Ինչ են պատրաստ տալ կուսակցությունները ազգային փոքրամասնություններին
Առաջիկա խորհրդարանական ընտրություններին նախընթաց՝ քաղաքական շատ ուժեր և առանձին անհատներ դեռևս չեն կողմնորոշվել՝ մասնակցելու են արդյոք քաղաքական այս կարևոր իրադարձությանը, թե ոչ։ Գործող խորհրդարանի՝ ազգային փոքրամասնությունները ներկայացնող պատգամավորներն այս առումով բացառություն չեն, թեև վերջիններիս որոշումն այս դեպքում քիչ նշանակություն ունի։ Նրանք, ինչպես հայտնի է, ընտրվում են ազգային փոքրմասնությունների համար նախատեսված քվոտաներով։ Տեղեկանալու՝ արդյոք իշխանություններից առաջարկ ստացե՞լ են ՝ ընդգրկվելու իրենց նախընտրական ցուցակում, Panorama.am-ի թղթակիցը խոսեց ՀՀ ազգային ժողովի այլազգի պատգամավորների հետ։
Ասորական համայնքը ներկայացնող ՀՀԿ խմբակցության պատգամավոր Արսեն Միխայլովը նշեց, որ ինքն անձամբ դեմ չէ կրկին պատգամավորի թեկնածու առաջադրվել։
«Հայաստանում ասորական համայնքը վերջերս հավաքվել և որոշում է կայացրել, որ պետք է սատարի ներկա իշխանություններին։ Անցած կիրակի օրը տեղի ունեցավ ասորական «Աթուռ» միության վարչության նիստը, որի ժամանակ առաջարկ եղավ պաշտպանելու իմ թեկնածությունը՝ առաջիկա ընտրություններին։ Իսկ եթե ասորական համայնքն աջակցում է ինձ, ես համաձայն եմ։ Մնում է՝ տեսնենք՝ իշխող կուսակցությունն արդյոք կհաստատի իմ թեկնածությունը»,- ասաց նա։
Արսեն Միխայլովը շեշտեց, որ Հայաստանի ասորական համայնքը եղել է և կա իշխանամետ։
«Մենք իշխանության հետ կլինենք։ Այս պահին իշխանության «Քաղաքացիական պայմանագիրը» կուսակցութունն է, ուրեմն մենք այդ կուսակցության հետ պետք է լինենք։ Մենք Հայաստանում քաղաքականություն չենք ձևավորում, ով կլինի իշխանություն, նրա հետ պետք է գնանք։ Մենք խնդիրներ ունենք, և ինքնստինքյան չենք կարող լինել ընդդիմությունում»,- ասաց Միխայլովը։
Խորհրդարանի՝ ազգությամբ եզդի պատգամավոր Ռուստամ Մախմուդյանն էլ մեզ հետ զրույցում նշեց, որ մինչև այս շաբաթվա վերջ՝ ամենաուշը գալիք երկուշաբթի, պարզ կլինի՝ մասնակցելո՞ւ է առաջիկա արտահերթ ընտրություններին, թե ոչ։
«Ընդհանուր մի քանի քննարկումներ կան, այս պահին եկեք՝ ոչինչ չասեմ։ Քննարկումներ ունեմ ինչպես եզդիական համայնքում, այնպես էլ կուսակցությունում։ Արտերկրում էլ հանդիպել եմ մեր համայնքի տարբեր ներկայացուցիչների հետ, և իրենց հորդորն է, որ սպասվելիք մեծամասնություն կազմող ուժի ցուցակով մասնակցեմ առաջիկա ընտրություններին։ Խնդիրն առավելապես կախված է այն քաղաքական ուժից, որից առաջարկը պետք է արվի։ Կարծում եմ՝ առաջիկա օրերին որոշակի հստակություն կմտցվի, բայց եզդիական համայնքը միանշանակորեն դիտարկում է իմ թեկնածությանը»,- ասաց մեր Ռուստամ Մախմուդյանը։
Ինչ վերաբերում է ԱԺ «Ծառուկյան» խմբակցության՝ ազգությամբ ռուս պատգամավոր Տատյանա Միքայելյանին, ապա վերջինս ևս նշեց, որ իր մասնակցության հարցը կորոշվի առաջիկա մեկ-երկու օրվա ընթացքում։
«Տեսնենք, դեռ չենք որոշել։ Առաջարկ դեռ չի եղել, սպասում եմ՝ ինչ կասեն, բայց ես կցանականայի առաջադրվել»,- ասաց նա։
Քրդական համայնքը ներկայացնող ԱԺ պատգամավոր Կնյազ Հասանովն էլ տեղեկացրեց, որ վերջին օրերին դիմել է ՔՊ-ին՝ իրեն ցուցակում ներգրավելու խնդրանքով, սակայն առայժմ պատասխան չի ստացել։
«Երևի այս երկու օրը կասեն։ Որպես փոքրամասնություն՝ մենք քվոտայով նք անցնում և միշտ իշխանության կողմն ենք։ Մենք մեր բոլոր հարցերը լուծում ենք կառավարության, իշխանությունների հետ։ Անձնապես մտադիր եմ առաջադրվել, այդպիսի ցանկություն ունեմ»,- ասաց նա։
Լրահոս
Տեսանյութեր
«Ձեր սիրելի Ալիևը «Նոլդու Փաշինյան» երգը միացրած Արցախով պտտվում է». Բագրատ Սրբազանը՝ իշխանությանը
