Թուրքագետը պարզաբանում է «Hurriyetի»-ի տարածած ապատեղեկատվությունը
Օրերս ՀՀ սփյուռքի նախարար Հրանուշ Հակոբյանն այցելել է Ստամբուլ` մասնակցելու կանանց համաշխարհային գագաթաժողովին, որից հետո էլ հանդիպել է Ստամբուլի հայ համայնքի ներկայացուցիչների հետ: Հանդիպման ժամանակ տիկին Հակոբյանը Սփյուռքի նախարարության մեդալներ է հանձնել Պոլսի համայնքի արվեստի, մշակույթի մի շարք անվանի գործիչների:
Թուրքական «Հյուրիյեթ» թերթը, անդրադառնալով Սփյուռքի նախարարի այցին, նշել է, թե իբր պոլսահայ համայնքի շատ ներկայացուցիչներ վրդովված են նախարարի այցից և հանձնած մեդալներից, քանի որ «Նախարարը նրանց համարել է սփյուռքահայ, մինչդեռ պոլսահայերը իրենց չեն համարում սփյուռքահայ, քանի որ ապրում են իրենց նախնիների երկրում»:
«Ermenihaber.am» (Էրմենիհաբեր) լրատվական կայքի հետ զրույցում Երևանի Պետական Համալսարանի Արևելագիտության ֆակուլտետի փոխդեկան, թուրքագետ Ռուբեն Մելքոնյանը նշելով, որ թուրքական լրատվամիջոցի տարածած այս տեղեկությունը չի համապատասխանում իրականությանը և Թուրքիայի հերթական էժանագին քարոզչական հնարքն է, ասել է. «Սա բացահայտ ապատեղեկատվություն է և կեղծիք:
Խնդիրն այն է, որ պոլսահայերը, իրոք, իրենց չեն համարում սփյուռքահայ, քանի որ ապրում են այն երկրում, որտեղ ապրել են իրենց նախնիները և պոլսահայերի այս յուրահատուկ կարգավիճակի մասին Սփյուռքի նախարարը քաջատեղյակ է: Համայնքի հետ հանդիպման ժամանակ Հրանուշ Հակոբյանը հստակ նշել է, որ ինքը Պոլսի հայ համայնքին չի համարում Սփյուռք: Ավելին, նրանց դիտում է իբրև Սփյուռք ստեղծած համայնք, ինչը իրավացի է, քանի որ հենց Թուրքիայի հայության փրկված բեկորներից է գոյացել Սփյուռքը (ի դեպ, այն միտքը, որ պոլսահայերին չի կարելի է համարել սփյուռքահայեր հստակ արտահայտված է 2010թ. Սփյուռքի նախարարության կողմից հրատարակված «Ակնարկ Ստամբուլի հայ համայնքի պատմության» գրքում)»:
Իսկ ինչ վերաբերում է Սփյուռքի նախարարության մեդալներին, ապա դրանք տրվում են Հայաստան-Սփյուռք համագործակցությունը խթանող մարդկանց և ինչպես երեկ, այնպես էլ այսօր Պոլսում ստեղծվող հայկական մշակույթը համահայկական է, դրանից օգտվում են ինչպես հայաստանցիները, այնպես էլ հայկական Սփյուռքը և իրոք օգնում է հայության միջև գործակցության զարգացմանը:
Թուրագետը նաև նշել է, որ Հրանուշ Հակոբյանին Ստամբուլում ուղեկցած թուրքագետ Աշոտ Սողոմոնյանը հայտնել է, թե նախարարի այդ հայտարարությունը շատ լավ է ընկալվել համայնքում և հանդիպմանը ներկա շատերը գոհունակությամբ շեշտել են, որ տիկին Հակոբյանը ճիշտ շեշտադրումներով է անդրադարձել իրենց կարգավիճակին:
Ամփոփելով իր մեկնաբանությունը` Ռուբեն Մելքոնյանն ընդգծել է, որ արդեն տևական ժամանակ է Թուրքիայի քաղաքական մեքենան` ի դեմս երկրի արտաքին գործերի նախարար Ահմեթ Դավութօղլուի, վարչապետ Թայիփ Էրդողանի, թիրախ է ընտրել Հայաստան-Սփյուռք օրեցօր ամրապնդվող գործակցությունը: Մելքոնյանի դիտարկմամբ` Թուրքիան փորձում է արհեստական խնդիրներ և անջրպետներ առաջացնել Հայաստանի ու Սփյուռքի միջև` կիրառելով ապատեղեկատվության, կեղծիքի և տեղեկատվական հարձակման այլ մեթոդներ: