Մասնագետը՝ ստոմատոլոգիական ծառայությունների որակի, խնդիրների և ատամների ճիշտ խնամքի մասին
«Հայաստանում ստոմատոլոգիական ծառայությունների մակարդակը համարում եմ բավարար, և միգուցե ավելի բարձր»,-այսօր լրագրողների հետ հանդիպման ժամանակ ասաց ՀՀ ԱՆ գլխավոր վիրաբույժ-ստոմատոլոգ և իմպլանտոլոգ Կարեն Գրիգորյանը:
Կարեն Գրիգորյանի խոսքերով՝ վերջին 10-15 տարիների ընթացքում ստոմատոլոգիական ոլորտում նյութատեխնիկական հեղափոխություն է տեղի ունեցել, մասնավորապես, մուտք են գործել ժամանակակից սարքավորումներ, բուժման մեթոդներ, բացի այդ հայաստանյան մասնագետները սկսել են ավելի հաճախ վերապատրաստվել արտերկրում:
«Սա նաև մեծ հնարավորություն է ստեղծում երկրում ստոմատոլոգիական տուրիզմ զարգացնելու համար: Մենք ունենք որակ, էժան ու մատչելի գներ և կարծում եմ, որ վերջին հինգ-վեց տարիներին ստոմատոլոգները մեծ աշխատանք են կատարել և շարունակում են կատարել այս ուղղությամբ»,-ասաց վիրաբույժ-ստոմատոլոգը՝ հավելելով, որ այսպիսով Հայաստանում կարելի է զարգացնել ստոմատոլոգիական տուրիզմը ոչ միայն ցածր գների, այլև որակական բարձր չափանիշների շնորհիվ:
Անդրադառնալով ատամնաբուժական ծառայությունների գներին՝ Կարեն Գրիգորյանը նշեց, որ եվրոպական երկրների համեմատ գները 5-30 անգամ նվազ են Հայաստանում, ԱՄՆ-ի համեմատ՝ 7-10 անգամ, իսկ Ռուսաստանի համեմատ` մինչև 2-3, երբեմն 5 անգամ ցածր են:
Մասնագետի խոսքերով՝ ատամնաբուժական ծառայությունների որակը մեծապես պայմանավորված է ոչ միայն մասնագետի որակավորումով, այլ նրա կողմից գործածվող սարքավորումներով, նյութերով:
«Եթե ուզում ենք որակյալ ծառայություն մատուցել, պետք է օգտագործենք բարձրակարգ նյութեր, իսկ դրանք թանկ են, և դա է պատճառը, որ ատամնաբուժական ծառայությունների գները մեր քաղաքացիների համար հնարավոր չէ իջեցնել և միաժամանակ պահել նույն որակը»,- ասաց նա:
Խոսելով ոլորտի խնդիրներից՝ Կարեն Գրիգորյանը նշեց, որ Հայաստանում այսօր ստոմատոլոգիական ծառայություններ մատուցող կլինիկաները շատ են: Պատճառներից մեկն այն է, որ մեր երկրում հեշտ է լիցենզիա ստանալը, անգամ նորավարտ ստոմատոլոգի համար. «Կարծում եմ՝ այստեղ մի փոքր անելիքներ կան, և յուրաքանչյուր սկսնակ մասնագետ իրավունք չպետք է ունենա բացել սեփական կլինիկա, և բավարար փորձ չունենալով ծառայություն մատուցել առողջապահական ոլորտում: Այստեղ խստացում է պետք: Մի կողմից լավ է, որ մեծ քանակը ստեղծում է մրցակցային դաշտ, բայց մեր մասնագիտության մեջ հնարավոր չէ անվերջ գներն իջեցնել»:
Ըստ նրա՝ այսօր հանրապետությունում գործում են 600-700 ատամնաբուժական կլինիկաներ, իսկ 10 տարի առաջ՝ մոտ 550 կլինիկա:
Ներկայացնելով ատամի ճիշտ խնամքը, Կարեն Գրիգորյանն ասաց , որ ատամները պետք է մաքրել օրվա ընթացքում երկու անգամ՝ առավոտյան և երեկոյան, բայց բերանի խոռոչի խնամքը դրանով չի սահմանափակվում:
«Քանի որ խոզանակելիս մաքրվում է ատամի մակերեսի 70-80 տոկոսը, ապա մնացած 20-30 տոկոսը պետք է մաքրել հատուկ միջատամնային թելերով և ողողման համար նախատեսված հատուկ հեղուկներով»,- նշեց նա՝ հավելելով, որ ատամի խոզանակները պետք է փոխել երեք ամիսը մեկ:
Ինչ վերաբերում է երեխաների ատամների խնամքին, ապա մասնագետն ասաց, որ առաջին կաթնատամները ծկթելուց հետո պետք է խնամել. «Հարկավոր է վերցնել միջին կոշտության խոզանակ և մաքրել երեխայի ատամները: Ցանկալի է խոզանակները երեք ամիսը մեկ փոխել, իսկ վիրուսային հիվանություններ տանելուց հետո պետք է պարտադիր փոխել: Սա վերաբերում է թե երեխաներին, թե մեծահասակներին»:
Կարեն Գրիգորյանը ծնողներին խորհուրդ տվեց հետևել երեխաների ատամներին, կաթնատամները պարտադիր բուժել, քանի որ կաթնատամների հիվանդության պատճառով՝ վարակը հեշտությամբ կարող է ներթափանցել լնդերի մեջ. «Ժամանակավոր ատամի տակ գտնվում է հիմնական ատամի սաղմը և այդ ինֆեկցիան կարող է վնասել հիմնական ատամին»:
Այսօր նշվում է Ատամնաբույժի միջազգային օրը (International Day of dentist): Այս օրը ատամնաբույժները մեկ անգամ ևս բարձրացնում ու քննարկում են ատամնաբուժության ոլորտի հարցերն ու խնդիրները, բազմաթիվ ատամնաբուժական կենտրոններ ակցիաներ են կազմակերպում ու տեղեկություններ տարածում բերանի խոռոչի, ատամների ու լնդերի ճիշտ խնամքի մասին:
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին