Հակաամերիկյան հիստերիան Ադրբեջանում գնալով թափ է հավաքում
Ադրբեջանում գնալով էլ ավելի են ակտիվանում ԱՄՆ-ի դեմ ուղղված կոշտ հայտարարությունները: Այսօր այդ երկրի խորհրդարանի նիստում իշխանական կուսակցության մի շարք ներկայացուցիչներ ևս հանդես են եկել հերթական հակաամերիկյան հայտարարություններով:
«ԱՄՆ-ի` որպես համանախագահ երկրի ներկայիս դիրքորոշումը չի համապատասխանում այդ երկրի և Ադրբեջանի միջև հարաբերությունների բնույթին»,- հայտարարել է կառավարող «Ենի Ադրբեջան» կուսակցության փոխնախագահ Ալի Ահմեդովը: Նրա խոսքով, ԱՄՆ-ն, ի վնաս Ադրբեջանի շահերի, նյութական օժանդակություն է տրամադրում Հայաստանին: «Դա չի համապատասխանում ԱՄՆ-ի առաքելության, որը աշխարհում որպես ժողովրդավարության մունետիկ է դիրքավորվում»,- հայտարարել է Ալի Ահմեդովը` որևէ բառ չասելով, թե ինչ կապ ունի Ադրբեջանը ժողովրդավարության հետ: Փոխարենը նա առաջարկել է, որպեսզի «Ադրբեջանն այդ հարցով լուրջ դիրքորոշում որդեգրի»: «Ադրբեջանի հասարակություն, և հատկապես քաղաքական կուսակցությունները, պետք է բացահայտ կերպով բողոքեն ԱՄՆ-ի այդ քաղաքականության դեմ»,- նշել է նա:
Այնուհետև ելույթ է ունեցել նույն կուսակցության գործադիր քարտուղարը` Սիյավուշ Նովրուզովը: Վերջինս հայտարարել է, որ «Լեռնային Ղարաբաղի հակամարտության վերաբերյալ որոշ երկրների ոչ անաչառ դիրքորոշումն ընդհանուր առմամբ ուղղված է Ադրբեջանի դեմ», և չի մոռացել հիշեցնել, որ «երկրի ներսում որոշ ուժեր սատարում են այդ երկրների նման քաղաքականությունը»: «Հաշվի առնելով այդ ամենը, անհրաժեշտ է կոշտ ձևով բողոքել այն գործընթացների դեմ, որոնք անտեսում են Ադրբեջանի շահերը»,- ընդգծել է նա:
Մեջլիսի մեկ այլ պատգամավոր` Մալախատ Հուսեյնովան, վստահեցրել է, որ «այսօր Ադրբեջանի հասարակությունն ու քաղաքական գործիչները գտնվում են Բարաք Օբամայի նկատմամբ հավատը կորցնելու սահմանին»: «Ադրբեջանը վաղուց և սերտ համագործակցում է ՆԱՏՕ-ի հետ: Մեր զինծառայողներն այսօր էլ ամերիկացիների հետ մեջք մեջքի խաղաղություն են պահպանում Աֆղանստանում ու Իրաքում, բայց դրանով հանդերձ Վաշինգտոնի ներկայիս վարչակարգը, չգիտես ինչու, իրեն թույլ է տալիս անարդար վարվել Ադրբեջանի ու Թուրքիայի հետ: Մինչդեռ Ադրբեջանը, ի տարբերություն Հայաստանի, անվանվում է ԱՄՆ-ի ռազմավարական դաշնակից»,- ընդգծել է Միլի Մեջլիսի պատգամավորը:
Մեկ այլ պատգամավոր` Ֆազաիլ Աղամալին, բացի Վաշինգտոնի հասցեին քննադատություն հնչեցնելուց, առաջարկել է կոնկրետ քայլերի դիմել: «Նավթային պայմանագրերում Ամրիկայի փայաբաժինը պետք է նվազեցնել, քանի որ ադրբեջանական նավթից ստացված եկամուտները նրանք օգտագործում են անջատողականներին օգնելու համար»,- ըստ «Թուրանի» հայտարարել է Ֆազաիլ Աղամալին ու հընթացս էլ ավելի կոշտացրել իր մոտեցումը. «Ընդհանրապես անհրաժեշտ է Ադրբեջանում դադարեցնել Ամերիկայի գործունեությունը»:
Հիշեցնենք, որ մինչ այդ` նախորդ շաբաթվա վերջին, ԱՄՆ-ի դեմ ուղղված կոշտ հայտարարություններ էին արել Ադրբեջանի նախագահ Իլհամ Ալիևն ու նախագահի աշխատակազմի ղեկավար պաշտոնյա Ալի Հասանովը:
Պաշտոնական Բաքուն զուտ հայտարարություններով չի սահմանափակվել: Երեկ հայտնի դարձավ, որ Ադրբեջանը միակողմանի խզել է պայմանագիրն ամերիկյան կողմի հետ, որով նախատեսվում էր հաջորդ ամիս համատեղ զորավարժություններ անցկացնել:
