Դ. Բաբայան. «Ադրբեջանին կանչել էին խրատելու, հորդորելու՝ վերանայել իր ապակառուցողական քաղաքականությունը»
«Ընդհանրապես Օբամա-Ալիև հանդիպումը շատ հետաքրքրական էր մի քանի տեսակետից. նախ այնտեղ Ադրբեջանի համար մեծ թվով ոչ դրական դրույթներ են շոշափվել, այդ պատճառով էլ ադրբեջանական ԶԼՄ-ում այդ հանդիպման մասին խիստ միակողմանի մոտեցումներ են ներկայացվում»- անդրադառնալով ՄԱԿ-ի Գլխավոր ասամբլեայի 65-րդ նստաշրջանի շրջանակներում ԱՄՆ նախագահի՝ Ադրբեջանի նախագահի հետ հանդիպման ընթացքում հնչեցրած հայտարարությանը՝ Panorama.am-ի հետ զրույցում նշեց ԼՂՀ նախագահի աշխատակազմի Հասարակայնության հետ կապերի գլխավոր վարչության պետ Դավիթ Բաբայանը:
Հիշեցնենք, որ ԱՄՆ-ի և Ադրբեջանի նախագահներ Բարաք Օբամայի և Իլհամ Ալիևի հանդիպման ժամանակ սպիտակ տան ղեկավարը վերահաստատել է ԱՄՆ աջակցությունը ԵԱՀԿ Մինսկի գործընթացին` ղարաբաղյան հիմնախնդիրը լուծելու համար` առանձնահատուկ կերպով ընդգծելով շփման գծում հրադադարի ռեժիմի պահպանման և հիմնախնդիրը բացառապես խաղաղ ճանապարհով, Հելսինկիի սկզբունքների հիման վրա, տարածքային ամբողջականության, հավասար իրավունքների ու ժողովուրդների ինքնորոշման սկզբունքների հիման վրա լուծելու անհրաժեշտությունը:
«Բարաք Օբամայի հայտարարության մեջ, և ընդհանրապես, այդ հանդիպման ընթացքում հնչեցված ամերիկյան մոտեցումներին անհրաժեշտ է լրջորեն մոտենալ: Շատ կարևոր է այն հանգամանքը, որ ԱՄՆ նախագահն Ալիևի հետ հանդիպման ժամանակ ևս մեկ անգամ ընդգծել է հիմնախնդիրը Հելսինկյան սկզբունքների հիման վրա լուծելու անհրաժեշտությունը, քանի որ այդ սկզբունքներում արտացոլված է ժողովուրդների ինքնորոշման իրավունքը»,- նշեց ԼՂՀ պաշտոնյան:
Դրանից զատ, նրա համոզմամբ՝ ԱՄՆ-ն ակտիվորեն առաջ է քաշում ժողովուրդների ինքնորոշման իրավունքի և դրա իրացման փաստի ճանաչման քաղաքականությունը, որը վառ դրսևորվել է ոչ միայն Կոսովոյի, այլև այժմ էլ դրսևորվում է Հարավային Սուդանում:
«Բոլորովին վերջերս, ԱՄՆ պետքարտուղար Հ. Քլինթոնն անդրադառնալով ԱՄՆ արտաքին քաղաքականությանը, նշել է, թե Սուդանը պետք է պատրաստ լինի ճանաչելու Հարավային Սուդանի անկախությունը, եթե Սուդանի այդ հատվածում տեղի ունեցող հանրաքվեի արդյունքում բնակչությունը նախապատվությունն անկախությանը տա»,- հավելեց Դ. Բաբայանը:
Նրա խոսքերով, Օբաման ևս մեկ անգամ նշել է, թե անհրաժեշտ է բացառապես խաղաղ կերպով կարգավորվել ԼՂ հակամարտությունը:
«Սրանով իսկ, Ադրբեջանի զգուշացվեց զերծ մնալ ապակառուցաղական, ռազմատենչ հայտարարություններից: Հանդիպման ընթացքում շոշափվել է Ադրբեջանում մարդու իրավունքների, ժողովրդավարության հետ առնչվող գործընթացները: Սա ևս շատ կարևոր գործոն է:
Այս անգամ, փաստորեն, Ադրբեջանին կանչել էին խրատելու, հորդորելու՝ վերանայել իր ապակառուցողական քաղաքականությունը ինչպես արտաքին, այնպես էլ ներքին ոլորտներում»,- նկատեց ԼՂՀ նախագահի աշխատակազմի հասարակայնության հետ կապերի գլխավոր վարչության պետը:
Պատասխանելով Panorama.am-ի այն հարցին, թե Ալիև-Օբամա հանդիպումից առաջ, Ադրբեջանում պրոիշխանական գործիչներն ու լրատվամիջոցները տեղեկություններ էին շրջանառում այն մասին, թե այդ հանդիպումը վերջապես «կջերմացնի» վերջին տարիներին երկու երկրների միջև առկա սառը հարաբերությունները, արդյո՞ք գործընթացները ջերմեցմանն են տանում՝ Դ. Բաբայանն ասաց.
«Ես չեմ կարծում, թե այդ հանդիպումը հարթեցրեց երկու երկրների միջև առկա տարաձայնությունները, հակառակը՝ կարծում եմ` Ադրբեջանում հակաամերիկյան կեցվածքով մարդիկ ավելի են շատանալու: Դրա պատճառներից են՝ թուրք-ադրբեջանական հարաբերությունների առավել ջերմացումը, Ադրբեջանում հակաիսրայելական դիրքորոշման ընդունումը, ինչը Վաշինգտոնին բնականաբար դուր չի գալիս և չի բխում նրա շահերից: Հետևաբար մենք կարող ենք ակնկալել, որ եթե պաշտոնական դիրքորոշումը կտրուկ չփոխվի, ապա տարբեր լուրջ կազմակերպությունների, քաղաքական ուժերի և գործիչների միջոցով հակաադրբեջանական ալիքի ականատեսն ենք դառնալու: Չմոռանանք, որ վերջին ժամանակներս Ադրբեջանում իրականացվող տարբեր քաղաքական շոուների ժամանակ ամերիկյան և իսրայելական դրոշներ են այրվում», -եզրափակեց մեր զրուցակիցը:
Լրահոս
Տեսանյութեր
«Ձեր սիրելի Ալիևը «Նոլդու Փաշինյան» երգը միացրած Արցախով պտտվում է». Բագրատ Սրբազանը՝ իշխանությանը