Այսօրվա հանրահավաքից հիասթափություն չի լինի. Ա.Մանուկյան
ՀԱԿ խմբակցության քարտուղար Արամ Մանուկյանի կարծիքով` ժողովրդի մեջ մի շերտ անգամ չի մնացել, որ իշխանափոխություն չի ուզում: Միայն նրանք են դրան դեմ, ովքեր պաշտոն ունեն: Այս մասին այսօր նա ասաց ԱԺ ճեպազրույցների ժամանակ:
«Ինձ շատ խիստ է անհանգստացնում արտագաղթը, թվերը չեն պակասում, դրանք ավելանում են` վեց ամսվա ընթացքում 113 հազար է հեռացել: Տարեկան 50-60 հազար հեռանում է»,- նշեց նա` ավելացնելով, որ այս ընթացքը պետք է կանգնեցնել:
Վտանգը նրանում է, որ հայերով ուժեղացող Սփյուռքն ու հատկապես Ռուսաստանը թուլացնում է Հայաստանին, քանի որ, ըստ Ա.Մանուկյանի, էլ ավելի արագ է այդ դեպքում դատարկվում Հայաստանը. «Հենց սրանով է պայմանավորված իշխանափոխության խիստ անհրաժեշտությունն ու անհապաղ լինելը»:
Անդրադառնալով այսօրվա հանրահավաքին, Ա.Մանուկյանը նշեց, որ իրենց տեղեկություններով` այսօր հանրահավաքին մասնակցելու են լրիվ նոր շերտեր. «Մենք ոչ թե քաղաքական թելով ենք կապված, այլ փոփոխությունների անհրաժեշտությամբ: Պահանջարկը լինելու է շատ, այն լինելու է ավելի ագրեսիվ, մաքսիմալիստական ու շատ, քան կարող է լինել մեր հաշվարկները: Եթե տարիներ առաջ մենք էինք ավելի շատ ուզում իշխանափոխություն, իսկ ժողովուրդը այդ տեմպին չէր հասնում, ապա այսօր պատկերը լրիվ այլ է` ժողովուրդն ավելի շատ է այդ պահանջը ներկայացնում: Հարկավոր է ուղղակի ժողովրդի քանակը ու ճիշտ էներգիան օգտագործել արդյունավետ, որ արդյունքը լինի անցնցում»:
Շարունակելով Ա.Մանուկյանը վստահություն հայտնեց, որ այսօր հանրահավաքի վերջում կլինի հարցի պատասխանը, ու թեև նա չգիտի Ծառուկյանի ու Տեր-Պետրոսյանի ելույթների բովանդակությունը, բայց պայմանավորվածություն կա, որ առաջնորդները վերջում, տեսնելով մարդկանց քանակը, էներգիան` խորհրդակցելով կքննարկեն հետագա ընթացքը:
«Որոշակի սցենարներ անշուշտ պատրաստ են, բայց դրանք կմատուցվեն հանրահավաքի վերջում միայն: Մի բան իմացեք` սա հոկտեմբերի տասի հանրահավաքը չի, անշուշտ առաջընթաց է լինելու այսօր»,- հավաստիացրեց ՀԱԿ պատգամավորը` համաձայնելով ՀՅԴ խմբակցության ղեկավար Արմեն Ռուստամյանի ասածի հետ, որ չպետք է լինի բախում, արյունահեղություն և չպետք է լինի նաև հիասթափություն:
«Հիասթափություն չի լինի»,- հավաստիացրեց նա:
Ա.Մանուկյանը ասաց նաև, որ իրենք շատ լավ հասկանում են, որ ձգձգելը կարող է բերել հիասթափության ու նաև խոսակցությունների, որ այդ ձգձգումը պայմանավորված է որոշակի պայմանավորվածություններով: Բայց իրենք շատ լավ հասկանում են, որ ժողովրդի անվտանգությունը, ամենի համար պատասխանատվությունն իրենց վրա է. «Մենք բոլորս ուզում ենք այս շարժումը առանց ցնցումների տեղ հասցնել…. Մարտի մեկը բոլորիս վրա ծանր նստած է: Մենք ամեն ինչ անելու ենք, որ հանկարծ հիասթափվող չլինի: Մենք գիտենք, որ իշխանությունները ժամանակի մեջ լավ կարող են խաղալ, այնպես որ շատ ժամանակ չի լինելու»:
Իսկ վերջում ավելացրեց, որ եռյակի առաջնորդներին տված է իրավունք տեղում որոշում կայացնել` ելնելով իրավիճակից ու պահանջներից:
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին