Ձեր վստահելի աղբյուրը

Ադրբեջանի բանակի Դաշքեսանում տեղակայված զորամասում սեպտեմբերի 10-ին ողբերգություն է տեղի ունեցել: Զորանոցներից մեկում մահճակալն է փլվել, եւ արդյունքում զինվոր Ռաուֆ Իսմայիլովը ծանր վնասվածք է ստացել:

«Բիզիմ յոլ»-ին հայտնի է դարձել, որ դեպքը տեղի է ունեցել այն ժամանակ, երբ հերթապահությունից վերադարձած զինվորը կոշիկները հանելու համար նստել է մահճակալին: Այդ պահին երկհարկանի մահճակալը պահող հենաձողերը կոտրվել են եւ ընկել նրա ու նրա մոտ եղած ընկերների վրա: Ռ.Իսմայիլովի մեջքը կոտրվել է, իսկ մյուս զինվորները թեթեւ վնասվածքներ են ստացել:
Թերթը պատահական չի համարում կատարվածը` նշելով, որ բժիշկների գնահատմամբ, խիստ ծանր վիճակում գտնվող զինվորի հարազատները տեղեկացրել են, որ 10 զինվորի համար նախատեսված զորանոցում 18 զինվոր է տեղավորվել, մահճակալներն էլ փլվել են նորմայից ավելի ծանրաբեռնված լինելու պատճառով: Զորամաս այցելած զինվորի հայրը` Սամեդ Իսմայիլովը, թերթի թղթակցին պատմել է, որ փոխանակ զորամասի սպայական անձնակազմը զբաղվի կարգ ու կանոնով, զինվորների ամենաօրյա պահանջմունքները բավարարելով, ականատես է եղել, թե ինչպես են նրանք իրենց ենթակա զինվորներին աշխատեցնում սեփական տնտեսություններում:

«Զորամասում զինվորներն զբաղված են ծառայությունից դուրս գործերով»,- ասել է զինվորի հայրը եւ հայտնել, որ պատրաստվում է գնալ Ադրբեջանի պաշտպանության նախարարություն եւ միջադեպի հետ կապված` մամուլի կոնֆերանս անցկացնել:
Հիշեցնենք, որ այդ զորամասում հունվարի 28-ին կոտորած էր տեղի ունեցել: Տեղի ունեցած միջադեպի ժամանակ Բաքվի Յասամալի եւ Նասիմի շրջանների զինկոմիսարիատներից զորակոչված զինվորներ Էլխան Ազիզովը եւ Սադիգ Մամեդովը գնդակահարել են դիվիզիոնի հրամանատար, գնդապետ-լեյտենանտ Ռաշիդ Հասանովին, շտաբի պետ, գնդապետ-լեյտենանտ Վազեհ Գուլիեւին եւ ծանր վիրավորել մայոր Վագիֆ Բաբաեւին ու Սամիր Աբբասովին: Այդ գործով ձերբակալվել են զորամասի սպաներ Վալադ Գուրբանովը, Վազեհ Բաբաբեւը, Ֆուադ Մութալիբովը, Ռուստամ Ահմեդովը եւ Ալի Իմանովը: Կաշառք վերցնելու, զինծառայողին վիրավորելու, ծեծելու եւ խոշտանգելու մեղադրանքով նրանց նկատմամբ դատական գործեր են հարուցվել: