Ձեր վստահելի աղբյուրը

Շաբաթ-կիրակի օրերին շփման գծում ադրբեջանցի դիպուկահարների կողմից իրականացված ակտիվ գործողությունների արդյունքում ԼՂՀ պաշտպանական բանակը երկու զոհ է գրանցել: ՀՀ ՊՆ-ն արդեն հանդես է եկել մեկնաբանությամբ՝ հայտարարելով, որ հայկական կողմը ոչ համարժեք գործողությունների կդիմի: Արդյո՞ք սա իրավիճակային պատահարի արդյունք էր, թե՞ այն ունի առավել խորքային պատճառներ:

Ադրբեջանն ակնհայտորեն խախտում Եվրոպայում սովորական սպառազինությունների մասին պայմանագրով սահմանված դրույթները, երկրի քաղաքական էլիտայի ու անձամբ երկրի մակարդակով պատերազմի քարոզչություն է տարվում, հայատյացության ու ատելության այլ դրսևորումները դառնում են առավել ակնհայտ: Սրանք հանգամանքներ են, որոնք անխուսափելի են դարձում շփման գծում արձանագրվող նմանատիպ մահվան ելքով միջադեպերը:

Ակնհայտ է, որ արձանագրվող միջադեպերի, ինչպես նաև՝ երկու տասնամյակ շարունակվող ԼՂ հակամարտության կարգավորման պրոցեսում բեկում չգրանցելու միակ պատասխանատուն Ադրբեջանի նախագահ Իլհամ Ալիևն է: Հենց նրա կողմից իրականացվող քաղաքականությունն է, որը լուրջ վտանգի է ենթարկում տարածաշրջանում առանց այդ էլ առկա փխրուն խաղաղությունը:

Քանի խնդիրն իր վերջնական կարգավորումը չի ստացել, շփման գծում նման միջադեպերը կշարունակվեն, սակայն միանշանակորեն կարելի է ասել, որ համապատասխան կամքի դրսևորման պարագայում դրանք կարելի է նվազագույնի հասցնել:

Շփման գծում արձանագրվող զոհերի թիվն իսկապես կարելի էր շատ ավելի վաղ նվազագույնի հասցնել՝ դիպուկահարներին դուրս բերելով առաջնային գծից, սակայն միջազգային հանրության ու Հայաստանի կողմից առաջ քաշված առաջարկն ադրբեջանական կողմն ուղղակի անտեսեց՝ հայտարարելով, որ դիպուկահարների դուրս բերումը ոչ մի խնդիր չի լուծի, այնինչ, մարտական պայմաններում գրանցվող զոհերի ճնշող մեծամասնությունը զոհվում է հենց դիպուկահարների գործողությունների արդյունքում:

Հենց սա է պատճառը, որ միանշանակ կարելի է ասել, որ Ալիևն ու նրա շրջապատը պետք է անձամբ պատասխան տան շփման գծում զոհված զինծառայողների ու ՊՆ-ի կողմից՝ ոչ համարժեք գործողոթյունների արդյունքում՝ ադրբեջանական կողմի կորուստների համար: