Վ. Սպիվակով. Խաչատրյանի անվան փառատոնը միտված է մշակույթի և դասական արվեստի փառաբանմանն ու մեծարմանը
Արամ Խաչատրյանի անվան միջազգային երկրորդ փառատոնի նախօրեի համերգը նվիրված էր մեծ դիրիժոր և ջութակահար, հայ ժողովրդի կողմից շատ սիրված Վլադիմիր Սպիվակովի 70-ամյա հոբելյանին։
Համերգին իր խոսքն է հղել ինքը՝ Սպիվակովը։ Ողջունելով Խաչատրյանի անվան միջազգային 2-րդ փառատոնի կազմակերպիչներին, մասնակիցներին և իր համար շատ հարազատ հայ հանդիսատեսին՝ մաեստրոն բարձր է գնահատել նման մշակութային միջոցառումը, քանի որ այն միտված է մշակույթի և դասական արվեստի փառաբանմանն ու մեծարմանը: Այս մասին հայտնում է Հայաստանի պետական երիտասարդական նվագախմբի հասարակայնության հետ կապերի բաժինը:
«Անչափ շնորհակալ եմ Հայաստանի պետական երիտասարդական նվագախմբի կողմից նման ուշադրության արժանանալու համար: Երախտապարտ եմ և չափազանց զգացված իմ նկատմամբ ցուցաբերվող ջերմ վերաբերմունքի և փառատոնի այսօրվա համերգն իմ հոբելյանին նվիրելու նախաձեռնության համար: Մաղթում եմ փառատոնին հարատև կանաչ ճանապարհ, իսկ երաժշտասեր հանդիսատեսին՝ բազում վառ տպավորություններ, բարձր տրամադրություն և հաճելի պահեր: Անհամբեր սպասում եմ Ձեզ հետ հանդիպմանը արդեն գարնանն իմ շատ սիրելի և հարազատ դարձած Երևանում»,- ասված է եղել Սպիվակովի խոսքում։
Համերգի առաջին մասում Հայաստանի պետական երիտասարդական նվագախումբը և մեծ ճանաչում ունեցող դաշնակահար, բազմաթիվ միջազգային մրցույթների հաղթող Ալեքսանդր Ռոմանովսկին ներկայացրել են Արամ Խաչատրյանի Դաշնամուրի կոնցերտը, որը Ռոմանովսկին սովորել էր հատուկ խաչատրյանական փառատոնի համար։ Երեկոյի երկրորդ մասում նվագախումբը կատարել է Սերգեյ Ռախմանինովի Սիմֆոնիա թիվ 2-ը։
Համերգից հետո Ալեքսանդր Ռոմանովսկին լրագրողների հետ զրույցում նշել է, որ սա իր երրորդ ելույթն է Հայաստանում։
«Այստեղ ես գտել եմ շատ խորը մարդկանց, ովքեր ինձ հոգեհարազատ են։ Ես կատարեցի Խաչատրյանի Դաշնամուրի կոնցերտը, որը բավականին հայտնի է. այն նվագել են լավագույն կատարողներն ամերիկյան, անգլիական հայտնի նվագախմբերի հետ, կան կոնցերտի շատ ձայնագրություններ։ Կարծում եմ՝ այս ստեղծագործությունը պետք է հաճախ հնչի։ Ուրախ եմ, որ իմ կողմից Խաչատրյանի Դաշնամուրի կոնցերտի առաջին կատարումը հենց Երևանում է, այս փառատոնի շրջանակներում»,-նշել է Ռոմանովսկին։
Խաչատրյանի անվան միջազգային 2-րդ փառատոնը կազմակերպել է Հայաստանի պետական երիտասարդական նվագախումբը՝ ՀՀ մշակույթի նախարարության աջակցությամբ։ Փառատոնի բոլոր համերգները ՎիվաՍել-ՄՏՍ-ի աջակցությամբ առցանց հեռարձակվում են փառատոնի (http://akhif.am/) և նվագախմբի (http://www.syoa.am/) պաշտոնական կայքերում։
Լրահոս
Տեսանյութեր
«Հավերժի ճամփորդներ». Զոհված տղաների պատմություններն ու երազանքները՝ առցանց ցուցադրությամբ