Ձեր վստահելի աղբյուրը

«Ինչ վերաբերվում է Թուրքիայի ԱԳ նախարար Ահմեդ Դավութօղլուի՝ հայ-թուրքական արձանագրությունների վավերացման ներկայիս փուլի վերաբերյալ հնչեցրած հայտարարությանը, ապա այստեղ անհրաժեշտ է մի քանի հստակեցումներ մտցնել: Առաջին, Դավութօղլուն նշում է, որ արձանագրությունների վավերացման առաջին հետքայլը Թուրքիան չէ կատարել: Դա բացարձակապես չի համապատասխանում իրականությանը: Նա ուղղակի ստում է: Բանն այն է, որ նույն Թուրքիան հայ-թուրքական արձանագրությունները ստորագրելուց անմիջապես հետո սկսեց խոսել նախապայմանների լեզվով, և դա այն պարագայում, երբ այդ նույն արձանագրություններում, նախապայմանների մասին որևէ խոսք չկար: Հետևաբար, մոլորեցնել միջազգային հանրությանը, և հատկապես հայ ու թուրք հասարակություններին, կարծում եմ, որ վերջինիս չի հաջողվի: Եթե կա հետքայլ, ապա դա թուրքական իշխանությունների պատճառով է, քանի որ վերջիններս շարունակում են խոսել նախապայմանների լեզվով»,- անդրադառնալով Թուրքիայի ԱԳ նախարար Ահմեդ Դավութօղլուի՝ տարեկան ամփոփիչ ելույթում, հայ-թուրքական հարաբերությունների վերաբերյալ հնչեցրած հայտարարություններին՝ Panorama.am-ին ասաց ԱԺ պատգամավոր, Սևծովյան տնտեսական համագործակցության կազմակերպությունում Հայաստանի պատվիրակության ղեկավար Գագիկ Մինասյանը:

Նշենք, որ թուրք պաշտոնյան մասնավորապես նշել էր. «Հայաստանի հետ հարաբերությունները այլևս չեն վերադառնա մինչև արձանագրությունների ստորագրումը (2009 թվականի հոկտեմբերի 10) գոյություն ունեցող վիճակին: Կարևորը ոչ թե սահմանների բացումն է, այլ դրանք բաց պահել կարողանալը: Իսկ դա հայ-ադրբեջանական հարաբերությունների փափկեցման հետ է կապված»,- ասել է Դավութօղլուն` հավելելով, որ Թուրքիան ժողովրդավարության անցնելու դժվարություններ է կրում, իսկ Հայաստանը ոչ լիարժեք ժողովրդավարության խնդիրներ ունի:

«Ինչ վերաբերվում է պարոն Դավութօղլուի այն պնդմանը, թե ամեն դեպքում հարաբերությունները չեն վերադառնա նախաստորագրված ժամանակների իրավիճակին, այստեղ թերևս կարելի է նրա հետ համաձայնվել, քանզի եթե թուրքական կողմը  շարունակի այն գործընթացը, որն այսօր է առկա, ապա կարծում եմ, որ իրավիճակն ավելի բարդ կլինի ապագայում,  քան եղել է մինչ ստորագրման պահը»,- ասաց պատգամավորը:

Նրա խոսքերով՝ մեկ բան է, երբ դուք «գործընկերոջ» ստորագրությունների կոնկրետ նպատակը չգիտեք, այլ բան է երբ ժամանակի ընթացքում պարզվում է, որ դրանք բացի նենգությունից իրենց մեջ որևէ այլ բան չեն պարունակում, որովհետև այն իրավիճակն, որը հիմա առկա է, թույլ է տալիս պնդելու, որ հենց ստորագրման ժամանակ, թուրքերը արդեն գիտեին, որ ստորագրման հաջորդ օրն իսկ պետք է նախապայմաններ առաջ քաշվեին:

«Երրորդ, Դավութօղլուն կարծում է, թե առաջ գնալու համար, հայ-ադրբեջանական հարաբերությունները ևս պետք է «փափկացվեն». սա այն նույն ճանապարհն է, որի մասին արդեն խոսեցինք, խոսքս նախապայմանների մասին է: Եթե Թուրքիան մեզ հետ նախապայմաններ առաջ քաշելով է խոսում, ապա մենք էլ կարող էինք նախապայմաններ առաջ քաշել՝ միաժամանակ խախտելով պայմանավորվածությունները, որը որ ստանձնել էինք: Մասնավորապես պահանջեինք, որպեսզի Թուրքիան նախևառաջ ճանաչեր ցեղասպանությունը, դադարեցներ իր ժողովրդի նկատմամբ իրականացվող կոտորածը, խոսքը քրդերի նկատմամբ «պատժիչ» գործողությունների իրականացումն է, կառուցողական մոտեցումներ դրսևորեն Կիպրոսի հարցի շուրջ, և շատ ու շատ այլ նախապայմաններ: Մեկ բան ակնհայտ է, եթե Թուրքիան խոսում է նախապայմանների լեզվով, ապա  պետք է արձանագրենք , իսկ միջազգային հանրությունը՝ վավերացնի, որ նա արձանագրությունները վավերացնելու մտադրություն չունի»,- ասաց Գ. Մինասյանը:

Այնուհետև պատգամավորը հավելեց. «Իսկ ինչ վերաբերվում է ժողովրդավարությանը, ապա պետք է ասեմ, որ մի պետություն, ով պատերազմ է սանձազերծում իր իսկ քաղաքացիներ դեմ, ով անազատության է դատապարտում Հայոց ցեղասպանության մասին բարձրաձայնողներին, բարոյական իրավունք չունի գնահատական հնչեցնել այլ երկրների և, մասնավորապես, Հայաստանում առկա ժողովրդավարական գործընթացի մասին: