Ձեր վստահելի աղբյուրը

«Այն, ինչ արվել է Աֆրիկյանների շենքի նկատմամբ, անօրինական է, միջազգային կոնվենցիաներին, պայմանագրերին, օրենքներին հակասում է». Հանրային խորհրդի պատմական-ազգային արժեքների, հուշարձանների պահպանության, պատկանելության և օգտագործման խնդիրների ենթահանձնաժողովի նիստը՝ Աֆրիկյանների ակումբի շենքի պահպանման հարցի մասին օրակարգով այսօր մեկնարկեց այսպիսի գնահատականով:

Մշակույթի նախարարության Պատմության և հուշարձանների պահպանության գործակալության Երևանի տարածքային բաժնի պետ Կարո Այվազյանը նախ փորձեց մանրամասն ներկայացնել, թե ինչպես է որոշվել հուշարձանի տեղափոխումը:

Նրա խոսքով, տեղափոխման ենթակա հուշարձանների ցուցակի մեջ ընդգրկելու պահին շենքն ուղղակի օբյեկտ է եղել, հուշարձան չէր իրավաբանորեն. «Տեղափոխման ցանկում ներառված օբյեկտները զուգահեռ մտան նաև պատմամշակութային հուշարձանների ցանկ»:

Նա նշեց, որ այդ ժամանակ իրավական դաշտը դեռ կարգավորված չէր, իսկ քաղաքապետարանն արդեն քաղաքաշինական ծրագրեր էր մշակել և տարևածքներ էր հանձնել որոշ կառուցապատող կազմակերպությունների:

«Տարածքները հանձնելու ժամանակ որևէ պայման չկար և չկար փաստաթուղթ, որ այնտեղ հուշարձան գոյություն ունի: Իրավիճակ էր ստեղծվել, որ կառուցապատողը ներդրում էր կատարել, իսկ հիմա հանկարծ այստեղ հուշարձան է ի հայտ եկել: Ես հասկանում եմ այդ բարդ խնդիրը, կառուցապատողը կարող էր դատի տալ և փոխհատուցում պահանջել: Հարցը բազմիցս քննարկել ենք նաև սեփականատերերի հետ, մի մասը համաձայնեց, որ իր ծրագրի մեջ ընդգրկի հուշարձանը: Շատ  հուշարձանների հարցը լուծվեց:

Մյուսը մասը չէր համաձայնում տարբեր պատճառներով: Ստեղծվեց կոմպրոմիսային տարբերակ: Եթե Տերյան 11-ն ուղղակի ցուցակից հանվեր, այսօրվա դրությամբ հուշարձանի կարգավիճակ չէր ունենա, այդպիսի կոմպրոմիասային տարբերակ եղավ՝ ընդգրկել տեղափոխվողների մեջ, որ գոնե պահպանվի»,- մանրամասնեց Կարո Այվազյանը:

Նրա խոսքով, ճիշտ կլիներ՝ սկզբից ցուցակը հաստատվեր, հետո տեղափոխումը լիներ: Նա հավելեց, որ տեղափոխվող բոլոր հուշարձաններից միայն Տերյան 11-ն է արժեվորվել որպես հանրապետական նշանակության: Մշակույթի նախարարության ներկայացուցչի խոսքով, շենքը տարածքում պահպանելու մի քանի առաջարկ են ներկայացրել սեփականատիրոջը, որից վերջինս հրաժարվել է:

Կարո Այվազյանը նաև նշեց փողոցի լայնացման ծրագրի մասին. «Աֆրիկյանների շենքի զբաղեցրած չորս մետր տարածքում, որ փակում է ճանապարհը, կառուցապատում չի լինելու»:

Կարո Այվազյանը նշեց, որ իրենք անհրաժեշտ բոլոր փաստաթղթերը ստացել են կառուցապատողի կողմից, վերահսկություն են սահմանել:

««Գլենդել Հիլզ»-ի տարածքում քարերը պահեստավորվելու են: Մոտ երեք հարյուր քար կա ապամոնտաժված: Ազատ տարածք է, պահպանվող: Բացօթյա տարածք է, վաղվանից սկսում են ծածկն անել: Մի քար չկա, որը հնարավոր չլինի օգտագործել, բայց կան նաև վնասված անկյունային հատվածների քարեր»,- ասաց նա:

Նախորդող հրապարակումներ`

Դատարանը դեռ վարույթ չի ընդունել Աֆրիկյանների շենքի գործով հայցը

Աֆրիկյանների շենքի ֆասադի զգալի մասն արդեն չկա (Տեսանյութ)

Նախարարությունը փորձում է պարզաբանել Աֆրիկյանների շենքի «քանդումն ու տեղափոխումը»