Ձեր վստահելի աղբյուրը

Հանրապետությունում գրանցված մեծածավալ թունավորումները պետական մի քանի օղակների ոչ պատշաճ աշխատանքի հետևանքն են: Panorama.am-ի հետ զրույցում նման կարծիք հայտնեց «Իրազեկ և պաշտպանված սպառող» ՀԿ նախագահ Բաբկեն Պիպոյանը:

Հիշեցնենք, որ վերջին մի քանի ամսվա ընթացքում թունավորումներ են գրանցվել Արամավիրի մանկապարտեզներում, Գեղարքունիքի մարզի Վահան գյուղում,  հանրային սննդի օբյեկտումներում՝ մասնավորապես «Հատիսի լանջին» ռեստորանում, Արտաշատի «Արարատ» ռեստորանում, ԵԿՄ անդամների երեխաների ճամբարում, Նորագավիթում, արագ սննդի կետում:

«Այսքան հանրայանացված ու նման ծավալների թունավորումներ մենք չէինք ունեցել, նույնիսկ պետական մակարադակով են փաստում, որ թունավորումների թիվն ավելացել է, հիմա պետք է հասկանալ, ո՞րն է խնդիրը»,-ասաց Պիպոյանը:

Պետական պաշտոնյաների այն հայտարարությունները,  թե թունավորումների ու աղիքային վարակների թվի ավելացումը պայմանավորված է շոգով, ՀԿ նախագահին չի բավարարում. «Էլի են եղել տարիներ, երբ ջերմաստիճանը նորմայից բարձր է եղել: Շատ կոմպոնենտներ կան, որոնցից շատ կարևոր է կանխարգելում: Իսկ հիմա այդ աշխատանքները լավ չեն իրականացվում»:

Ճամբարում գրանցված մասսայական թունավորման մասին խոսելիս, Panorama.am-ի զրուցակիցը նշեց, որ վերահսկողություն իրականացման խնդիր կա. «Այսօր ով որտեղ ուզի, ճամբար է կազմակերպում: Մինչդեռ ժամանակին դա բարդ լիցենզավորված գործւընթաց էր, բոլոր կառույցները համապատասխան թույլտվություններ էին տալիս, որից հետո նոր միայն մարդը կարող էր ճամբար կազմակերպել: Դրա անունը դրեցին բյուրոկրատական քաշքշուկ: Այսինքն, մենք ոչ թե պատժում ենք չինովնիկին, ով քաշքշուկ է ստեղծում, այլ ընթացակարգ ենք փոխում: Իսկ դա բերեց նրան, ինչ որ ունենք այսօր: Պետք է պետական մի քանի մարմիններ դիմեին նոր կառավարությանը՝ վերականգնելու ընթացակարգերը: Սա մի քանի օղակի կառավարման խնդիր է»:

Ինչ վերաբերում է հանրային սննդի օբյեկտներում գրանցված թունավորումներին, ապա սննդամթերքի անվտանգության ոլորտի մասնագետը խիստ մտահոգիչ է համարում. «որովհետև չկան մշակված ընթացակարգային այնպիսի գործողություններ, որոնք հնարավորություն են ընձեռնելու կանխարգելելու պրոբլեմը: Եթե ի հայտ եկավ պրոբլեմը, ապա բոլորին հետաքրքրում է մի բան՝ ո՞վ ի՞նչ չէր արել, որ նման բան եղավ»:

Ազգային անվտանգության բաղադրիչ հանդիսացող սոցիալ-առողջապահական ու պարենային անվտանգության նման իրավիճակում Պիպոյանի համար անհասկանալի ու անընդունելի է կառավարության կողմից տեսչական ստուգումների կրճատումը:  Նրա կարծիքով, պետք էր մոնիտորինգ իրականացնել, հասկանալու՝ տնտեսվարող սուբյեկտը որ պետական ապարատի տեսչական ստուգումից է ավելի շատ կաշկանդվում՝ հարկայինի՞, թե այլի:

Տնտեսական անվտանգությունը ևս ազգային անվտանգության տարր է, սակայն այս պարագայում առավել կարևորվում է պարենային անվտանգությունը, ունենք մեծածավալ թունավորումներ, սա լուրջ ռիսկ է ու վտանգ. «Նման իրավիճակում կրճատել տեսչական ստուգումները, նշանակում է, անուղղակիորեն ասել, որ մենք տնտեսական անվտանգության իմաստով շատ լուրջ խնդիր ունենք կամ էլ ուղղակի չենք մտածում ժողովրդի մասին»:

«Մենք ունեցանք այսքան թունավորումներ, նույնիսկ մահ, փչացած հավերի մատակարարում մանկապարտեզին: Այս մարդիկ չպե՞տք է քրեական պատասխանատվության ենթարկվեին, թե՞ ժողովրդին կարելի է թունավորել, մի քանի հարյուր հազար դրամ վճարել ու վերջ: Հիմա հարց, եթե օրենսդրական փոփոխություն չի առաջարկվել, որ այդ արարքը դառնա քրեորեն պատժելի, ո՞վ չի աշխատել: Ստացվում է, որ մի քանի օղակ չի աշխատել: Կա համակարգային պրոբլեմ»,-շեշտադրումներ արեց նա:

Պիպոյանի խոսքով, պետական մարմինները չեն ցանկանում ընդունել, որ առկա է համակարգային ճգնաժամ. «Չընդունելն է բերում այս պրոբլեմներին, որովհետև հենց ընդունենք, որ ունենք համակարգային ճգնաժամ, կիրականացվեն գործողություններ, որոնք թույլ կտան այս իրավիճակից դուրս գալ: Թե չէ միշտ էլ կարելի է արդարացումներ գտնել»: