Ձեր վստահելի աղբյուրը

 Ադրբեջանում կայացած նախագահական ընտրություններից հետո իշխող թիմում կադրային փոփոխությունները դարձել են ամենաքննարկվող թեման: Դեռ մինչև ընտրությունները լուրեր էին պտտվում, որ եթե հոկտեմբերի 9-ին Իլհամ Ալիևին հաջողվի պահպանել պաշտոնը, ապա նոր թիմում ծանրության հիմնական կենտրոնը կտեղափոխվի երկրի նշանակությամբ երկրորդ կլանի` Փաշաևների ուղղությամբ: Այդ մասին գրում է ադրբեջանական «Minval.az» կայքը` հղում կատարելով «Ենի Մուսավաթ» թերթին:

«Այդ լուրերի տարածման հիմնական պատճառն այն է, որ 2012թ. սկզբին իշխանության գլխում կանգնած նախիջևանյան կլանը ճնշվել էր, իսկ խոշոր օլիգարխների հետ մտերիմ որոշ ազդեցիկ պաշտոնյաներ, «սպիտակ դրոշը» պարզելով, տեղափոխվել էին Փաշաևների ճամբար», - գրում է հոդվածի հեղինակը: Նա նշում է, որ կրթության նախարար Միսիր Մարդանովի մայիսին ներկայացրած հրաժարականը և նրա փոխարեն փաշաևյան կադրերից մեկի նշանակումը Հայաստանից մեկնած ադրբեջանցիների շրջանակեներում ուժեղացրեց կասկածներն այն մասին, որ ընտրություններից հետո նրանց լուրջ կորուստներ են սպասվում:

Ըստ հոդվածի` Հայաստանից մեկնած ադրբեջանցիների համար սև բիծ համարվող Հաֆիզ Հաջիևի գրանցումը որպես նախագահի թեկնածու գնահատվել է որպես իշխանության պատրաստությունը հետընտրական գործընթացի համար: Կան տվյալներ, որոնց համաձայն` չնայած իշխանությունը Հաֆիզ Հաջիևին ընդդիմության դեմ է օգտագործել, այն միևնույն ժամանակ «հայկական» ադրբեջանցիներին վարկաբեկելու նպատակ է հետապնդել: Հոդվածի հեղինակի կարծիքով` Հաջիևի հայտարարությունն այն մասին, թե իրեն աջակցում են Հայաստանից մեկնած ադրբեջանցիները, ամրացրել են այդ դիրքերը` միաժամանակ վրդովելով այդ իսկ ադրբեջանցիներին:

Նշվում է, որ իր նախագահական քարոզարշավի ժամանակ Իլհամ Ալիևն այցելել է գրեթե բոլոր շրջանները: Եվ Նախիջևան չայցելելու փատը կասկած է առաջացրել, որ նոր թիմում նախիջևանցիների դիրքերը կթուլանան: Հոկտեմբերի 22-ին հրապարակվել է այն թիմի կազմը, որի հետ պետք է աշխատի Ալիևը: Պարզվել է, որ նախիջևանյան կլանը պահպանել է իր դիրքերը, իսկ Հայաստանից մեկնած ադրբեջանցիներն ստացել են կառավարական տորթի ամենամեծ պատառը:

Հեղինակը որպես օրինակ է նշում է իշխող «Ենի Ադրբեջան» («Նոր Ադրբեջան») կուսակցության գլխավոր քարտուղարի պաշտոնը նախկինում զբաղեցրած Ալի Ահմեդովին, ով ստացել է վարչապետի տեղակալի պաշտոնը և հասարակական և կրթական ոլորտի համակարգումը: Ահմեդովը նույնպես մեկնել է Հայաստանից: Երևանում ծնված Իսմեթ Աբբասովը, զրկվելով գյուղատնտեսության նախարարի պաշտոնից, նույնպես նշանակվել է վարչապետի տեղակալ: Ըստ կայքի` կա տեղեկատվություն, որ պաշտպանության նոր նախարար գեներալ-գնդապետ Զաքիր Հասանովը նույնպես արմատներով Սիսիանից է:

Նշվում է, որ նախկին նախարար Ալի Ինսանովի 2005թ. տեղի ունեցած ձերբակալությունից հետո Հայաստանից մեկնածների խումբը նկատելիորեն թուլացել է: Վերջին ընտրությունները ցույց են տվել, որ այդ համայնքը մինչ այսօր լուրջ ազդեցություն ունի ընդդիմության վրա: Ալի Ինսանովը, համաներման դիմելուց հրաժարվելով, սատարեց Ժողովրդավարական ուժերի ազգային խորհրդի միասնական թեկնածու Ջամիլ Հասանլիին: Ինսանովը, ով Հայաստանից մեկնած ադրբեջանցիների համար հեղինակություն էր համարվում, այդ կերպ միացավ ընդդիմությանը: Հեղինակի կարծիքով` Ադրբեջանի իշխանությունը վաղ թե ուշ ստիպված է լինելու ազատ արձակել Ինսանովին` Մարդու իրավունքների եվրոպական դատարանի վճռի համաձայն:

«Դատելով այդ ամենից` իշխանությունն անհանգստացած է, քանի որ առջևում խորհրդարանական ընտրություններ են: Իշխանությունը կանխատեսում է, որ այդ ընտրությունները նույնչափ դժվար են լինելու որքան հոկտեմբերի 9-ի ընտրություններն էին: Վերջին ընտրությունների վերաբերյալ Արևմուտքի և, մասնավորապես, ԱՄՆ-ի կողմից համառ քննադատությունը իշխանությունից պահանջում է ավելի զգայուն վերաբերմունք ներքին իրադրության հանդեպ: Արևմուտքին խոստացված լուրջ կադրային փոփոխությունների չգնալու իշխանության որոշման պատճառներից մեկը 2015թ. ընտրություններն են», - նշված է հոդվածում:

«Minval.az»-ն ընդգծում է, որ Ադրբեջանում տեղի ունեցած լուրջ կադրային փոփոխությունները կարող են մեծացնել հոկտեմբերի 9-ի ընտրություններից հետո նկատելիորեն թուլացած իշխանության հանդեպ դժգոհությունը, և դա կարող է խորհրդարանական ընտրությունների ժամանակ անցանկալի հետևանքների բերել:

«Եվ այն, որ նախիջևանյան կլանը, որն, ըստ կանխատեսումների, պետք է «ճնշման» ենթարկվեր, բայց կորցրեց միայն Ֆ.Ալեքպերովին (սոցիալական ապահովության նախկին նախարար Ֆիզուլի Ալեքպերով – խմբ), խոսում է տարածաշրջանային համաչափությունը պահելու իշխանության ձգտման մասին», - գրում է կայքը: