Ձեր վստահելի աղբյուրը

Ադրբեջանի ոստիկանությունը ապրիլի 17-ի հանրահավաքի 200 մասնակիցների հետ ձերբակալել է նաև երկու շվեդ լրագրողների և 5-ամյա աղջնակի:
Այս մասին տեղեկացնում է «Ենի մուսավաթ» թերթը:

Ադրբեջանի ընդդիմադիր Հանրային պալատը, որը միավորում է մի շարք ընդդիմադիր ուժերի ու գործիչների,ապրիլի 17-ին Բաքվում անցկացված հանրահավաքի վերաբերյալ տարածած հայտարարության մեջ հայտնել է, որ չնայած իշխանությունների կողմից իրականացված բազմաթիվ ճնշումներին` հազարավոր մասնակիցներ տարբեր ճանապարհներով աշխատել են մտնել Բաքվի «Սահիլ» այգի, որտեղ պետք է տեղի ունենար ընդդիմության բողոքի ակցիան, և հանդիպել են ոստիկանության կոշտ վերաբերմունքին:

Ոստիկանությունը ձերբակալել է նույնիսկ այգում հանգստացողներին: Ոստիկանություն են տարվել Շվեդիայից ժամանած լրագրողներ Ռոդեր Սթրիթը և Շառլոտա Ույքսթրոմը, որոնց հետո հարկադրաբար տարել են Միգրացիոն կենտրոն:

Ձերբակալել են նաև «Ազատություն» գոռացող 5-ամյա աղջնակին և նրա մորը, այգում հանգստացող տարեց մարդկանց և պատահական անցորդների:

Ակցիայի մասնակիցները փոքր խմբերով «Հրաժարական», «Ազատ ընտրություն» բովանդակությամբ կոչեր են հնչեցրել և այդպես էլ չեն կարողացել մտնել «Սահիլ» այգի: Ոստիկանությունը ձերբակալել է հանրահավաքի ավելի քան 200 մասնակիցների:

Նրանց հիմնականում տարել են Նասիմիի շրջանային ոստիկանական բաժանմունք և ծեծի ու բռնությունների ենթարկել: Ձերբակալվածների մի խմբի էլ տարել են քաղաքից դուրս և իջեցրել մեքենայից` մոտակա բնակավայրից շատ հեռու մի վայրում:

Հանրային պալատի համակարգման խորհուրդը հանրահավաքի մասնակիցների նկատմամբ ոստիկանության վերաբերմունքը գնահատել է որպես սահմանադրության, ժողովրդավարության, քաղաքացիների ազատ հավաքների անցկացման ու մարդու իրավունքների հերթական ոտնահարում, և իշխանություններից պահանջել են անմիջապես ազատ արձակել ձերբակալվածներին և խստորեն պատժել խաղաղ ակցիային մասնակցած մարդկանց նկատմամբ բռնություն գործադրածներին ու այն հրահանգողներին:

Հանրային պալատը հայտարարել է, որ պատրաստվում է անհրաժեշտ որոշումներ ընդունել` երկրում և աշխարհի մասշտաբով բողոքի ալիքն ու նմանատիպ գործընթացներն ավելի խորացնող իրենց հետագա քայլերի մասին: