոլոր դերակատրներին կոչ եմ անում ձեռնպահ մնալ ուժի կիրառումից, դրա սպառնալիքից և պատասխան գործողություններից: Այս հակամարտությունը չի լուծվի ուժի կամ դրա սպառնալիքի կիրառմամբ, ըստ իս, ժամանակն է, կառուցել վստահություն, դրա համար պետք է կողմերի իրական կամք ու նվիրվածություն», -հավելեց ԵԱՀԿ գործող նախագահը:

Նրա խոսքով, ԵԱՀԿ կարող է օգնել ժողովուրդների միջև փոխվստահության կամուրջներ գցել. «մենք կարող ենք հարթակ տրամադրել կողմերին երկխոսության համար և սատարել խաղաղության հասնելուն ուղղված կողմերի ջանքերին, բայց չենք կարող լուծում պարտադրել»:

ԵԱՀԿ գործող նախագահը կոչ արեց հակամարտող կողմերին շփման գծից դուրս բերել դիպուկահարներին, ներդնել և կիրառել շփման գծում տեղի ունեցած միջադեպերի հետաքննության մեխանիզմ: Նա խոստացավ իր նախագահության օրոք անել հնարավորինս նման մեխանիզմի ստեղծման համար, հույս հայտնեց, որ հաջորդ շաբաթ Փարիզում Ադրբեջանի ու Հայաստանի ԱԳ նախարարների հանդիպումը նոր շունչ կհաղորդի բանակցություններին ու առաջընթաց կապահովի նման մեխանիզմի ստեղծման համար:

«Ես գալիս եմ մի երկրից` Իռլանդիայից, որտեղ ծանոթ են հակամարտություններին և գիտեն, թե ինչքան դժվար է լուծել նման իրավիճակները: Մարդիկ, ովքեր ապրում են այս տարածաշրջանում արժանի են խաղաղության ու կայունության, ոչ թե փխրուն ստատուս քվոյի»,-ընդգծեց նա, ավելացնելով, որ ԼՂ հակամարտության վերաբերյալ քննարկումները հայկական կողմի հետ շարունակվելու են նաև ասուլիսից հետո շարունակվելիք հանդիպման ժամանակ:

Նրան ընդհատելով նախարար Նալբանդյանը նկատեց, որ Հայաստանը միշտ էլ կողմ է եղել և այսօր էլ կողմ է նման մեխանիզմի ներդրմանը և «Ադրբեջանի պես առաջարկն ընդունելու հաջորդ օրը չի մերժում այն»:

Հայ լրագրողները նաև հարց ուղղեցին, թե ինչու ԵԱՀԿ գործող նախագահը չի այցելում ԼՂՀ: Իռլանդացի նախարարը հստակ պատասխան չտվեց:

Ավելի վաղ Panorama.am-ը տեղեկացրել էր, որ Իմոն Գիլմորը Երևանում հանդիպել է ԼՂՀ նախագահ Բակո Սահակյանի հետ: Ըստ պաշտոնական հաղորդագրության Բակո Սահակյանը հանդիպման ընթացքում «կրկին հաստատել է պաշտոնական Ստեփանակերտի հավատարմությունը ԵԱՀԿ Մինսկի խմբի շրջանակներում հակամարտության խաղաղ կարգավորմանը, միաժամանակ ավելացնելով, որ հիմնախնդրի կարգավորման կարևոր խոչընդոտներից է Ադրբեջանի կողմից վարվող ռազմատենչ և հակահայկական քաղաքականությունը, որը վերջին ժամանակահատվածում ընդունել է խիստ ծայրահեղական կեցվածք և միջազգային հանրության կողմից պետք է արժանանա համապատասխան գնահատականի»:

Աղբյուր` Panorama.am

Share |

Տպագրական տարբերակ

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter:

↓ Վերջին նորություններ
Շարունակել

Օրացույց