Էրդողանը չեղյալ է հայտարարել Արգենտինա կատարելիք այցը. Քեմալ Աթաթուրքի կիսանդրին չի տեղադրվելու Բուենոս Այրեսում
Լատինական Ամերիկայում շրջագայության դուրս եկած Թուրքիայի վարչապետ Ռեջեփ Թայիփ Էրդողանը չեղյալ է հայտարարել Արգենտինա կատարելիք այցը: Պատճառն այն է, որ Արգենտինայի մայրաքաղաք Բուենոս Այրեսի քաղաքային իշխանությունները հայկական համայնքի ճնշման ներքո հրաժարվել են Քեմալ Աթաթուրքի կիսանդրի տեղադրելու մտքից:
Էրդողանը Արգենտինա պետք է մեկներ մայիսի 31-ին` Բրազիլիայից: Բուենոս Այրեսում Թուրքիայի վարչապետը պետք է հանդիպում ունենար Արգենտինայի նախագահ Քրիստինա Ֆերնանդես դե Կիրշների հետ: Բացի այդ նա պետք է մասնակցեր Բուենոս Այրեսի «Խորխե Նյուբերի» զբոսայգում Քեմալ Աթաթուրքի կիսանդրու բացման արարողությանը:
Սակայն դեռևս Էրդողանի շրջագայության մեկնարկից առաջ` անցած շաբաթավերջին, արգենտինահայ համայնքի ներկայացուցիչների բողոքներից հետո Բուենոս Այրեսի քաղաքապետարանը որոշել է քաղաքում Աթաթուրքի կիսանդրի տեղադրման արարողությունը չեղյալ հայտարարել:
«Ազատություն» ռադիոկայանի փոխանցմամբ, բացի կայացված որոշումը քաղաքապետի ներկայացուցիչ Դիեգո Սանտիլին նաև ներողություն է խնդրել հայ համայնքից, իր իսկ բնորոշմամբ` «ծանր սխալի» համար, և խոստացել է թույլ չտալ հուշարձանի բացումը:
Բնականաբար, պաշտոնական Անկարայի արձագանքն այս որոշմանը կոշտ է եղել: Ըստ թուրքական մամուլի, արտգործնախարար Ահմեդ Դավութօղլուն զրուցել է իր արգենտինացի գործընկեր Խորխե Տայանայի հետ և կոչ արել «հավատարիմ մնալ ստանձնած պարտավորություններին»:
Դրանից բացի Թուրքիայի արտաքին գերատեսչությունը հայտարարություն է տարածել, որտեղ Արգենտինայի հայկական կազմակերպություններին մեղադրել է «թշնամական» միջամտության համար:
«Արգենտինայի կառավարությունը այս քայլին է դիմել Թուրքիայի նկատմամբ թշնամաբար տրամադրված հայկական շրջանակների ճնշման ներքո»,- ասված է հայտարարության տեքստում:
Իր հերթին Ռեջեփ Թայիփ Էրդողանը հեռախոսազրույց է ունեցել նախագահ Քրիստինա Կիրշների հետ և պահանջել վերանայել կայացված որոշումը:
Ի պատասխան` Արգենտինայի նախագահը հայտնել է, որ թուրքական կողմի դիրքորոշումը նա հասկանում է, սակայն իր երկրի կառավարությունը չի կարող միջամտել մայրաքաղաքի իշխանությունների որոշմանը.
«Դա Արգենտինայի Սահմանադրության խախտում կլինի»,- հայտնել է Արգենտինայի նախագահը:
Արդյունքում վարչապետ Էրդողանը չեղյալ է հայտարարել Արգենտինա կատարելիք այցը և Բրազիլիայից Արգենտինայի փոխարեն կմեկնի Չիլի:
Տեղեկացնենք, որ վերոնշյալ նորությունը գրավել է համաշխարհային առաջատար լրատվամիջոցների ուշադրությունը:
Այսպես, BBC-ին բացի փաստը ներկայացնելուց անդրադարձել է հայ-թուրքական հարաբերությունների հիմնախնդրին: «Հայկական կազմակերպությունները ցանկանում են, որ Թուրքիան զանգվածային ջարդերը ճանաչի որպես ցեղասպանություն, իսկ Արգենտինան այն երկրներից է, որ արել է այդ բանը»,- գրել է BBC-ն:
Նույն կերպ վարվել են նաև մահմեդական երկրների լրատվամիջոցները: Համարաբական Al Arabiya հեռուստաընկերությունը, անդրադառնալով լուրին և Հայոց ցեղասպանության խնդրին, գրել է. «Արգենտինա-Թուրքիա հարաբերությունները կրկին վատթարացան»:
Իսկ թուրքական Zaman-ը անդրադարձ է կատարել Արգենտինայում Հայոց ցեղասպանությունը ճանաչող օրինագծի ընդունմանը: Տեղեկացնելով, որ համապատասխան իրավական ակտն ընդունվել է 2006 թվականի նոյեմբերին և վավերացվել Արգենտինայի այն ժամանակվա նախագահ Նեստոր Քիրշների (ներկայիս նախագահ Քրիստինա Քիրշների ամուսնու – Panorama.am) կողմից` թուրքական թերթը փորձում է հիմնավորել լատինաամերիկյան այդ երկրի կեցվածքը.
«Արգենտինան ԱՄՆ-ից ու Ֆրանսիայից հետո երրորդ ամենախոշոր հայկական համայնքն ունի», -գրում է թերթը. նշենք, որ արգենտինահայ համայնքն իրականում երրորդն է արևմտյան կիսագնդում, իսկ ընդհանրապես այն զիջում է ոչ միայն ԱՄՆ-ին ու Ֆրանսիային, այլև` Ռուսաստանին, Իրանին, Վրաստանին, Սիրիային, որոշ տվյալներով` նաև Ուկրաինային: