Վենետիկի կինոփառատոնում կայացել է Հայոց ցեղասպանության մասին պատմող ֆիլմի պրեմիերան (տեսանյութ, լուսանկարներ)
Վենետիկի 71-րդ միջազգային կինոփառատոնում նախօրեին կայացել է ծագումով թուրք, գերմանացի կինոռեժիսոր Ֆաթիհ Ակինի ` Հայոց ցեղասպանության մասին պատմող «Սպի» ֆիլմի պրեմիերան: Այս մասին տեղեկանում ենք փառատոնի պաշտոնական կայքից:
Ֆիլմը մասնակցում է հիմնական մրցույթին՝ պայքարում «Ոսկե առյուծ» մրցանակի համար:
Ֆիլմը պատմում է հայազգի Նազարեթ Մանուկյանի մասին, ով փրկվելով Ցեղասպանությունից, տարիներ անց պատահաբար հայտնաբերում է, որ իր զույգ աղջիկները կարող են ողջ լինել և սկսում է փնտրել նրանց` հասնելով մինչև Հյուսիսային Դակոտա: 138 րոպե տևողությամբ ֆիլմը անգլերեն տարբերակով է, սցենարը գրվել է ֆիլմի ռեժիսորի և Մարտիկ Մարտինի կողմից: Ֆիլմում խաղում են Արսինե Խանջյանը, Սիմոն Աբգարյանը, Ակին Ղազինը և այլք: Ֆիլմի պրոդյուսերներից են Ռուբեն Դիշդիշյանը և Արամ Մովսեսյանը:
Նախքան ֆիլմի ցուցադրությունը, ֆիլմի ռեժիսորը, դերասանները հանդես են եկել մամուլի ասուլիսով: Ռեժիսոր Ֆաթիհ Ակինը պատմել է ֆիլմի մասին, այնուհետև ասել. «Սա հերոսի ճամփորդությունն է, որի ընթացքում նա ազատվում է կրոնի սահմաններից և դոգմաներից: Քանի դեռ կա հույսը, կա հոգևոր աշխարհը»:
Նշենք, որ թուրք ազգայնականների խմբի կողմից ավելի վաղ սպառնալիքներ էր տեղացել կինոռեժիսոր Ֆաթիհ Ակինի հասցեին: Ըստ թուրք ազգայնականների, այս ֆիլմը այն հաջորդական քայլերից մեկն է, որով Թուրքիային ստիպում են ընդունել կեղծ իրողություններ:
Նախորդող հրապարակումներ՝
Թուրք ազգայնականները սպառնում են Հայոց ցեղասպանության մասին ֆիլմ նկարած հայտնի ռեժիսորին
Հայոց ցեղասպանությանը նվիրված թուրք ռեժիսորի ֆիլմը կցուցադրվի Վենետիկի կինոփառատոնում
Լրահոս
Տեսանյութեր
«Հավերժի ճամփորդներ». Զոհված տղաների պատմություններն ու երազանքները՝ առցանց ցուցադրությամբ