Ձեր վստահելի աղբյուրը

ՀՀ մշակույթի նախարարությունը տեղեկացնում է, որ մարտի 17-ին, 75 տարեկան հասակում կյանքից հեռացել է գեղանկարիչ, Հայաստանի Հանրապետության ժողովրդական նկարիչ Անատոլի Հակոբի Գրիգորյանը:

Անատոլի Գրիգորյանի մահվան կապակցությամբ ստեղծվել է թաղման կառավարական հանձնաժողով:

Անատոլի Գրիգորյանը ծնվել է 1941 թվականի հունիսի 4-ին։

1956-1961 թթ. ավարտել է Երևանի Փանոս Թերլեմեզյանի անվան գեղարվեստի ուսումնարանը, ապա՝ 1962-1967 թթ. Երևանի գեղարվեստաթատերական ինստիտուտի գեղանկարչության ֆակուլտետը։

1967-1976 թթ. աշխատել է նկարիչ-բեմադրող՝ հայկական հեռուստատեսության ստուդիայում։

1970 թվականից ԽՍՀՄ նկարիչների միության անդամ է, 1977 թ․ ընտրվել է Հայաստանի նկարիչների միության քարտուղար, 1978 թ․՝ ԽՍՀՄ նկարիչների միության նախագահության անդամ։

1982 թ. Ա. Գրիգորյանը վերընտրվել է Հայաստանի նկարիչների միության քարտուղար և, միաժամանակ, ԽՍՀՄ նկարիչների միության նախագահության անդամ։

1983 թ.-ից՝ ԽՍՀՄ վաստակավոր նկարիչ։

Նրա նկարները ցուցադրվել են (ինչպես ընդհանուր, այնպես էլ անհատական ցուցահանդեսներում) Ռուսաստանում, Բուլղարիայում, Հունգարիայում, Լեհաստանում, Չեխոսլովակիայում, Ավստրիայում, Հնդկաստանում, ԱՄՆ-ում, Ֆինլանդիայում, Ֆրանսիայում, ԳՖՀ-ում և այլ երկրներում։ Նկարչի ստեղծագործությունները ցուցադրվում են Տրետյակովյան պատկերասրահում, Հայաստանի պետական պատկերասրահում, Երևանի ժամանակակից արվեստի թանգարանում, Վանաձորի պատկերասրահում, մշակույթի նախարարության ֆոնդում, Ռուսաստանի և Հայաստանի նկարիչների միությունում, ինչպես նաև՝ բազմաթիվ անձնական հավաքածուներում։