Հայաստանի ժամանակակից արվեստի նվաճումների մասին
Հայաստանի Նկարիչների միությունում այսօր բացվել է «Քայլ, ձևափոխության և ձևաստեղծման միջև» ցուցահանդեսը, որտեղ ներկայացվել է նեոգաղութատիրական շրջանը հերոսաբար հաղթահարած հասարակության կամ, ինչպես ընդունված է ասել, անկախության սերնդի գեղագիտական նոր լեզվամտածողություն ստեղծած արվեստագետների աշխատանքները: Նման ձևակերպում է տվել ցուցահանդեսի համադրող Արման Գրիգորյանը:
«Պետականության կորստից հետո հազար տարուց ավել հայ ժողովուրդը և իր բնօրրան երկիրը ճակատագրի անգութ պարտադրանքով անդադար հայտնվում էին տարբեր, որպես կանոն, իրար հակադիր ու մարտնչող կայսրությունների ծայրամասային գավառներում: 19-րդ դարի վերջում և 20-րդ դարի սկզբում մեծագույն տառապանքների, կորուստների ու ողբերգությունների միջով անցած հայ ժողովուրդը կարողացավ ինքնակազմակերվել և հստակ նպատակասլացությամբ պայքարել ազգային պետություն կառուցելու համար: Եվ ահա 1918 թվականին հռչակվեց անկախ Հայաստանի Հանրապետությունը: Գաղութատիրության դեմ թերևս ամենաարյունալի կորուստները կրելուց՝ 1915 թվականի ցեղասպանությունը վերապրելուց ու հետգաղութատիրության շրջանի նեոգաղութատիրական ողջ պերճանքն ու տառապանքը լիուլի ճաշակելուց հետո, 1991-թվականին հռչակվեց Հայաստանի արդեն թվով երրորդ հանրապետությունը: Ժամանակակից արվեստը քսաներորդ դարից սկսած խորհրդանշում է իրապես անկախ պետականություն ունենալը և տրամաբանական է և որի համար մենք նաև շատ հպարտ ենք, որ Խորհրդային միությունում առաջին Ժամանակակից արվեստի թանգարանը 1972 թվականին բացվել է հենց Երևանում: Այսօր Հայաստանի ժամանակակից արվեստը ինչպես առաջին և երկրորդ հանրապետությունների ժամանակաշրջանում ունի կարևոր ու ուշադրության արժանի նվաճումներ»,- ասում է համադրող Ա. Գրիգորյանը:
«Քայլ, ձևափոխության և ձևաստեղծման միջև» ցուցահանդեսի առանձնահատկություններից է նաև այն, որ նախագծի նախաձեռնողները` Արարատ Սարգսյանը, Սարգիս Համալբաշյանը և համադրողները՝ Արման Գրիգորյանը Արևիկ Արևշատյանը, իրենք հանդիսանում են նաև նախագծին մասնակցող արվեստագետներ:
«Քայլ, ձևափոխության և ձևաստեղծման միջև» ցուցահանդեսը առավելապես ներկայացնում է երիտասարդ և միջին սերնդի արվեստագետների ստեղծագործությունները, սակայն գեղագիտական արտահայտչամիջոցների զարգացման ընթացքն ավելի հետաքրքիր ու ակնառու ներկայացնելու համար ընդգրկված են նաև 60-70-ականների արվեստագետների աշխատանքներ:
Լրահոս
Տեսանյութեր
«Հավերժի ճամփորդներ». Զոհված տղաների պատմություններն ու երազանքները՝ առցանց ցուցադրությամբ