Ձեր վստահելի աղբյուրը

Հայաստանի` Եվրասիական տնտեսական միությանն անդամակցությունից անցել է դեռևս 3 ամիս, և այդ ժամանակահատվածը բավարար չէ` ասելու, թե առաջացած խնդիրները լուծելի չեն: Այս մասին այսօր լրագրողների հետ հանդիպման ժամանակ ասաց ԱՊՀ երկրների ինստիտուտի էկոնոմիկայի բաժնի ղեկավար Ազա Միհրանյանը` անդրադառնալով ԵՏՄ անդամակցության հետ կապված խնդիրներին:

Նրա խոսքերով` այս շրջանը դեռևս ադապտացիայի շրջան է, իսկ ինտեգրման մեխանիզմները դեռ ընթացքի մեջ են:

Ա.Միհրանյանը նաև տեղեկացրեց, որ այս օրերին Եվրասիական ինտեգրման հանձնաժողովի, նախարարների և հայ գործարարների միջև ընթացել են քննարկումներ, ինչպես նաև առաջ են քաշվել տարբեր խնդիրներ, որոնք եղել են նաև Ղազախստանի, Բելառուսի և Ռուսաստանի ֆինանսական ոլորտում:

Ըստ տնտեսագետի` առաջացած խնդիրները հիմնականում տեխնիկական են. «Շուտով տեղի է ունենալու ԵՏՄ անդամ երկրների բիզնեսմենների համաժողովը, որտեղ կքննարկվեն այն բոլոր տեխնիկական խնդիրները, որոնք առաջացել են գործարար ոլորտում»:

ՌԳԱ էկոնոմիկայի ինստիտուտի տնօրենի տեղական Սվետլանա Գլինկինան ասաց, որ առաջացած խնդիրները հնարավոր չէ մեկ րոպեում լուծել, և ԵՏՄ-ին անդամակցության սկզբից հնարավոր չէ միանգամից խոսել դրական արդյունքների մասին. «Կարևոր է` ներկայացված նախագծերը թե՛ Հայաստանի, թե՛ Ռուսաստանի կողմից ինչպիսի զարգացումներ կունենան»:

Հարցին, թե ԵՏՄ անդամակցությունից ի՞նչ դրական ակնկալիքներ կլինեն մոտ ապագայում, այն դեպքում, երբ դրական արդյունքներ դեռևս չկան, Սվետլանա Գլինկինան պատասխանեց. «Հայաստանը ԵՏՄ-ին անդամակցեր, կամ էլ չանդամակցեր, ռուսական ռուբլու արժեզրկումն իր բացասական հետևանքները կունենար նաև Հայաստանի տնտեսության վրա: Պետք չէ պատրանք ստեղծել, թե մոտ ապագայում պետք է անպայման դրական տեղաշարժեր լինեն: Դրանք խնդիրներ են, որոնց լուծումը միանգամից հնարավոր չէ»:

Նա նշեց նաև, որ ԵՏՄ-ն մեծ ճանապարհ է անցել` մինչև միասնական դրամի անցնելը. «Մոտ ապագայում հնարավոր չէ միասնական արժույթի հաստատումը»:

Ինչ վերաբերում է ԵՏՄ-ին անդամացկությունից հետո դրական ակնկալիքներին, Ս. Գլինինան նշեց, որ չի կարծում, թե մոտ ժամանակահատվածում ինչ-որ դրական փոփոխությունների պետք է սպասել. «Չեմ կարծում, որ սա ԵՏՄ-ի մեղավորությունն է, այլ համաշխարհային իրավիճակն է դա պարտադրում»:

Ազա Միհրանյանն էլ նշեց, որ հնարավոր չէ 3 ամսում Հայաստանի տնտեսության վրա անդամակցությունը դրական ազդեցություն ունենար, նույնիսկ մեկ տարվա ընթացքում արդյունքները դժվար թե տեսանելի լինեն:

«Մոտ մեկ տարուց առևտրական շրջանում նոր կզգանք փոփոխությունները, և կխոսենք փոքր արդյունքների մասին»,- ասաց նա: