Վերնիսաժից վտարված շուրջ 100 առևտրկաններ դիմում-բողոք կներկայացնեն Երևանի քաղաքապետարան
Վերնիսաժի շուրջ 100 աշխատակիցներ՝ հիմնականում սպասքի առևտրով զբաղվող առևտրականները, տարակուսած են՝ ինչպես են այսուհետ օրվա հացի գումար վաստակելու։ Բանն այն է, որ այսօր առավոտվանից ոստիկանության աշխատակիցներն արգելել են Բուզանդի փողոցին հարող հատվածում սպասքի և այլ իրերի առևտուր իրականացնել՝ պատճառաբանելով, որ հրահանգ ունեն թույլ չտալ նշված տարածքում տաղավարներ աշխատեցնել։ Իրավապահներն իրենց այս արարքը բացատրել են հետիոնի համար ազատ տարածություն բացելու և մարդկանց անցուդարձը չխանգարելու հանգամանքով։ Նրանց խոսքով, տարածքն ազատելու հրահանգ ունեցել են Երևանի քաղաքապետարանից։
Panorama.am-ի թղթակիցը զրուցեց տարածքում մնացած հատուկենտ առևտրական կանանցից տիկին Անուշի հետ, ով դեռևս հույս ուներ, որ ոստիկանների հեռանալուց հետո դատարկել ցելոֆանե մեծ տոպրակի մեջ եղած սպասքը և վաճառել։
«Վերնիսաժում առևտուր եմ անում 1992 թվականից։ Այն ժամանակ մեկ մետր երկարությամբ սեղանիկի համար 50 դրամ վարձ էինք մուծում։ Հիմա գինը բարձրացրել են մինչև 1000 դրամ։ Մենք դեմ չէնք տեղի գումարի թանկացմանը, համաձայն էինք անգամ այդ գնին։ Ամառ, ձմեռ, արևին, անձրևին կանգնել ենք մեր տեղերում, առևտուր ենք արել, օրվա հացի փող աշխատել։ Մինչև որ անցած շաբաթ-կիրակի օրերին եկան, զգուշացրեցին, որ այլևս չենք կարող այստեղ առևտուր անել։ Մտածեցինք՝ նախորդ անգամների նման համաձայնության կգանք։ Բայց այս անգամ զգուշացումը վերջնական էր»,- պատմեց տարեց կինը։
Տիկին Անուշի պատմելով՝ իրենց առաջարկել են աշխատել Վենիսաժի ներսում, սակայն իրենք տարակուսած հակադարձել են են՝ ներսի բոլոր տաղավարները զբաղված են, ոչ ոք չի համաձայնի տեղը զիջել իրենց։
«Մեր տնօրենը շուկայի ներսի հատված չի տեղավորում։ Գնանք ո՞ւմ ասենք՝ տեղիցդ դուրս արի, տաղավարդ տուր մեզ»,- հարց հնչեցրեց առևտրական կինը։
Նա նաև տեղեկացրեց, որ տեղից վտարված շուրջ 100 առևտրականները չեն պատրաստվում լռել և արդեն երկուշաբթի օրը նամակ-դիմում են ներկայացնելու Երևանի քաղաքապետարան՝ լուծելու այս խնդիրը։
«Տեսնենք՝ ինչ պատասխան կստանանք։ Բայց մեծ հույսեր չունենք։ Ոչ ոք ժողովրդի մասին չի մտածում։ Մեզ հաճելի չէ ամեն օր ապրանքները տանել-բերել, շարել, հետո նորից հավաքել։ Իմ սեղանիկի ամբողջ ապրանքը միասին վերցրած 300 դոլար չարժեր»,- նշեց տիկին Անուշը։
Փորձեցինք զրուցել նաև մոտակայքում կանգնած երկու ոստիկանների հետ, սակայն այդ պահին մեզ մոտեցավ քաղաքացիական հագուստով մի տղամարդ՝ ներկայանալով որպես Կենտրոնի թաղապետարանի առևտրի բաժնի աշխատակից։ Նրա հետ եղած մյուս տղամարդն արագորեն ընդհատեց առաջինին՝ չթողնելով, որ նա պատասխանի հարցերին և հորդորելով բոլոր տեղեկությունների համար դիմել Երևանի քաղաքապետարան։
Լրահոս
Տեսանյութեր
Գևորգ Դանիելյան. Շատ վատ է, որ մենք չենք օգտագործում Սահմանադրության անվտանգության բարձիկները