Իրանական կայք. Իրանի վրա Իսրայելի հնարավոր ռազմական հարձակումը տեղի կունենա Ադրբեջանի թալիշաբնակ շրջաններից
Ադրբեջանն ու Իսրայելը Իրանի վրա հնարավոր ռազմական հարձակման առնչությամբ քննարկումներ են անցկացրել:
Այդ մասին հաղորդում է իրանական «արաննյուզ.իռ» կայքը՝ հղում անելով «ռոյթերզ»-ին:
Հոդվածում նշվում է, որ Ադրբեջանն ու Իսրայելը Իրանի վրա հնարավոր ռազմական հարձակման շուրջ ունեցած խորհրդակցությունների ժամանակ քննարկել են նաև Ադրբեջանի ռազմաօդային բազաների և այդ երկրի հետախուզական կարողությունների օգտագործման հարցը:
«Իհարկե, Իրանի վրա հնարավոր ռազմական հարձակման դեպքում Իսրայելին Ադրբեջանի ցուցաբերած օգնությունն ու դիվանագիտական աջակցությունն ԱՄՆ-ի ցուցաբերած աջակցությունից ավելի թույլ կլինի, սակայն այդ Ադրբեջանը կարող է աջակցել կործանիչները վառելիքով լիցքավորելու և հետախուզական գործողություններ իրականացնելու գործում»,-նշված է հոդվածում:
Շարունակելով թեման՝ իրանական աղբյուրը հավելում է. «Իսրայելի հետախուզական ծառայության (Մոսադ) ներկայացուցիչների այցելություններն Ադրբեջանի հարավային թալիշաբնակ շրջաններ վերջերս հաճախակիացել են: Իսրայելը, ԱՄՆ-ի հետ համագործակցելով, թալիշաբնակ Ասթարա շրջանում տեղակայված ռադարային համակարգերն օգտագործում է Իրանի դեմ իրականացվող հետախուզական գործողություններ կատարելիս և Իրանի վրա հնարավոր ռազմական հարձակումը հավանաբար տեղի կունենա հենց այդ շրջաններից»:
Նկատենք, որ Թեհրանի համալսարանի քաղաքագիտության ամբիոնի ասպիրանտ Ամին Փարթուն իսրայելաադրբեջանական հարաբերություններին նվիրված վերլուծական հոդվածում, հերթականությամբ ներկայացնելով բոլոր այն զինատեսակները, (անօդաչու ինքնաթիռներ, հականավային «Gabriel» հրթիռներ, հակատանկային «Spike» հրթիռային համակարգեր, հակաօդային պաշտպանության, հակաբալիստիկ «Barak» հրթիռային համակարգեր, ռադարային համակարգեր) որոնք Ադրբեջանը վերջին տարիներին ձեռք է բերել Իսրայելից, հարց է տալիս. «Ադրբեջանի կողմից նման սպառազինությունների ձեռք բերումն ի վերջ ո՞ր սպառանալիքի դեմ է ուղղված»:
«Պաշտոնական Բաքուն հայտարարում է, թե այդ ռազմական տեխնիկան ուղղված է Հայաստանի դեմ. Սակայն ռազմական փորձագետների վերլուծությունները ցույց են տալիս, որ Ադրբեջանի կողմից ձեռք բերված ռազմական տեխնիկան ուղղված է կամ Իրանի, կամ Թուրքմենստանի դեմ, քանի որ Հայաստանը դեպի ծով ելք չունի: Այսպիսով` Ադրբեջանի հականավային հրթիռները միայն ուղղված են Իրանի և Թուրքմենստանի դեմ»,-նշել է իրանցի վերլուծաբանը:
Հիշեցնենք, որ վերջերս իրանական «փրեսսթիվի.իռ» կայքը հաղորդել էր, որ Ադրբեջանի թալիշաբնակ Ասթարա շրջանում ամերիկյան ռադարային համակարգերի գործարկումից հետո Ադրբեջանն իսրայելցի ռազմական խորհրդատուների աջակցությամբ մոնտաժված անօդաչու ինքնաթիռների միջոցով հեռախուզական գործողություններ է իրականացնում Իրանի սահմանին:
Նախորդող տեղեկատվություն՝
Ադրբեջանական անօդաչու ինքնաթիռներն Իրանի սահմանին հետախուզական գործողություններ են իրականացնում
«Սանդի թայմզ».Իրանական հրթիռների արձակման դեպքում Իսրայելն Ադրբեջանի տարածքից նախահարձակ կլինի
Թեհրանը չի հավատում Ադրբեջանի հավաստիացումներին. Իսրայելից գնված ռազմական տեխնիկան կարող է օգտագործվել Իրանի դեմ
Իրանական կայք. Արդյո ՞ք Ադրբեջանի տարածքից Իրանի վրա ռազմական հարձակում կլինի