Ձեր վստահելի աղբյուրը

Հայաստանի տարբեր մարզերում անցկացվող ավանդական դարձած տարբեր փառատոներին ավելացել է ինքնատիպ մի տոնակատարություն ևս՝ Տաշիրի քաղաքապետարանի կողմից կազմակերպվող պանրի փառատոնը: Սա էլ ավանդական դառնալու ուղին է բռնել, այս տարի փառատոնն անցկացվել է երկորրդ անգամ: Լոռու մարզպետարանում այն կարծիքին են, որ տաշիրյան պանրի փառատոնը նախկին Կալինինոյի՝ ԽՍՀՄ-ում մեծ համբավ վայելող պանրագորածարանի լավագույն ավանդույթները շարունակող ներկայիս կաթնամթերքի վերամշակման արտադրամասերի աշխատանքի խթանման և մարդկանց առօրյան հետաքրքիր դարձնելու լավագույն միջոց է:

Պանրագործների քաղաքն այդ առթիվ երեկ հյուրընկալել է նաև մի շարք պաշտոնատար անձանց՝ մարզի տարբեր կառույցներից և հիմնարկներից: Այս տարի նույնպես փառատոնին մասնակցել են քաղաքի և տարածաշրջանի կաթի վերամշակման լավագույն արտադրամասերը, որոնք ջանք չեն խնայել պատշաճ ձևով ի ցույց դնելու իրենց արտադրանքը:

Ավանդական կերակրատեսակներով հանդես են եկել Նորաշեն համայնքը, «Արտյոմի մոտ» ռեստորանը, մեղրագործ Արարատ Յավրումյանը, Տաշիրի ռուսական համայնքի ներկայացուցիչները:

Իրենց ձեռքի աշխատանքներն են ցուցադրել Տաշիրի արտադպրոցական կենտրոնի խմբակները, ինչպես նաև «Տիրամայր Հայաստանի» դաստիարակության կենտրոնը: Իսկ Հայկական Կարիտասի «Փոքրիկ իշխան» կենտրոնը ներկաներին զարմացրել են հետաքրքիր և ինքնատիպ նախաձեռնությամբ. կենտրոնի պատանի պանրագործների պատրաստած համեղ ու նրբաճաշակ տեսականիով:

Փառատոնը բացել են Լոռու մարզպետ Արթուր Նալբանդյանը և Տաշիրի քաղաքապետ Էդգար Արշակյանը: Տոնակատարությունը սկսվել է Սարչապետ համայնքի «Լոք» համույթի կողմից «Բերդ» հայրենաշունչ պարի կատարումով և միջոցառման խորհրդանիշ դարձած «Մեր պանրի համը» երգով:

Մարզպետարանի հասարակայնության հետ կապերի վարչությունից մանրամասնում են, որ թատերականացված տեսարաններ են ներկայացրել Վանաձորի Աբելյանի անվան դրամատիկական թատրոնի դերասանները (սցենարի հեղինակ՝ ՀՀ արվեստի վաստակավոր գործիչ, դրամատուրգ Սամվել Խալաթյան):

Մարզի ղեկավարն իր ողջույնի խոսքում կարևորելով միջոցառման նշանակությունը, շնորհակալություն է հայտնել պանրի փառատոնի կազմակերպիչներին՝ հուսալով, որ հաջորդ տարի տոնակատարությունը կանցկացվի հանրապետական մասշտաբով: Մարզպետի կողմից պատվոգրերի են արժանացել փառատոնին ակտիվորեն մասնակցող կազմակերպությունները:

Տաշիրի քաղաքապետի կողմից՝ «Տաշիրյան պանրի փառատոն 2014-ին» պատշաճ կերպով մասնակցելու համար պանրագործարաններին և մյուս կազմակերպություններին պատվոգրեր հանձնելուց հետո ամենասպասված պահը՝ պանրի տեսականու և մյուս ուտեստների համտեսումը և ներկայացված ձեռքի աշխատանքների դիտումն է եղել:

Նախորդող հրապարակում՝
«Հյութեղ խոտ, համով կաթ, յուղալի պանիր». Մտադիր են պանիրը Լոռու բրենդ դարձնել