Պուչինիի «Բոհեմ» օպերան՝ նոր բեմականացմամբ և Թառլոյան եղբայրների շքեղ հագուստներով
Հայաստանի Ազգային Ֆիլհարմոնիկ նվագախումբը 2016-2017թթ. համերգաշրջանը եզրափակելու է հուլիսի 24-ի գալա համերգով և հուլիսի 26-ի Պուչինիի «Բոհեմ» օպերայի նոր բեմականացմամբ:
Լրագրողների հետ հանդիպմանը ՀԱՖՆ-ի տնօրեն Ռուզաննա Սիրունյանն ասաց, որ այս համերգաշրջանի ընթացքում բավականին մեծ համերգային գործունեություն են ծավալել:
«Նվագախմբի գեղարվեստական ղեկավար և գլխավոր դիրիժոր Էդուարդ Թոփչյանի համար կարևոր է, որ համերգաշրջանն անպայման ավարտենք օպերայով: Այս տարի էլ այդ ավանդույթը չենք խախտում»,- նշեց նա:
Ռ.Սիրունյանն ասաց, որ այս անգամ Պուչինիի «Բոհեմ» օպերան ներկայացնելու են նոր բեմականացմամբ և Վարդան և Գևորգ Թառլոյանների տրամադրած շքեղ հագուստներով:
«Մենք անընդհատ պրպտումների մեջ ենք: Այս անգամ Երևանում էին ֆրանսիացի հայտնի դիզայներներ Թառլոյան եղբայրները: Մեր խնդրանքով նրանք մեզ տրամադրեցին շքեղ հագուստներ, որոցով հանդես կգան մեր արտիստները»,- նշեց Ռ. Սիրունյանը:
Նաև ասաց՝ քանի որ այս ընթացքում Հայաստանում էին մեծանուն երգիչ, երգչուհիներ, որոշել են ունենալ գալա համերգ, որտեղ կներկայացվեն տարբեր կոմպոզիտորների ստեղծագործություններ:
Ասուլիսին ներկա Էդուարդ Թափչյանը հույս հայտնեց, որ լավ «Բոհեմ» կստացվի:
«Սիրում եմ օպերաներ, հնարավորինս անդրադառնում եմ դրանց: Չնայած մեր պայմաններում շատ բարդ է, որովհետև ամեն ինչ արված է, որ Երևանում օպերա չլինի, բայց ես անում եմ: Ֆինանսի պակաս կա, ամեն ինչի պակաս կա: Ես գտնում եմ, որ պետք է գոնե երբեմն Հայաստանում ճիշտ ձևով օպերա հնչի: Ես նայում եմ, թե մենք ինչ երգիչներ ունենք և ինչ վիճակում է մեր օպերային թատրոնը, չեմ հասկանում, ուղիղ համեմատական չեն իրար հետ»,- ասաց մաեստրո Թոփչյանը:
Ասուլիսին ներկա Թառլոյան եղբայրներն էլ նշեցին, որ իրենց անձնական հավաքածուն են բերել, բոլորը կարված են Փարիզում, ամեն ինչ համընկնում է «Բոհեմի» պատմությանը:
Նշենք, որ հուլիսի 24-ին օպերային 5 հանրահայտ մեներգիչներ՝ բարիտոն Ջանպիերո Ռուջջերին (Իտալիա), սոպրանո Անի Յորենցը (Գերմանիա), բաս Վազգեն Գազարյանը (Գերմանիա), տենոր Լիպարիտ Ավետիսյանը և տենոր Դավիթ Բաբայանցը Ֆիլհարմոնիկ նվագախմբի հետ կկատարեն հայտնի արիաներ տարբեր օպերաներից: Իսկ հուլիսի 26-ին նշված մեներգիչների մասնակցությամբ կներկայացվի Պուչինիի «Բոհեմ» օպերան: