Ձեր վստահելի աղբյուրը

Հավաքական անվտանգության պայմանագրի կազմակերպության (ՀԱՊԿ) ստեղծվելիք Արագ արձագանքման հավաքական ուժերը (ԱԱՀՈՒ, Коллективные силы оперативного реагирования, КСОР) օգտագործվելու են ռազմական ու սահմանային հակամարտությունների տեղայնացման, ահաբեկչական գործողությունների կանխման և թմրանյութերի շրջանառման դեմ ուղղված գործողությունների նպատակով: Իսկ ՀԱՊԿ անդամ երկրների նկատմամբ ագրեսիայի կամ տարածքային ամբողջականության դեմ ոտնձգությունների դեպքում կիրառվելու են զորքերի արդեն գոյություն ունեցող խմբավորումները: Այս մասին ռուսական «Կոմերսանտ» թերթին տված հարցազրույցում հայտնել է ՀԱՊԿ գլխավոր քարտուղար Նիկոլայ Բորդյուժան:

Ի պատասխան հարցին, թե հակամարտությունների հատկապես ո՞ր տիպի դրևորումներին հակազդելու համար է կիրառվելու ԱԱՀՈՒ-ն, Ն. Բորդյուժան ասել է. «Դա կախված է հակամարտության մասշտաբից: ԱԱՀՈՒ-ն մանր ռազմական բախումները մարելու համար է: Եթե մենք խոսում ենք տարածքային ամբողջականության լուրջ սպառնալիքի և խոշորածավալ պատերազմի մասին, ապա այդ դեպքերի համար գոյություն ունեն ռուս-հայկական և ռուս-բելառուսական խմբավորումներ»:

Հարցազրույցում Ն. Բորդյուժան անդրադարձել է նաև Լեռնային Ղարաբաղի հիմնախնդրին: Մասնավորապես, պատասխանելով լրագրողի հարցին, թե ինչպես պետք է իրեն դրևորի ՀԱՊԿ-ը, եթե կազմակերպության անդամ Հայաստանը պատերազմական գործողությունների մեջ մտնի Ադրբեջանի հետ, որը չի անդամակցում ՀԱՊԿ-ին, կազմակերպության գլխավոր քարտուղարն ասել է. «Ես չէի ցանկանա խոսել «ինչ կլինի, եթե…» տերմիններով: Դա շատ զգայուն հարց է: Սակայն վերջին տարիների տրամաբանությունը հուշում է, որ նման հակամարտություն չի լինի: Հարավային Օսեթիայում իրադարձությունները ցույց տվեցին, որ այս կամ այն խնդրի ուժային լուծումը որևէ հեռանկար չունի: Ինձ հաճախ են հարց տալիս Ղարաբաղի հակամարտության վերաբերյալ, և ես միշտ ասում եմ. Ցանկացած անզգույշ խոսք էմոցիաների առիթ է տալու և խոչընդոտելու է խաղաղ կարգավորմանը»:

Այս խիստ դիվանագիտական և մշուշոտ պատասխանը, սակայն, հստակ նախազգուշական ակնարկներ է պարունակում Ադրբեջանի հասցեին` այն առումով, որ չարժե ընդօրինակել հարևան Վրաստանին, քանի որ հակամարտության «թեժացումը» հղի է ծանր հետևանքներով: Այնուամենայնիվ լրագրողը փորձել է առավել հստակ պատասխան ստանալ. «Ձևակերպեմ այլ կերպ: ՀԱՊԿ անդամ Ա երկրի և այդ կազմակերպության մեջ չմտնող Բ երկրի միջև հակամարտություն է սկսվում, և Ա երկիրը դիմում է օգնության: ՀԱՊԿ-ն այնտեղ կուղարկի՞ ԱԱՀՈՒ-ն, թե՞ ոչ»:

«ՀԱՊԿ-ը ստեղծվել է, որպեսզի պետությունների անվտանգությունը համատեղ ուժերով ապահովի: Եթե երկրներից մեկի դեմ ագրեսիայի քայլ ձեռնարկվի, ապա ՀԱՊԿ-ը, ոչ թե ԱԱՀՈՒ-ն, այլ հենց ՀԱՊԿ-ը, կգա օգնության: Սկզբում կփորձենք օգնել քաղաքական միջոցներով: Եթե չստացվի և տեղ գտնի ագրեսիա` ռազմական ուժի կիրառմամբ, ՀԱՊԿ անդամ երկրի տարածքային ամբողջականության խախտման սպառնալիքով, ապա դաշնակցին պաշտպանելու համար կձեռնարկվեն բոլոր քայլերը»,- պատասխանել է Ն. Բորդյուժան: