Ն.Զոհրաբյան. «Պաղեստինյան քննարկումը նախադեպ է ԼՂ-ն ԵԽԽՎ-ում ներկայացված լինելու առումով»
Այս պահին ԵԽԽՎ-ում ստորագրվում է Պաղեստինին «Ժողովրդավարության գործընկեր» կարգավիճակ տալու հուշագիր, ինչին նախորդել է դրան նվիրված քննարկում: Ինչպես Panorama.am-ին Ստրասբուրգից հաղորդեց վեհաժողովում Հայաստանի պատվիրակության անդամ Նաիրա Զոհրաբյանը, այդ քննարկումն առիթ հանդիսացավ, որպեսզի բարձրաձայնվի Հայաստանի համար կարևոր մի հարց.
«Սա շատ հարմար պահ էր, որպեսզի մենք հետաքրքրվեինք, թե ինչո՞ւ չի կարելի նման մի լուծում էլ գտնել Լեռնային Ղարաբաղի համար»,- նշեց պատգամավորը:
Տիկին Զոհրաբյանն ավելացրեց, որ այդ հարցը տրամաբանական է, որովհետև ԵԽ-ն այսօր ամենևին էլ չի դնում Պաղեստինը ճանաչելու հարցն ու նման խնդիր չի քննարկում, բայց միևնույն ժամանակ, ինչպես ցույց տվեց ԵԽԽՎ նստաշրջանի երկրորդ օրը, եվրոպացի պատվիրակները ձայների գրեթե մեծամասնությամբ քվեարկեցին Պաղեստինին «Ժողովրդավարության գործընկեր» կարգավիճակ շնորհելու օգտին.
«Մեր պատվիրակության անդամ Արմեն Ռուստամյանը բարձրացրեց խնդիրը, որ եթե նման լուծում ու առհասարակ` նման նախադեպ կա, ապա ինչո՞ւ չի կարելի նման լուծում գտնել Լեռնային Ղարաբաղի համար: Եվ փոխանակ ինչ-որ անհեթեթ հանձնաժողովներ ստեղծվեն, որոնք ուղղակիորեն խոչընդոտելու են բանակցային գործընթացին, կարելի է գտնել նման մի լուծում, հատկապես այն դեպքերի համար, երբ քննարկվելու է ԼՂ հարցը»,- տեղեկացրեց Ն.Զոհրաբյանը:
Մի խոսքով` ՀՀ պատվիրակը կարևորել է Լեռնային Ղարաբաղի խորհրդարանի ներկայացուցիչների ներկայությունը ԵԽԽՎ-ում.
«Ես կարծում եմ սա իսկապես լուրջ նախադեպ է և Հայաստանի պատվիրակությունը պետք է առավելագույն ջանքեր գործադրի հասնելու նրան, որպեսզի այս կառույցում Արցախին կամ հակամարտություններին առնչվող հարցերի քննարկմանը ներկա լինեն նաև Լեռնային Ղարաբաղի ԱԺ ներկայացուցիչները»,- հավելեց մեր զրուցակիցը: