Ձեր վստահելի աղբյուրը

«Այս օրը ես շատ եմ կարևորում, քանի որ մեր քաղաքը ստանձնում է նման կարևոր տիտղոս, բացի այդ բոլորն իմանում են, որ մենք հինգ հարյուր տարի առաջ ստեղծել ենք մեր առաջին տպագիր գիրքը այն դեպքում, երբ մեր դեռ հարևաններից ոմանք չկային էլ»,- Panorama.am-ի հետ զրույցում ասաց 14-ամյա Գարիկը, ով մասնակցում էր իր դպրոցի բակում կազմակերպված տոնական միջոցառմանը:

Նշենք, որ այսօր Երևանը գրքի համաշխարհային մայրաքաղաք հռչակելուն ու հայ տպագրությանը 500-ամյակին նվիրված երևանյան տարբեր հատվածներում տոնական միջոցառումներ էին, նաև հայ և համաշխարհային գրողների անունը կրող երևանյան բակերում:

Թեև շատ շատերի այն կարծիքին, որ այսօրվա սերունդը այնքան էլ չի սիրում գիրք կարդալ, հեռվացել է գրքից` նախապատվությունը տալով համակարգչին, հայ հասարակության շրջանում ընթերցանության ճգնաժամ է, բայց մենք այլ պատկերի ականատես եղանք:

8-րդ դասարանցի Աննան ասաց, որ իր համար առաջին հերթին գիրքն է, հետո նոր համակարգիչը, որի օգնությամբ էլ կարողանում է շատ բան իմանալ, բայց գիրքն ընթերցելիս «այլ հաճույք եմ ստանում»: «Ես երբ մի քիչ փոքր էի, սիրում էի հեքիաթներ կարդալ, իսկ հիմա ավելի շատ նախընտրում եմ պատմական թեմաներով գրքեր ընթերցել: Իսկ մենք, հաստատ, նման գրքերի պակաս չունենք, քանի որ ունենք հարուստ պատմություն` կարևոր իրադարձություններով, որոնք որ մեր տաղանդավոր գրողները հանձնել են գրքին»,- ասաց Աննան:

Նրա ընկերուհին էլ` շարունակելով, ասաց որ արդեն երրորդ անգամ է կարդում «Գևորգ մարզպետունի» պատմավեպը ու ամեն անգամ նոր բաներ է բացահայտում: «Մեր գրողների ստեղծածները ավելի հաճույքով եմ կարդում, քան արտասահմանյան, թեև դրանց էլ երբեմն-երբեմն անդրադառնում եմ»,- ասաց Լուսինեն:

11-րդ դասարանցի Խաչիկն էլ ասաց, որ ինքը հպարտ է, որ այսօր իր երկրի քաղաքամայր Երևանը դառնալու է գրքի մայրաքաղաք: «Այս իրադարձությունը Հայաստան է բերել տասնյակ օտարազգի բարձրաստիճան պաշտոնյաների: Նրանք ծանոթանալով մեր քաղաքին, մեր մշակութային ժառանգությունը ու նաև տեղեկանալով, որ մենք հինգհարյուրամյա տպագրության պատմություն ունենք, իրենց երկրներում կհաղորդեն այս մասին ու կրկին անգամ շատ-շատերը կլսեն Հայաստանն անունն ու թե ինչքան հին ենք մենք, բայց նաև նոր: Դրա մասին վկայում է նաև մեր քաղաքը:

Իսկ մեր հարևան Ադրբեջանն թող բարձրաձայնի իր մասին, ու հարստության մասին, իր փողերը վատնի` երկրի վարկանիշը բարձրացնելու համար, բայց մեկ է, մենք մեր սուղ միջոցներով էլ կարողանում ենք մեր երկրի արդեն իսկ բարձր վարկանիշը էլ ավելի բարձրացնենք: Դրա համար հենց միայն մեր մշակույթը բավական է»,- ասաց Խաչիկը: Նա ասաց նաև, որ ցանկանում է դառնալ դիվանագետ ու ապագայում իր մասնագիտությունը ծառայեցնելու է մեր երկիրը միջազգային ասպարեզում ավելի հանրահայտ դարձնելուն: