«Ոսկե ծիրան» 11-րդ փառատոն. Սպասված, սիրված ու կինոքարտեզի վրա հաստատված
Կինոքարտեզի վրա Երևանում անցկացվող «Ոսկե ծիրան» կինոփառատոնը հաստատվել է ու մեծ հետաքրքրություն է առաջացրել կինոաշխարհում: Դրա վառ վկայությունն է, որ «Ոսկե ծիրան» Երևանի 11-րդ միջազգային կինոփառատոնին մասնակցության համար ներկայացվել է ավելի քան 1500 հայտ աշխարհի շուրջ 101 երկրից, ինչը գերազանցում է նախորդ տարիների հայտերի քանակը: Այս մասին լրագրողների հետ հանդիպման ժամանակ ասաց փառատոնի գեղարվեստական ղեկավար Սուսաննա Հարությունյանը:
Փառատոնի ծրագրերի տնօրեն Միքայել Ստամբոլցյանը զարմանալի է համարում այն փաստը, որ այս տարի ամենաշատ ֆիլմերը ներկայացրել է Գերմանիան՝ 141 ժապավեն, այնուհետև ՌԴ-ն (120), Իտալիա, Ֆրանսիա, Պարսկաստան, Հայաստան (59 ֆիլմ):
Ասուլիսին ներկա մշակույթի նախարար Հասմիկ Պողոսյանն ասաց, որ «Ոսկե ծիրան» կինփառատոնը վառ, սպասված ու սիրված մշակութային իրադարձություն է Հայաստանի մշակութային կյանքում:
«Փառատոնը շատ բազմաբովանդակ խնդիրներ է լուծում մեզանում, համաշխարհային կինոն հասանելի է դարձնում մեր հասարակությունը»,- նշեց նախարարը:
Փառատոնի գլխավոր գործընկեր «ՎիվաՍել-ՄՏՍ» ընկերության գլխավոր տնօրեն Ռալֆ Յիրիկյանի խոսքով, փառատոնի օրերին Հայաստանը վերածվում է մշակութային խաչմերուկի: Նա կարևորեց այն փաստը, որ փառատոնը տարեցտարի ընդլայնվում է, ինչը Ռալֆ Յիրիկյանը համարում է նաև համախմբած աշխատանքի արդյունք:
«Ոսկե ծիրան» փառատոնի տնօրեն Հարություն Խաչատրյանը հույս հայտնեց, որ աշխարհի հետաքրքրությունը Հայաստանի, հայկական մշակույթի, փառատոնի հանդեպ մեծանում է:
«Մենք նպատակ ունենք հայկական կինոն մտցնել համաշխարհային կինոյի շարքերի մեջ, հայկական կինոն դուրս բերենք Հայաստանի սահմաններից»,- ասաց նա:
«Ոսկե ծիրան» Երևանի 11-րդ միջազգային փառատոնն անցկացվելու է հուլիսի 13-20-ը: Փառատոնն այս տարի նվիրվում է Սերգեյ Փարաջանովի հիշատակին՝ ի պատիվ մեծանուն արվեստագետի 90-ամյա հոբելյանին: Այս կապակցությամբ, փառատոնային օրերին հատուկ ծրագրեր, միջոցառումներ, ցուցահանդեսներ են կազմակերպվելու, ներկայացվելու է ռեժիսորի բոլոր ֆիլմերը, նաև Փարաջանովին նվիրված ֆիլմեր:
Փառատոնի բացմանն ու փակմանը ներկայացվելու է Ս. Փարաջանովի ֆիլմերը: Ի դեպ, նշենք, որ փառատոնի բացման ու փակման հանդիսավոր արարողություններն այս տարի կայանալու են Ալ. Սպենդիարյանի անվան ազգային ակադեմիական թատրոնում:
«Ոսկե ծիրան»-ի ֆիլմերի ծրագիրը կպահպանի Միջազգային խաղարկային, Միջազգային վավերագրական, Հայկական համայնապատկեր և «Կորիզ» կարճամետրաժ ֆիլմերի ավանդական դարձած չորս մրցույթները, որոնք կգնահատվեն հրավիրյալ ժյուրիների կողմից:
Համաշխարհային կինոյի հին և նոր շրջանների գլուխգործոցները երևանյան հանդիսատեսին կներկայացվեն Երևանյան պրեմիերաներ, Հետահայաց ցուցադրություններ և Հարգանքի տուրք հատուկ արտամրցութային ծրագրերում:
Կինոցուցադրությունները կուղեկցվեն ռեժիսորների հետ հանդիպումներով: Տեղի կունենան վարպետության բաց դասեր ուսանողների և կինոյի բոլոր սիրահարների համար:
Փառատոնի օրերին ավանդաբար կկայանան «Ռեժիսորներ առանց սահմանների» և «Հայաստան-Թուրքիա կինոպլատֆորմ» համատեղ արտադրության ֆորում-դասընթացները, որոնք կարևոր խթան են հանդիսանում ոչ միայն տարածաշրջանային կինոինդուստրիայի զարգացման, այլև արվեստի միջոցով միջմշակութային կապերի զարգացման, և հետևաբար` երկրների միջև խաղաղ երկխոսության առաջխաղացման համար: