Ձեր վստահելի աղբյուրը

Այսօր կառավարության շենքի դիմաց մի քանի հասարակական կազմակերպություններ բողոքի ցույց էին կազմակերպել` ընդդեմ Գառնու ձորում գտնվող «քարերի սիմֆոնիա» կոչվող հատվածի ոչնչացման: «Գողանում են ազգային հարստությունը», «Պատվաստում ենք վանդալիզմի դեմ», «Գառնու սիմֆոնիան քարհանք չէ», «Հերիք ա», «Ոչ հուշարձանների ավերմանը», «Կանայք ընդդեմ վանդալիզմի», «Մի լռեցրեք Գառնու սիմֆոնիան» պաստառներով ցուցարարները պահանջում էին մի բան` «պատժել մեղավորներին»:

«Բնության բացառիկ հուշարձաններից Գառնու քարերի սիմֆոնիան վտանգված է: Մենք պահանջում ենք դադարեցնել վանդալիզմը: Շինարարական նպատակներով օգտագործման համար լոմով քանդում են այդ հատվածը»,-լրագրողների հետ զրույցում ասաց «Բնատաճար հասարակական նախաձեռնության» անդամ Ապրես Զոհրաբյանը: «Տարածաշրջանային զարգացման կենտրոն» հայաստանյան կազմակերպության գործադիր տնօրեն Սոնա Այվազյանի խոսքով, այդ քարերի մի մասն օգտագործվում է Ազգային պատկերասրահի տնօրեն Փարավոն Միրզոյանի առանձնատան կառուցման համար, իսկ մյուս մասն էլ թաքուն տանում են Արտաշատ, որտեղ մեր պաշտոնյաներից մեկը կառուցում է սուրբ Հովհաննես անվանումով եկեղեցի: «Քար հատողները հենց գյուղացիրներն են, բայց դա նրանց սեփական նախաձեռնությունը չէ, պատվեր են կատարում: Պաշտոնյաներ են ներգրավված, և դա պաշտոնի չարաշահում է»,-ավելացրեց Ս. Այվազյանը:

Ցույցին ներկա էր նաև Գառնիի գյուղապետ Աշոտ Վարդանյանը: «Այդ տարածքը հանձնված է Ջրային տնտեսությանը ու իրենց հարցրեք` ինչու են քանդում»,-բորբոքված պատասխանեց նա: Նշենք, որ գյուղապետն էլ ստորագրեց ցուցարարների նամակի տակ:
Կառավարության շենքից դեպի գլխավոր դատախազություն շարժված ցուցարարներն իրենց ստորագրություններով նամակը հանձնեցին գլխավոր դատախազությանը: Դատախազության ներկայացուցիչը հավաստիացրեց, որ կկատարվի համաապատասխան քննություն: «Եթե պատճառները մարդածին են, ապա մարդիկ կպատժվեն»,-այսպես են պատասխանել դատախազությունում:

Նշենք, որ այդ հատվածը մշակույթի նախարարության հովանու ներքո է. այն գտնվում է Գառնո տաճարի պահպանման գոտում: