Հայաստանի անտառների 28 տոկոսը բավականին վատ վիճակում են
Հայաստանում բնական անտառների մոտ 70%-ը կազմալուծված ու ծերացած է և թարմացման, անտառը նորացնելու խնդիր կա: Այս մասին այսօր լրագրողների հետ հանդիպման ժամանակ ասաց ՀՀ գյուղատնտեսության նախարարության «Հայանտառ» ՊՈԱԿ-ի գլխավոր անտառապետ Ռուբեն Պետրոսյանը:
Նրա խոսքերով, Հայաստանը մտնում է սակավանտառ երկրների ցանկում: «Աշխարհում 70 երկիր կա, որոնք համարվում են սակավանտառ», - ասաց անտառապետը` հավելելով, որ նախկին ԽՍՀՄ տարածքում, ամենասակավանտառներից մեկը Հայաստանն է եղել:
Ըստ Ռ.Պետրոսյանի, Հայաստանի անտառների մի մասը ունեն սերմնային ծագում, մասնավորապես Տավուշի, Լոռու և որոշ չափով Սյունիքի մարզերի անտառները, մնացած անտառները` Վայոց Ձորի, Ծաղկաձորի տարածքի, ունեն մացառային ծագում. վերջիններս դարերի ընթացքում մի քանի անգամ այրվել են կամ վնասվել են և արդեն 4-5-րդ սերնդի անտառներ են:
Գլխավոր անտառապետի խոսքերով, ի սկզբանե մինչև 40 տոկոս անտառներ ենք ունեցել, տարբեր պատճառներով տարեցտարի անտառների տարածքը նվազել է և այսօր մեր անտառների բավականին զգալի մասը ունեն ցածր լրիվություն, այսինքն` նոսր են: «Հայաստանի անտառների 28 տոկոսը ունեն 3-ից 4 լրիվություն, այսինքն` բավականին վատ վիճակում են, մի մասը միջին որակի անտառներ են և շատ քիչ անտառներ կան, որոնք բարձր որակի են»,- ասաց Ռ.Պետրոսյանը:
Նա նաև նշեց, որ 20-րդ դարի 40-50-ական թվականներին մեծ ծավալի հատումներ են տեղի ունեցել և այն ժամանակ տարեկան հատվում էր 400-450 հազար խմ ծառ, 60-ականներին անտառագետների միջնորդությամբ նվազեցեն հատումները` հասնելով 160 հազար խմ-ի, և վերջին շրջանում արդեն անկանոն հատումների թիվը ավելացել է:
Ռ.Պետրոսյանի խոսքերով, եթե 2010թ.-ին Հայաստանի անտառներում հատվել է 2520 ծառ, ապա այս տարվա միայն առաջին կիսամյակում` արդեն 1750 ծառ: Ծառահատումների վերաբերյալ համապատասխան քրեական գործեր են հարուցվել, օրինակ` «Հայանտառը» հայտնաբերել է 1058 հատված ծառ, որի վերաբերյալ ակտեր են կազմվել, տեսչությունը հայտնաբերել է 473 հատված ծառ, անտառային մոնիտորինգը` 219 ծառ: Նրա կարծիքով, անտառահատումների հիմք կարող են հանդիսանալ սոցիալական խնդիրները:
Նշվեց նաև, որ անտառների պաշտպանությանն ուղղված միջոցառումներ են անցկացվում, այս օրերին միջազգային կառույցների կողմից «Հայանտառ»-ին է հանձնվելու երկու հակահրդեհային մեքենաներ, որոնք անտառային տարածքների հրդեհաշիջման աշխատանքներ կատարելու համար են նախատեսված, կան նաև անտառների պաշտպանության ուղղված այլ ծրագրեր:
Ռ.Պետրոսյանը միաժամանակ նշեց, որ այս պահի դրությամբ, անտառային տարածքների հրդեհի լուրջ դեպքեր դեռ չեն գրանցվել:
Լրահոս
Տեսանյութեր
«Տավուշը հանուն հայրենիքի» շարժման անդամները քայլերթով գալու են Երևան. Բագրատ Սրբազան