Ձեր վստահելի աղբյուրը

 Վիեննայում Ադրբեջանի կենտրոնական բանկի և ավստրիական «OeBS» ընկերության միջև կնքված սկանդալային կոռուպցիոն գործով դատական գործընթացի լսումներից մեկի ժամանակ «OeBS» -ի առևտրի գծով նախկին տնօրեն Ռալուկա Տանասեսկուն հրաժարվել է ասել այն ադրբեջանցիների անունները, ում հետ համագործակցել է: «Ես վախենում եմ այդ մարդկանցից»,- ասել է նա:

Այս մասին ադրբեջանական «Հաքքին.ազ» լրատվական կայքին ասել է գործընթացին անմիջականորեն հետևող ավստրիացի լրագրողը: Ըստ նրա` Տանասեսկուն, ինչպես նաև գործի մյուս բոլոր 9 մեղադրյալները, իրենց մեղավոր են ճանաչել և վկայություն է տվել դատարանում:

Տանասեսկուն իր մասնակցությունն է ունեցել Ադրբեջանի կենտրոնական բանկի և Ավստրիայի կենտրոնական բանկի դուստր կազմակերպության «OeBS» -ի միջև պայմանագրի կնքմանը: Հենց նա է վարել բոլոր բանակցությունները Ադրբեջանի կենտրոնական բանկի նախագահ Էլման Ռուստամովի ներկայացուցիչների հետ, ասվում է հոդվածում:

«Ինձ Ադրբեջանում հաշվեհամարներ տվեցին, ուր էլ պետք է փոխանցեի «ատկատի» գումարը»,-ասել է Տանասեսկուն դատավորի հարցերին պատասխանելիս: Սկզբում նա բանակցություններ է վարել այդ մարդկանց հետ Մոսկվայում, որտեղ էլ նրան տեղեկացրել են օֆշորային ընկերության ստեղծման մասին:

Դատավորը հարցրել է Տանասեսկուին. «Կարո ՞ղ եք Ադրբեջանից եկած այդ մարդկանց անունները ասել»: Այս հարցին Տանասեսկուն արտասովոր պատասխան է տվել` ասելով, որ վախենում է այդ մարդկանցից:

Տանասեսկուն խոստովանել է, որ փոխանցված գումարի իրական նպատակը թաքցնելու համար նա ստիպված է եղել կեղծ հաշվեհամարներ օգտագործել Ավստրիայում:

«Ես այս հարցը համաձայնեցրել եմ Ավստրիայի կենտրոնական բանկի ներկայացուցիչների հետ: Նրանք ասել են` մի անհանգստացիր և գործդ արա: Ես կարծում էի, որ իմ հետևում այնպիսի հզոր կառույց է կանգնած, ինչպիսին Ավստրիայի կենտրոնական բանկն է»,- ասել է նա:

Ըստ մեղադրյալի` «OeBS» ընկերությունում բոլորը գիտեին, որ այդ 20% «օտկատը» ուղարկվում էր Ադրբեջանի կենտրոնական բանկի կառավարությանը: Այդ մասին գիտեր նաև տնօրենների խորհրդի նախագահ Վոլֆգանգ Դուչատեկը:

«Հաքքին.ազ»-ը հիշեցնում է, որ դատավարության նախորդ լսումների ժամանակ հենց մեղադրյալ Տանասեսկուն էր, ով հավաստիացնում էր, որ գումարի կեսը փոխանցվել է օֆշորային հաշվեհամարների, իսկ մյուս մասը կանխիկ տեսքով պլաստիկ պայուսակներով փոխանցվել է Ռումինիայում աշխատող ադրբեջանցի դիվանագետներին: Այդ պայուսակները ուղարկվել են Բաքու:

Նշենք, որ փետրվարի 17-ին Ավստրիայում սկանդալային կոռուպցիոն գործով դատական գործընթաց է սկսել, որում ընդգրկված է նաև Ադրբեջանի կենտրոնական բանկի տնօրեն Էլման Ռուստամովը: Ավստրիայի իրավապահ մարմինները Ավստրիայի կենտրոնական բանկի դուստր ընկերություններից «OeBS»-ին, որը զբաղվել է թղթադրամների և արժեթղթերի տպագրությամբ, մեղադրում է Ադրբեջանի և Սիրիայի կենտրոնական բանկերի հետ կոռուպցիոն համագործակցության մեջ: