Ձեր վստահելի աղբյուրը

ԵՄ արտաքին գործերի և անվտանգության քաղաքականության հարցերով բարձր ներկայացուցիչ Քեթրին Էշթոնը և ԵՄ Ընդլայնման քաղաքականության ու հարևանության հարցերով հանձնակատար Շտեֆան Ֆյուլեն հանդես են եկել համատեղ հայտարարությամբ, որում դատապարտել են ադրբեջանցի լրագրող Ռաուֆ Միրկադիրովի ձերբակալությունը, ինչպես նաև Լեյլա Յունուսի և նրա ամուսնու նկատմամբ կիրառվող ճնշումները: Հայտարարությունը տեղադրված է ԵՄ-ի կայքում:

«Բարձր ներկայացուցիչը և հանձնակատարը մեծապես մտահոգված են ապրիլի 19-ին Ռաուֆ Միրկադիրովի ձերբակալությամբ և ապրիլի 29-ին հայտնի ադրբեջանցի իրավապաշտպաններ Լեյլա Յուուսի և Արիֆ Յունուսի հարցաքննությամբ»,- նշվում է համատեղ հայտարարության մեջ:

Ըստ նրանց` վերջին շաբաթների ընթացքում Ադրբեջանի իշխանությունների կողմից արված քայլերը, ասես, ուղղված են քաղաքացիական ակտիվիստների դեմ: Այն ակտիվիստների, ովքեր Ադրբեջանում պաշտպանում են մարդու իրավունքները, օրենքի գերակայությունը և հիմնարար ազատությունները, ինչպես նաև նպաստում են ժողովուրդների միջև երկխոսության իրականացմանը, ինչն էլ հաշտության և հակամարտության կարգավորման կարևորագույն բաղադրիչներից է:

ԵՄ-ն կոչ է անում Ադրբեջանի կառավարությանը հարգել իր` որպես Եվրոպայի խորհրդի անդամ երկրի, ստանձնած պարտականությունները և պարտավորությունները: Կոչ է անում իշխանություններին գործել ըստ Եվրոպայի խորհրդի մարդու իրավունքների հանձնակատար Նիլս Մուիժնիեկսի հանձնարարականի, որը վերջերս տեղ է գտել Ադրբեջանին ուղղված զեկույցում:

Նշենք, որ ավելի վաղ Եվրոպայի խորհրդի մարդու իրավունքների հանձնակատար Նիլս Մուիժնիեկսը, ԱՄՆ պետքարտուղարությունը, ԱՄՆ դեսպանատունը Ադրբեջանում և իրավապաշտպան կազմակերպությունները, ինչպիսին են Նորվեգիայի հելսինկյան կոմիտեն, «Human Rights Watch»-ը, «Freedom House»-ը և Իրավապաշտպան կազմակերպությունների միջազգային ֆեդերացիան (FIDH), դատապարտել են Բաքվում Լեյլա Յունուսի ձերբակալումը:

Ըստ «Թուրան» ադրբեջանական լրատվական գործակալության` շաբաթ օրը կայացել է Ժողովրդավարական ուժերի ազգային խորհրդի նիստը, որի ընթացքում խորհրդի նախագահ Ջամիլ Հասանլին հայտարարել է, որ Ազգային խորհուրդը կանի ամեն հնարավորը Յունուսին և մյուս քաղաքացիական ակտիվիստներին պաշտպանելու համար:

Նիստում իր խոսքն է ասել նաև Լեյլա Յունուսը, ով Ազգային խորհրդի անդամներին տեղեկացրել է իր դեմ սկսված քաղաքական արշավի մասին, որն ընդգրկում է նաև իրավապահ մարմիններին: Յունուսը իր դեմ սկսած հետաքննությունը գնահատել է որպես քաղաքական ֆարս և անօրինականություն: Իրավապաշտպանը նշել է, որ իր հետ համագործակցող մարդկանց վրա ճնշում են գործադրում գործը կեղծելու համար:

Գործակալությունը նշում է նաև, որ կիրակի օրը կեսօրին Անկարայի բնակարանում, որտեղ ապրում են ձերբակալված լրագրող Ռաուֆ Միրկադիրովի կինը և երեխաները, թուրքական հատուկ ծառայությունների կողմից խուզարկում է անցկացվել: Ինչպես նշել է լրագրողի կինը` Ադելյա Բաբախանովան , բնակարան են ժամանել 11 մարդ: Նրան ասել են, որ խուզարկումը իրականացվում է Ադրբեջանի իշխանությունների խնդրանքով: Խուզարկման արդյունքում առգրավվել են մի շարք փաստաթղթեր, ինչպես նաև լրագրողի դեռահաս դստեր պլանշետը: Այդ ամենից հետո բնակարան է եկել Ադրբեջանի դեսպանատան ներկայացուցիչը, ով հարցուփորձ է արել ամուսնու գործունեության մասին:

Խուզարկումից հետո Ադելյա Բաբախանովային հրավիրել են Ադրբեջանի դեսպանատուն: Լրագրողի կնոջ հարցաքննությունը դեսպանատանը տևել է մոտ 5 ժամ, ընդ որում, առանց փաստաբանի ներկայության: Այդ ամբողջ ընթացքում նրա հետ էր նաև դեռահաս աղջիկը: Բաբախանովան հրաժարվել է ստորագրել հարցաքննության արձանագրությունները` պահանջելով փաստաբանի ներկայությունը:

Նշենք, որ ապրիլի 28-ի երեկոյան Դոհա մեկնելիս հայտնի ադրբեջանցի իրավապաշտպան Լեյլա Յունուսը և նրա ամուսին կոնֆլիկտոլոգ Արիֆ Յունուսը ձերբակալվել են: Նրանք մտադիր էին մեկնել Փարիզ, այնուհետև Բրյուսել՝ ԵՄ-ի հրավերով միջազգային միջոցառման մասնակցելու համար: Լեյլա Յունուսը տեղափոխվել է Ադրբեջանի գլխավոր դատախազության ծանր հանցագործությունների հարցով քննչական վարչություն, որտեղ նրան պահել են 9 ժամ: Նրա հետ ձերբակալված ամուսինը` Արիֆ Յունուսը տեղափոխվել է հիվանդանոց նախաինսուլտային վիճակում: Բացի այդ, Յունուսի բնակարանը և «ԽԺԻ» գրասենյակը խուզարկվել են:

Ավելի վաղ Բաքվում ձերբակալվել էր ադրբեջանական «Զերկալո» (Зеркало) թերթի լրագրող Ռաուֆ Միրկադիրովը, ով մեղադրվել է Հայաստանի համար լրտեսություն իրականացնելու մեջ: