Ձեր վստահելի աղբյուրը

Բաքվի «Մեհսուլ» քաղաքային մարզադաշտում ոստիկանության հսկողության ներքո անցկացվել է Ադրբեջանի ընդդիմության հանրահավաքը, որի մասնակիցները պահանջել են փոխհատուցել բնակչության՝ մանաթի արժեզրկման պատճառով կրած կորուստները: Բաքվի քաղաքապետարանի հետ համաձայնեցված հանրահավաքի հիմնական կարգախոսը եղել է «Ո՛չ թալանին և խաբեությանը» կարգախոսը: Ցուցարարները ելույթ ունեցողներին ընդհատել են «Ազատությու՜ն» և «Հրաժարակա՜ն» կարգախոսերով: Այս մասին հաղորդում է «Կավկազսկի ուզելը»:

Ինչպես ասվում է նյութում, Ադրբեջանի Ազգային ճակատ կուսակցության (ԱԺՃԿ) նախագահ Ալի Քերիմլին՝ ելույթ ունենալով ցուցարարների առջև, կոչ է արել երկրի կառավարությանը փոխհատուցել բնակչության՝ մանաթի արժեզրկման հետևանքով կրած կորուստները: ԱԺՃԿ փոխնախագահ Ֆուադ Ղահրամանլին պահանջել է անհապաղ ազատ արձակել ադրբեջանցի քաղբանտարկյաներին: Ժողովրդավարական ուժերի ազգային խորհրդի ղեկավար Ջամիլ Հասանլին իր հերթին ևս քննադատել է Բաքվի` Եվրոպական խաղերին հսկայական միջոցներ հատկացնելը: «Հեյդար Ալիևի հիմնադրամի հաշվին արտասահմանյան երկրներում կառուցվում են զբոսայգիներ և տեղադրվում են հուշարձաններ, իսկ այդ ժամանակ ծանր հիվանդ երեխաների ծնողները սոցիալական ցանցերում դիմում են մարդկանց՝ խնդրելով օգնել վճարել իրենց մանուկների բուժման ծախսերը»,- զայրացավ Հասանլին:

BBC-ի ռուսական ծառայությունը նույնպես անդրադարձել է թեմային՝ ընդգծելով, որ հազարավոր մարդիկ մասնակցել են Բաքվում ադրբեջանական ընդդիմության կազմակերպած ցույցին, և դա վերջին տարիների ընթացքում Ադրբեջանի ընդդիմության ամենախոշոր ցույցն էր: Korrespondent.net ամսագիրն իր հերթին ևս հաղորդում է հազարավոր ցուցարարների մասին՝ հավելելով, որ «նավթով և գազով հարուստ Ադրբեջանի առջև» սուր ֆինանսական խնդիրներ են ծառացել նավթի գնի անկման պատճառով:

«Ազատություն ռադիոկայանի» կայքը հիշեցնում է, որ Ջամիլ Հասանլին հանրահավաքի ժամանակ հայտարարել է, որ ցույցի նախօրեին կոտրել են Ֆեյսբուք սոցիալական ցանցի իր էջերը՝ մեղադրելով Ադրբեջանի իշխանություններին ցույցին միանալու կոչերի տարածմանը խանգարելու ակնհայտ փորձում: Իսկ «Ազատություն ռադիոկայանի» ադրբեջանական ծառայությունն ուշադրություն է հրավիրել այն հանգամանքին, որ հանրահավաքի նախօրեին Ադրբեջանի Մամուլի խորհրդից Qafqazinfo կայքին հաղորդել են, որ բողոքի ցույցի ժամանակ անցկացվելու է լրագրողների պարտականությունների կատարման մշտադիտարկում, սակայն Ազգային խորհրդի ներկայացուցիչ Օգտայ Գյուլալիևն իր հերթին ևս հայտարարել է, որ իրենց այդ մասին ոչինչ հայտնի չէ:

Ինչպես հաղորդում է ադրբեջանական «Թուրան» լրատվական գործակալությունը, Բաքվում կայացած հանրահավաքին մասնակցել են 4-5 հազար մարդ: Բաքվի ոստիկանության գլխավոր ղեկավարությունն իր հերթին հաղորդել է, որ հանրահավաքին մասնակցել է շուրջ 600 մարդ:

 Ըստ գործակալության՝ Ազգային խորհրդի և ԱԺՃԿ փոխնախագահ Հեզալ Բայրամլին իր հայտարարության մեջ նշել է, որ Ադրբեջանում ստեղծված իրավիճակը երկրի իշխանությունների «չմտածված, կողոպուտային քաղաքականության» տրամաբանական արդյունքն է: Ազգային խորհրդի ղեկավար Ջամիլ Հասանլին քննադատել է իշխանություններին` տնտեսական ռազմավարության բացակայության համար՝ նկատելով, որ Ադրբեջանի իշխանությունների քաղաքականությունը կրում է «ինքնաբուխ և անմտածված բնույթ»: Նրա խոսքերով՝ Ադրբեջանում կոռուպցիայի ձևերից մեկը հարկային մարմինների կաշառակերությունն է, ովքեր գործարարներից հավաքում են մեծ չափերի հասնող պաշտոնական հարկերի 10-15 հազարի կանխիկ միջոցներ ՝ պարզաբանելով դա Եվրոպական խաղերի համար գումարի անբավարարությամբ:

Ինչպես գրում է «Թուրանը», Բաքվում հանրահավաքի ընթացքում ելույթ է ունեցել նաև Արցախյան պատերազմի վետերան, Ազգային խորհրդի անդամ Ռովշան Ահմեդովը ՝ նշելով` չնայած արդեն 20 տարի է, ինչ փախստականները և պատերազմի վետերաններն Ադրբեջանում չեն կարողանում ստանալ փոխհատուցում՝ երկրի իշխանությունները պատրաստ են հրավիրել և վճարել Եվրոպական խաղերում Հայաստանի հավաքականի ծախսերը:

Նյութեր թեմայի շուրջ՝
Բաքվի հանրահավաքը` միջազգային լրատվամիջոցներում
«Ադրբեջանում խուճապ է մանաթի փոխարժեքի անկման հետևանքով»
Ադրբեջանում կոչ են անում հրաժարվել Եվրոպական խաղերից, իսկ ազգայնականները սպառնում են հայկական հավաքականին
Ադրբեջանի Իսմայիլլի շրջանի բնակչությունը իշխանության կամայականությունների դեմ բողոքի ցույց է կազմակերպել