Ձեր վստահելի աղբյուրը

«Բժիշկներն ինձ ասում էին պետք չէ երգել, այդպիսի ձայնային հյուսվածքներով հնարավոր չէ երգել: Բայց նրանք բոլորը սխալվեցին»,-ռուսական առաջին ալիքով հեռարձակվող «Պոզներ» հաղորդման ժամանակ ժպտալով ասել է աշխարհահռչակ հայազգի շանսոնյե Շառլ Ազնավուրը:

Պատասխանելով հաղորդման հեղինակ և վարող Վլադիմիր Պոզների հարցերին, նա պատմել է իր անցյալից՝ ինչպես են ծնողները տեղափոխվել Ֆրանսիա, որտեղ ծնվել է ինքը՝ Շանսոնյեն, հետո ներկայացրել է մեծ բեմ բարձրանալու երկար ու ծանր ճանապարհը, պատմել է նաև մեծ երգչուհի Էդիթ Պիաֆի, Սինատրայի հետ երգելու և Լայզա Մինելիի մասին:

Ազնավուրն ասել է, որ իր համար էստրադայում 20-րդ դարի մարդ կարող է համարվել Ռեյ Չարլզը, որին ինքը լավ է ճանաչում:

«Դուք գիտե՞ք, որ նրա որդին կիսով չափ հայ է»,-Պոզներին հարցրել է Շանսոնյեն, ինչին մեկնաբանն արձագանքել է մեծ զարմանքով:

«Հրաշալի կապ է: Նա երգիչ էր, որ կարող էր երգել ամեն ինչ ու շատ գեղեցիկ: Նա մեծագույնն էր»,- Չարլզի մասին խոսելիս շարունակել է Ազնավուրը:

Անդրադառնալով ցեղասպանության թեմային, Ազնավուրն ասել է, որ իրենց ընտանիքում, երբ ինքը փոքր էր, չեն խոսել ցեղասպանության մասին, այլ՝ իր մայրիկի վշտի, դժբախտության մասին. «Իմ մոր ամբողջ ընտանիքը սպանվել է, ոչնչացվել է ամբողջությամբ: Իսկ հորս ընտանիքի անդամներին ճանաչել եմ, իմացել եմ պապիկիս, տատիկիս մասին: Տատիկիս ծանոթացել եմ 1963-ին Հայաստան առաջին անգամ իմ այցելության ժամանակ»:

Նրա խոսքով, այդքան վշտով հանդերձ, իր մայրը ատելություն չի ունեցել թուրքերի նկատմամբ. «Նա ասում էր, որ թուրքերի շրջանում շատ լավ մարդիկ կան: Մենք ատելություն չէինք զգում: Ինձ սովորեցնում էին չստել, չատել և մարդկանց մասին վատը չխոսել»:

Ասել է, որ ապրիլի 24-ին անպայման կայցելի Երևան, քանի որ «պետք է այցելել»:

«Պետք չէ անտեսել այն, ինչ տեղի է ունեցել, քանի որ թուրքերին պետք է ասել, որ ճշմարտությունն ասելու ժամանակն է եկել», -հավելել է Ազնավուրը:

Հարցին, թե այնուամենայնիվ, ինչո՞ւ Թուրքիան չի ցանկանում ճանաչել ցեղասպանությունը և ցանկացած գործչի՝ այն ճանաչելու մասին կոչ-հայտարարությանը արձագանքում է ագրեսիայով, Շանսոնյեն պատասխանել է. «Կարծում եմ նրանց համար պատիվը կարևոր է: Նրանք իրենց պատվի համար չեն կարող ընդունել որպես փաստ: Բայց կա նաև այլ հանգամանք՝ նրանք հայերին պատկանող հողերով ու ունեցվածքով շատ են հարստացել: Այդ ամենն ընդունելը շատ դժվար կարող է լինել: Հասկանում եմ, բայց չեմ ընդունում»:

Հռոմի Պապի հայտարարության վերաբերյալ Ազնավուրն ասել է, որ կաթոլիկ եկեղեցու առաջնորդը հզոր մարդ է ու ճշմարտության կողմնակիցն է:

Շանսոնյեն անկեղծացել է ու ասել, որ ապրում է նորմալ կյանքով, լավատես է, ինչպես հայրը. «Իմ հայրը ոչնչի մասին չէր մտահոգվում, ասում էր՝ վաղը Աստված կտա ամեն ինչ: Չգիտեմ՝ հավատո՞ւմ եմ Աստծուն, թե՞ ոչ: Բայց գիտեմ, որ նա, ում Աստված են անվանում, կարող է մեզ տալ այն, ինչ անհրաժեշտ է»:

Դիետա պահելու մասին հարցին էլ ժպտալով պատասխանել է. «Ես գիտեմ, որ չի կարելի շաքար, աղ ու յուղոտ ուտելիքներ օգտագործել, բայց ես դրանք բոլորը ուտում եմ»:

Տեսանյութը՝ Pozneronline-ից: