«Ադրբեջանը կարող է ոչնչացնել հայ խաչքարերը, բայց չի կարող ոչնչացնել գրական ժառանգությունը»
«Երկիր դրախտավայր. օտարերկրացիները Հայաստանի և հայերի մասին» հանրագիտարանային աշխատությունն այսօր ներկայացվեց հանրությանը և առաջիկայում արդեն այն հնարավոր կլինի ձեռք բերել հայաստանյան գրախանութներում: Դրանում զետեղված են օտար պատմիչների ճանապարհորդությունների վկայությունները Հայաստանի մասին:
Ինչպես լրագրողների հետ ճեպազրույցում հայտնեց «Տաշիր» բարեգործական հիմնադրամի ներկայացուցիչ Նարեկ Կարապետյանը` գիրքն ունի երկու նպատակ. «Նախ, սկսնակ հայ պատմաբանների համար ստեղծել դաշտ, որպեսզի հնարավոր լինի արագ տեղեկատվություն հավաքել հայոց պատմության մասին` օտար աղբյուրներից: Գիրքը նաև ինքնաճանաչողության համար է կարևոր, որպեսզի ուրիշի աչքերով տեսնենք ու հասկանանք, թե ով ենք եղել: Եվ քանի որ տեղեկատվական հակամարտության ժամանակահատվածում ենք ապրում, երբ մեր հարևանները իրենց նավթային գումարներով փորձում են իրենց համար պատմություն կերտել` որոշ դեպքերում նաև մեր հաշվին, ապա երկրորդ կարևոր նպատակն էլ դա է` ցույց տալ փաստերով, թե մեր պատմությունը, թե որտեղ է իրականությունը»:
«Տաշիր»-ի ներկայացուցիչը հույս հայտնեց, որ այն կթարգմանվի նաև այլ լեզուներով, ինչն անչափ կարևոր է տեղեկատվական հակամարտությունում կշեռքի նժարը մեր կողմը թեքելու համար:
«Ադրբեջանցիները կարող են ոչնչացնել հայ խաչքարերն ու եկեղեցիները, բայց չեն կարող մեր հետքը վերացնել այս տարածաշրջանից: Ադրբեջանը չի կարող ոչնչացնել գրական ժառանգությունը` մեր հետքը Արևմտյան Հայաստանից, հյուսիսային Աղվանքից նրանք վերացնել չեն կարող»,- հավելեց նա:
Աշխատությունում զետեղված են համաշխարհային հեղինակությունների կողմից գրի առված փաստեր` սկսած հին աշխարհի Ստրաբոնից, Պլատոնից, Հերոդոտոսից ու Պլոիտարքոսից, միջին դարերի Մարկո Պոլոից, Լեոնարդո դա Վինչիից, Միշել Նոստրադամուսից, Շառլ Մոնթեսքյուից, Անտոնիո դե Գուվեայից, մինչ Ֆրիդրիխ Էնգելս, Ալեքսանդր Դյումա հայր, Լառլ Կոխ, Սերգեյ Գլինկա,Յոհան Հերդեր, Իմանուիլ Կանտ, Օգյուստ Կարիեր, Մորից Վագներ Վիկտոր Հյուգո և այլք: Սա աշխատությունում ներկայացված անվանի մարդկանց մի մասնիկն է, քանի որ բոլոր 300 աշխարհահռչակ անունները թվարկելն այստեղ ուղղակի անհնար կլիներ: Ու թերևս հենց դրանով էլ հարուստ է «Երկիր դրախտավայրը»:
Նշենք, որ գիրքը լույս է տեսել Կարեն և Սամվել Կարապետյանների հովանավորությամբ:
Լրահոս
Տեսանյութեր
«Հավերժի ճամփորդներ». Զոհված տղաների պատմություններն ու երազանքները՝ առցանց ցուցադրությամբ