Ամերիկյան կողմն առայժմ զուսպ է: Պաշտոնապես Ադրբեջանում հնչած քննադատությանն արձագանքել են Ադրբեջանում ԱՄՆ դեսպանատան մամլո խոսնակ Թերի Դևիդսոնն ու ԱՄՆ պետքարտուղարության խոսնակ Ֆիլիպ Քրոուլին: Նրանց հայտարարություններն ըստ էության զգուշացում էին առ այն, որ ղարաբաղյան կարգավորման հարցում Վաշինգտոնը եղել և մնում է չեզոք:
Ասել է թե` կողմնակալության վերաբերյալ պնդումներն ընդամենն Ադրբեջանի իշխանությունների` չեզոքությունը սուբյեկտիվ ընկալելու հետևանք են: Այս իմաստով հետաքրքիր է ադրբեջանցի Ֆիքրետ Սադիխովի հարցազրույցը «Դեյ.ազ»-ին:
Ամերիկացիները ցանկանում են, որ կոնֆլիկտային վիճակից գտնվի մի ելք, որը կբավարարի թե Բաքվին, թե Երևանին: Բայց դա անհնար է: Հաշվի առնելով հակամարտության նկատմամբ համանախագահ երկրի նման մոտեցումը, Բաքվի ցանկացած ուժային գործողություն հիմնավորված կլինի»,- հայտարարել է քաղաքագետ Սադիխովն: Ի դեպ, սույն քաղաքագետը նաև մեկ այլ ուշագրավ հայտարարություն է արել. «Մենք այլևս չենք կարող ընդունել երկակի չափանիշների քաղաքականությունը, և հենց որ վերջնականապես ամրապնդենք մեր բանակը և համապատասխան տնտեսական բաղադրիչը, կսկենք հակամարտության ուժային տարբերակի լուծումը»:
Ակնհայտ է, որ Ֆիքրետ Սադիխովն իր այս հայտարարությամբ պնդել է`
ա/ Ադրբեջանի բանակն ու տնտեսությունն առայժմ պատերազմի պատրաստ չեն,
բ/ հենց պատրաստ լինեն պատերազմը կսկսվի:
Սա նշանակում է, որ Հայաստանի ղեկավարության այն պնդումները`
ա/ Ադրբեջանը կպատերազմեր, եթե հաղթանակի անգամ փոքր հույս ունենար,
բ/ Ադրբեջանը հակված չէ փոխզիջումների, այլ ձգում է ժամանակ,
ընդամենը առկա իրողությունների արձանագրումն են:
Վերադառնալով Ադրբեջանում ծավալված հակաամերիկյան հիստերիային, հարկ ենք համարում ներկայացնել ադրբեջանական մամուլի արձագանքներն այս խնդրին:
Մասնավորապես, «Ենի Մուսավաթը», անդրադառնալով համատեղ զորավարժություններից հրաժարվելու որոշմանը, գրում է, թե չի բացառվում, որ առաջիկա օրերին որոշում կայացվի արգելել Աֆղանստան մեկնող ՆԱՏՕ-ի ռազմական ինքնաթիռների թռիչքն Ադրբեջանի օդային տարածքով:
Փաստորեն Ադրբեջանում հետագա լարվածություն են ակնկալում: Այս առումով հետաքրքիր է «Ազադլիգ» թերթի անդրադարձը: Վերջինս, հղում անելով Ադրբեջանի իշխանական շրջանակներին, տեղեկացնում է, որ Բաքվի և Վաշինգտոնի միջև հարաբերությունների հետագա լարումը կարող է հագեցնել Ադրբեջանի նկատմամբ պատժամիջոցների կիրառման: Մասնավորապես ակնկալվում է, որ ամերիկացիները իրենց վերահսկողության տակ գտնվող բանկերում կսառեցնեն ադրբեջանցի օլիգարխների հաշիվները: «Այդ կապակցությամբ նրանք սեփական փողերն ամերիկյան ու եվրոպական բանկերից տեղափոխում են Ամերիկային թշնամի երկրների բանկեր»,- գրում է թերթը:
Նախորդող նորություններ` Արևմտյան փորձագետները զգուշացնում են Ադրբեջանին
«Վաշինգտոնյան հանդիպումներն անհանգստացրել են Բաքվին»
«Իլհամ Ալիևին ծաղրում են անգամ Ադրբեջանում»
«Ամերիկյան դեսպանատունն արձագանքել է Ադրբեջանի քննադատությանը
ԵԱՀԿ համանախագահ ԱՄՆ-ի հասցեին»
Լրահոս
Տեսանյութեր
«Ձեր սիրելի Ալիևը «Նոլդու Փաշինյան» երգը միացրած Արցախով պտտվում է». Բագրատ Սրբազանը՝ իշխանությանը